ကံ့ကော်သက်လွင်သာ ချစ်ပါလျှင် (Completed ) S1+ S2

4.

Unicode

'ချပ်'

''ကိုစိုင်း ခင်များပစ္စည်းတွေ......''

ပြောလက်စ စကားများဟာ တံခါးဖွင့်ပြီး ဝင်လာတဲ့လူတစ်ယောက်ကို မြင်ပြီးသည့်နောက်မှာတော့ တိုးတိတ်ပျောက်ရှသွားတော့သည်။

''သခင်လေးက ဘယ်လိုလုပ် ဒီကို....''

သူ့စကားကို အလေးထားပုံမရတဲ့ သခင်လေးသျှင်းသန့်ဦးဟာ ခပ်တည်တည်နှင့်ပင်အခန်းထဲဝင်လာပြီးနောက် အရင်ကသူ့အခန်းဖော်နေခဲ့တဲ့ ကုတင်အလွတ်ဆီသို့သွားကာ သူ့အိမ်သူ့ယာကဲ့သို့ဝင်ထိုင်နေပြီဖြစ်တာမို့ မင်းနန္ဒအောင် အနည်းငယ်တော့ စိုးရိမ်မိသွားသည်။

မနေ့ကထိ သူ့အခန်းဖော်ဟာ မြန်မာစာဌာနက ကိုစိုင်းမော်အံ့ဖြစ်ခဲ့သေးတာ အခုတော့ ကိုစိုင်းမော်အံ့ရဲ့ပစ္စည်းတွေဟာတစ်ခုမှမရှိတော့ဘဲ သခင်လေးသျှင်းသန့်ဦးကတော့ သူ့အခန်းထဲရောက်နေပြီဖြစ်သည်။

မဟုတ်မှလွဲရော....။

''ဒီနေ့ကစပြီး ကိုယ်က မင်းရဲ့အခန်းဖော်ဖြစ်သွားပြီ ''

မင်းနန္ဒအောင်ရဲ့ စိုးရိမ်စိတ်များဟာ သခင်လေးသျှင်းသန့်ဦး၏ စကားသံအောက်မှာတော့ အမှန်တကယ်ဖြစ်လာရတော့သည်။

''သခင်လေး အေးအေးသက်သာနေပါ ကျွန်တော်မျိုး အခန်းပြောင်းပေးပါ့မယ် ''

ဟုတ်တယ်၊ သခင်လေးသျှင်းသန့်ဦးနဲ့ တစ်ခန်းထဲနေမယ့်အစား သူ့ကိုယ်သူ အဆုံးစီရင်လိုက်တာမှကောင်းဦးမယ်ဆိုတဲ့ စိတ်နှင့်အတူ သခင်လေးအား ဦးတစ်ချက်ညွှတ်ရင်း ခြေလှမ်းတွေအား အပြင်ဘက်သို့ဦးတည်လိုက်သည်။

''မင်းရဲ့ခြေတစ်လှမ်း အခန်းအပြင်ကိုထွက်တာနဲ့ မင်းခြေထောက်တွေကို သုံးစားလို့မရတော့အောင် ရိုက်ချိုးပစ်မယ်! ''

သခင်လေးရဲ့ ခြိမ်းခြောက်စကားသံကြောင့် မင်းနန္ဒအောင်၏ ခြေလှမ်းများဟာ တိကနဲနှင့်ရပ်တန့်သွားသည်။
သခင်လေး သျှင်းသန့်ဦးက ပြောရင်ပြောတဲ့အတိုင်းလုပ်တဲ့လူစားမျိုးမို့လို့ မင်းနန္ဒအောင်ဟာ သခင်လေးကိုငယ်ငယ်ကတည်းကပင်ကြောက်ရပါသည်။