بعد تلاتة يوم كعادة كل فجر استلم سيف يد جدو من يد خديجة و هو بعاين ليها ببسمة خفيفة ما رفعت راسها و ما شافتها ، ،، قبل تلتفت راجعة سمعت صوته و هو بقول : خديجة دقيقة و التفت للحاج مضوي و قال : يا ابوي بعد اذنك عايز اقعد مع خديجة نشوف موضوع التقديم و كمان اخد ورقها اصورهم.
جاوبه الجد : خلاص تمام ، ،بعد الصلاة نشرب الشاي هنا ،، جهزيهو يا بتي!
ملت الابتسامة وش خديجة و عيونها لمعت بفرحة و حمدت ربنا انه الدنيا ضلام ما شافوا فرحتها .
دخلت غرفتها صلت و شكرت ربنا و دعته يتمم الباقي على خير!
بعد شرقت الشمسس ،،،
قعد الحاج مضوي يتونس مع رفيقة عمره و شريكة دربه ،،، عايدة الاتمكن منها المرض و كلامها بقى محدود يكاد يعد بينما على مسافة قريبة منهم قعدت خديجة باستحياء جنب سيف الكان ماسك ورقة و قدامو دليل القبول للجامعات ،، وصلها صوته الرجولي و هو بقول :
طيب يا خديجة انا عرفت رغبتك تمريض! و حسب النسب القدامي دي فعندك فرصة في كذا جامعة! حالياً نحن حنكتب في الوقة دي عشرة رغبات و انا باكر بمشي المدينة و بسحب الاستمارة و املاها و نخت التمريض كرغبة أولية و ممكن تاني نضيف تخصصات تانية زي التخدير و العلاج الطبيعي! و لا رايك شنو؟!
كانت خديجة في البداية متوترة من قربه جنبها ،، بتحس بالهواء حوليها اتكتم لكن لمن لقتو مركز في الدليل و بتكلم برسمية ارتاحت و اندمجت معاهو لتجاوبه على سؤاله الاخير : لو ممكن خلاص!
ابتسامة صغيرة ظهرت على وشه و رفع عيونه و هو بقول بهدوء : ماف حاجة اسمها خلاص!! ده مستقبلك انتي ،، انتي البتحددي!!
دنقرت و ابتدت تفرك اصابع يديها ببعضهم بتوتر ،،، تجاوبه و تقول ليه شنو!!!
انها ما عندها اي معلومة عن كل البقوله ده!! جاهلة بطريقة التقديم من اساسها !! و انها رغبت بالتمريض كرد فعل طبيعي لمن شافت دور الممرض شنو مع المريض لمن كانت بتمشي مع حبويتها المستشفيات!!!.
عاين ليها سيف بنظره تفحصية لمن حس سكاتها طال ،، حس بالصراع و التردد جواهاا لكنه قال بتفهم : شوفي يا خديجة العشرة رغبات الحنملاهم ديل لازم يكونوا بترتيب معين! لو انتي عايزة تمريض مثلاً في جامعة الخرطوم ما حتكتبي تمريض جامعة الجزيرة اول!! فهمتيني؟!
اخيرا رفعت سوداواتها لتلاقي عسلياته و هزت رأسها بفهم!!
ابتسم لمن شاف انعكاس صورته في عيونها السوداء و تابع شرح بدون ما يحرك عيونه عنها و هي بسبب تركيزها معاهو و مع التقديم كانت بتتبدل نظرها بينه و بين الدليل غافلة عن نظراته الـ ابتدأ يظهر فيهم اعجاب!!!
