"حاربتُ لأغزو قلبها" الجزء الثالث من "لعنه جعلتني احبك"

الفصل الثلاثون

كان يزن ومازن مقيدان على مقعدان ليقول يزن وهو يحاول الإفلات "ايه العبط ده بقى، مهو كدة مينفعش بصراحة احنا ليه مدخلناش كلية فنون تطبيقيه وريحنا نفسنا؟؟؟"

نظر مازن أمامه بغضب وهو يقول "طب وعهد الله انا لو مراتي هنا ومروحتهاش كانت نفختكم" نظر له يزن بتشنج وهو يقول"مش مكسوف وانت بتقولها"

"انا ومراتي واحد على فكرة" قالها مازن بثقه مصتنعه ولكن قاطعهم دخول رجل كبير بعض الشئ وهو يقول "ولاد احمد السيوفي، منورين"

نظر له يزن بغضب وهو يقول "ما انت لو تعرف احمد السيوفي ده مين مكنتش عملت الي عملته ده" نظر له مازن بخوف وهو يقول "والا والا ، اسرار شغل يخربيتك"

"استنى بس هخوفه، احنا ولاد الجوكر يا بابا" قالها يزن بثقه ليقول حمدان بتعجب"انت هتستهبل ياض، وهو الجوكر حد يعرفه اصلا، وبعدين يوم ما يخلف هيخلف اتنين عيال زيكم محسوبين على الحكومة بالعافية"

نظر له مازن بصدمة ليقول بتذمر"لا شكله بدأ يغلط يا يزن ويخش في أعراض ناس" نظر له يزن بغضب وهو يقول "انت هتسكت؟؟؟ لو انت هتسكت فانا مش هسكت وشوف هعمل فيه"

"عايزك تبهرني" قالها مازن بحماس لينظر يزن لحمدان نظرة حاده وفي ثواني كانت تلين ملامحه وهو يقول "في ايه يا عمو حمدان مالك، عيب على الشعرتين البيض الي في راسك دول عملنالك ايه علشان ده كله يعني والبهدلة دي"

"ياض عايزك تبهرني مش تقهرني" صرخ بها مازن لينظر لهما حمدان بصدمة من غبائهما وهو يقول "قتلتوا اخويا مثلا؟؟؟"

نظر له مازن تلك المرة وهو يقول ببراءه "اهوه قتلنا اخوك، يعني مقتلنكش انت يعني ايه الحوارات دي كلها بقى، وبعدين مكناش نقصد والله الطلقه خرجت من مسدس يزن بالغلط"

نظر له يزن بصدمة وهو يقول "اه يا واطي بتسلمني تسليم اهالي؟؟؟" نظر يزن لحمدان مرة أخرى وهو يقول "بص يا عمو حمدان، مهو بالعقل كده يا حبيب اخوك، انا لو مكنتش قتلته كان هيموت بردو ده عمره وكان هيموت بأي طريقة تانية هو مكتوبله يموت دلوقتي خلاص ده معاده، هنعترض على قضاء ربنا؟؟ ولا انت ملحد ولا ديانة ابوك ايه؟؟؟"

كان حمدان ينظر لهما بغيظ شديد ليهمس مازن ليزن "تفتكر بدأ يقتنع؟؟؟" قاطعهم جلوس حمدان على إحدى الكراسي وهو يضع قدم فوق الأخرى ويخرج سلاحه وينظر لهما ببرود

لينظر مازن ليزن بغضب وهو يصرخ به "عرفت أن كما تدين تدان، نفس القاعدة الي قعدتها قدام حمادة في المخزن والواد عامل زي الكتكوت المبلول، اتردت فينا دلوقتي، ما احنا لو نبطل افترى على الناس يا يزن الكلب مكانش زمانا قاعدين القاعدة دي"

نظر حمدان لمازن وهو يقول بسخرية "مش عيب لما مراتك تفلت من رجالتي، وانت متعرفش" نظر مازن للاسفل باحراج ليضحك يزن بشدة وهو يقول "مراتك طلعت ارجل منك يا مهزق"