ကံ့ကော်သက်လွင်သာ ချစ်ပါလျှင် (Completed ) S1+ S2

S2- 5 ⚠

TRIGGER WARNING : STRONG SEXUAL CONTENTS AHEAD!! READ AT YOUR OWN RISK ⚠

မကျဥ်းမကျယ်အိမ်ကလေး၏ ဧည့်ခန်းသဘောပုံစံအိမ်ရှေ့ခန်းလေး၌ မင်းနန္ဒအောင် တင်ပလင်ခွေကလေးထိုင်ရင်းဖြင့် အိမ်ကလေးထဲသို့ ဟိုဟိုသည်သည်လိုက်ကြည့်နေမိသည်။

ရွာကလေးအားပြန်လည်တည်ဆောက်ရေးလုပ်ငန်းများလုပ်ဆောင်ပေးနေတာမို့ ပရဟိတလုပ်အားပေးအဖွဲ့များသည် ရွာသားများနေထိုင်ရာ အိမ်လေးများကိုလည်း သူ့မြေနေရာနှင့်သူ စနစ်တကျနှင့် အိမ်ကလေးများအား ပြန်လည်ဆောက်လုပ်ပေးကြသည်။

လုပ်အားပေးအဖွဲ့၌ အင်ဂျင်နီယာတစ်ချို့လည်းပါသည်မို့ ယခင် ရွာသားများကိုယ်တိုင်ဆောက်လုပ်သော ယိုင်နဲ့နဲ့အိမ်များထက် ပို၍တောင့်တင်းခိုင်မာကာ စနစ်ကျသောအိမ်များကိုဆောက်လုပ်ပေးတာမို့ ရွာသားများမှာလည်းပျော်မဆုံးဖြစ်နေကာ လုပ်အားပေးအဖွဲ့များအား တဖွဖွနှင့်ကျေးဇူးတင်နေကြသည်။

သျှင်းသန့်ဦးသည်လည်း သူ့အား အဖွားနမ့်ပန်တို့နှင့်မနေစေတော့ဘဲ ခြံအလွတ်တစ်ကွက်အား ပိုင်ရှင်ဆီမှဝယ်ယူပေးကာ အိမ်ငယ်လေးတစ်လုံးအားဆောက်ပေး၍ နေထိုင်စေသည်။

တစ်လျှောက်လုံးအတူနေလာသော အဖွားနမ့်ပန်တို့အား အခုလိုခွဲထွက်ပြီးနေလိုက်မိတော့ အလွန်အမင်းအားနာရပေမယ့် အဖွားနမ့်ပန်ကလည်း အားနာဖို့မလိုကြောင်းပြောသည်ကတစ်ကြောင်း၊ သျှင်းသန့်ရဲ့ သူ့အပေါ် အလေးပေးမှုနှင့် ဂရုစိုက်မှုတွေကြား၌ ပျော်မွေ့မှန်းမသိ ပျော်မွေ့နေမိသည်ကတစ်ကြောင်းနှင့် မင်းနန္ဒအောင်မှာ သိပ်ကိုစိတ်ချမ်းသာနေရပါသည်။

အဖွားနမ့်ပန်တို့အိမ်မှာတုန်းက အခန်းဟူ၍ သတ်သတ်မှတ်မှတ်မရှိတာမို့ အိမ်ထဲ၌ရှိသော မီးလင်းဖိုဘေး၌သာ ဖြစ်သလိုအိပ်ကြရသည်။

ယခု သျှင်းသန့်ဆောက်ပေးထားသောအိမ်ကလေး၌တော့ မကျဥ်းမကျယ်အိပ်ခန်းလေးတစ်ခုလည်းပါသည့်အပြင် မီးလင်းဖိုခပ်ကြီးကြီးကိုပါထည့်၍ဆောက်လုပ်ပေးထားတာမို့ မီးလင်းဖိုက အပူရှိန်သည် တစ်အိမ်လုံးအားပြန့်နှံ့၍နွေးထွေးစေသည်အထိ။