"حاربتُ لأغزو قلبها" الجزء الثالث من "لعنه جعلتني احبك"

الفصل السابع والعشرون

كانت ميرال تخرج من المستشفى فوقت الزيارة قد انتهى، كانت تمسح دموعها ولكنها نظرت ليزن ومن معه لترفع حاجبيها بتعجب من وجود أميرة مع يزن، فميران قد قصت لها ما حدث بينها وبين يزن في الصباح

اقتربت ميرال من يزن وهي تهمس له بتشنج "دي جاية ليه إن شاء الله" نظر يزن لاميرة بغموض وهو يهمس لميرال "عايزة تزور ميران وتطمن عليها"

"وقت الزيارة انتهى" قالتها ميرال بتافف ليقول يزن بلا مبالاة "عشر دقايق وهتمشي يا ميرال عادي، المهم انتي روحي دلوقتي قبل ما الدنيا تتزحم يلا"

تاففت ميرال بغضب ثم تركتهم وذهبت لتقول أميرة بصدمة "يزن دي مسلمتش عليا؟؟؟" تأفف يزن وهو يتركها ويذهب قائلًا "متركزيش يا اميرة ويلا خلينا نخلص"

دخلت أميرة خلفه وهي تبتسم بخبث حتى وصلو لغرفة ميران وكادت أميرة أن تدخل ولكن أوقفها يزن وهو يقول "خليكي هنا لحد ما اطمن عليها الاول"

دخل يزن واغلق الباب خلفه لتشعر أميرة بدموعها التي هبطت من أعينها لتمحيها سريعًا وهي تقول بغضب "ماشي يا يزن، لما نشوف القصه المقرفة بتاعتكم دي هتفضل لحد امتى"

وبعد دقائق خرج يزن وهو يدعي أميرة للدخول، دخلت أميرة وهي تذهب نحو ميران وهي تتصنع الحزن وتقول "الف سلامة عليكي يا روحي" نظرت لها ميران باحتقار ولم ترد عليها لتجلس أميرة بهدوء ثم نظرت ليزن وهي تقول "يزن ممكن معلش تجيبلي عصير لحسن حاسة اني دايخه جدًا"

"هو انا الشوفير بتاع ابوكي" قالها يزن بغضب لتضحك أميرة باحراج وهي تقول "يا يزن بقى متهزرش، زي ما انت شايف رجلي مكسورة ومش هقدر اقوم ودايخة جداا"

تأفف يزن وقرر عدم احراجها لذلك وقف وذهب ليحضر لها عصير

بينما أميرة ابتسمت بخبث وهي تنظر لميران وتقول "تؤتؤ، مكنتش اتخيل انك توصلي للادمان، لما يزن حكالي مصدقتش انك توصلي للدرجة دي" نظرت لها ميران بصدمة وهي تقول "انتي كدابة، يزن محكاش حاجة لحد"

ضحكت اميرة بشدة وهي تقول "الظاهر أن المخدرات أثرت على تفكيرك جامد، ونسيتك أن يزن بيحكيلي كل حاجة" ابتسمت ميران بسخرية وهي تقول بيقين "يزن لو هيحكي فعلا كان أولى يحكي لاهلي، بس هو مكانش عايز اهلي نفسهم يعرفو الا لما حكم الأمر، فلما تيجي انتي وتقوليلي يزن حكالك تبقي غبية لو فاكرة أن انا هصدق، لا يزن ولا اي حد من عيلتي مهما كان مين يقدر يطلع سر بيتنا بره وانا واثقه من ده، الله اعلم بقى انتي عرفتي منين الا لو انتي متابعاني بزيادة"

تاففت أميرة بغضب ثم نظرت لها بحقد وهي تقول "انتي مدمنه يا ميران، بصي كده لشكلك في المراية، بصي تحت عينك اسود ازاي بصي لوشك الي على طول كنتي بتهتمي بيه دلوقتي بقى باين ملامحك بالعافية، بصي كدة لشعرك الي كنتي فرحانه بيه دلوقتي بيقع من الضعف والادمان، انتي متستاهلوش، لو بتحبيه بجد ابعدي عنه علشان هو يستاهل واحدة احسن منك، هو يستاهلني انا، انا الي حاربت كرامتي يوم ما سابني وقالي أنه بيحبك، حاربتها علشان أوصله علشان بحبه"