سيف بانتباه : اتفضل يا به؟!
عثمان بغضب : انت و خديجة ما بتنفعوا لبعض!
اعتدل سيف في قعدته و قال ليه : في شنو يا ابوي؟!
عثمان : عمك حامد قدام مجلس الحلة كلها لمح اني طمعان في مال خديجة بت علي!
سيف : لمح لمح كيف؟
عثمان بزهج : لمح و بس لمن سألته و نحن برانا. قال انا الخليتك تعرس خديجة عشان اضمن الارض لي
سيف بنفاذ صبر : اااه و انت كده حتثبت ليه! لمن تمنع زواجنا يعني؟!
عثمان : دي سمعة لينا يا سيف ،، حيقولوا اولاد العزيزي اتقاتلوا في ارض بسبب بت!
سيف بتفكير : يبقى نخلي اي شي زي ما كان و الارض يواصل فيها الماسكها اسي!
عثمان بغيظ : ارضنا و يزرعنا غيرنا بقروش!
سيف : ايوه يا ابوي ،،، يا يزرعها غيركم يا تمسكها انت و عمي حامد سوا لاني في الحالتين حاعرس خديجة!
عثمان : لا انا و عمك حامد لا ،، الحاج زاتو ما بيرضى بقول بندخل في مال يتيم
سيف : معناتها يواضل فيها المؤجر زي ما كان!
عثمان بضيق : ده اخر قولك يعني؟!
سيف : ايوه يا ابوي لانه انا الارض دي ما في اهتماماتي زا….
قطع كلامه لمن المكالمة قططعت ،، عاين للتلفون و لقى ابوه قفل الخط ،،، اخد نفس و هو بفكر في كلام ابوه ،،، عايز منه يوقف زواجه عشان قطعة ارض هو ما عارفها و لا جايب خبرها اصلاً.،،،
قبل يومين موضوع ندى و امه بخصوص أحمد،، و الليله الارض،، بكرة ما معروف يطلع ليه شنو؟! لاازم ينزل و يتزوجوا قبل العوارض تكتر ،، ،ما حينتظر اكتر من كده كفاية خلاص!
اما عثمان بعد قفل من سيف ،،، مشى لحامد و قال ليه تعال معاي تعاال!
حامد بتهكم : اجي معاك وين؟!
عثمان : لابوي مضوي عشان تعرفني طمعان و لا لااا ؟!
بعد لحظات عاين ليهم الحاج مضوي بعتاب و قال : كان فضل تتقاتلوا في ارض اخوكم الميت و حتى دي عملتوها !!
حامد بتبرير : انا بس قلت..
الحاج مضوي مقااطع : قلت قلتوا شنو ؟! ابوي بعد يموت الارض دي حتبقى لينا؟! بتورثوا فيني و انا حي الله اعلم بعد اموت تعملوا شنو ؟!
عثمان : الله يطول في عمرك.
الحاج مضوي بزهج : عشان تطمنوا و تشيلوا الموضوع ده كلو من بالكم انا اتنازلت لخديجة في ميراثي من ابوها في المحكمة و بالاوراق.
عاين ليه حامد و عثمان بصدمة و بعدين عاينوا لبعض.،، عثمان بضيق : يعنيي الارض دي كلها بقت لبنية جاهلة! و اعمامها قاعدين!
حامد بسخرية : نصيب بت علي يعادل نصيبنا باولادنا !!
الحاج مضوي بثقة قال : ارض ابوها و بي حر ماله و انا عفيت حقي تاني في شنو؟!
اطلعوا و انسوا الموضوع ده كلو و اعقلوا !!
اتحركوا من قدامه ،،، عاين ليهم و قال : الحمدلله سيف ما زيكم و المال عامي بصيرته الحمدلله.
_________HMZ_________
تاني اليوم المساء :
دخل احمد و معاهو عاصم الشقة و كانت ساكنة ، ،سألو عاصم وين العريس؟! احمد قال ليه : بكون هنا في غرفته ،،، قبل ساعة قال متحرك على البيت ،،، بعد دقايق سمعو صوته و هو بقول ليها : طيب تمام انا حأسال بسمة من مقاسك طالما ما عايزة تقول لي!
احمد غمز لعاصم و سكتوا الاتنين بعد سمعوا صوته و هو بقول : تصبحي على خير يا خديجة يلا سلام.
