كاعده بغرفتي على جربايه الم كتبي رجعت جسمي على المخده شفتها الساعه ب10
اووف واخيراً كملت
ندك باب غرفتي
حنين: هاا رهف كملتي قرايه
رهف: اي كملت
حنين: كرت عينج خلصتي
رهف: مستحيل كلما اتذكر اني بارادتي دخلت هذا القسم اكول وين جان عقلي
حنين: يلا خلص هاي السنه الخامسه باقيلج بس سنه وتختمين الطب
رهف: ان شاء الله مبقى شي واحقق حلمي
حنين: يلا تعالي سوينه كيك و نسكافيه ومنتضريج
رهف: بس الم الكتب ولاحكتج
اسمي رهف عمري 23 طولي حلو بس ماادري ليش يكولولي كصير بشرتي حنطاويه و لون عيوني بني فاتح
حنين اختي الصغيره عمرها 16 سنه طالبه صف خامس وطبعا هي اطول مني والي يشوفنا عباله هي الجبيره عيونها اكبار نفس لون عيوني وبشرتها بيضه
رفعت شعري و تعطرت ونزلت كعدت ويه اهلي
اخذت كوب وقطعه كيكه وكعدت بصف بابا
بابا: هاا بابا رهف كملتي قرايه بعد باجر اخر يوم مو
رهف: أي بابا كملت وحضرت كلشي بس اليوم وتخلص امتحانات نصف السنه
بابا: يلا احنه واكفين عليج حتى نسافر لتركيا
رهف: صدك احلف رح نروح لتركيا
بابا: اي نروح وحتى حجزت التذاكر وعكب باجر موعد الطياره
رهف: فدوووه والله اموت عليك
بابا: حسن دكيت على ابراهيم يجي يشوف جود قبل لا نسافر
حسن: اي دكيت عليه ميجاوب دزيتله رساله هو من يشوفها يعرف
بابا: والله مااعرف شسوي ويه هذا الولد الا واحد يكله يلا يجي يشوف ابنه متحسوو اب
رفل: بابا خلي يولي بعد لتتصلون عليه يريد يشوف ابنه خلي يجي يشوفه ميريد بعد احسن فركاه عيد
بابا: لا حبيبتي ميصير مهما يكول هذا ابو ولازم يشوفه كل فتره حتى ميكول ماعندي اب اخذي مني هاي الحجايه بحياتج لتحرمين اب او ام من ابنهم وبالعكس
رهف: بس هو ميستاهل يصير اب
بابا: بعد هو محسوب ابوه هذا قسمته لازم نقبل باراده الله
حنين: رهف ليش مدكولين لامير يجي ويانه
رهف: والله اني اكيف بس اذا هو يجي لازم عمتي هم تجي واذا اجتي تخرب علينه السفره
بابا: هاي شنو رهف شكم مره كتلج لتحجين على عمتج كدامي هذا اختيارج ولازم تتحملين وخلي بالج من تتزوجون ان شاء الله لتخليني اختار بينج وبين اختي ماشي بابا
رهف: اني اسفه بابا والله مو قصدي
بابا: يلا مصار شي هسه روحي نامي بعد وراج امتحان باجر
رهف: يلا تصبحون على خير
صعدت لغرفتي دورت على الهدفون ملكيته
استغفر الله وتالي وياك حسن ملكيت الا الهدفون مالي
نزلت ركض لكيته بالمطبخ يشرب جاي
حسن: خير شبيج نازله انتي وكفشتج تكول مخبله
رهف: حسن وين الهدفون شلون تاخذه بدون ما تستاذن
حسن: اني شبيه مخبل اخذ منج شي
رهف: اي طبعا لان مالتي اصليه من الاخير ترجعه ترى والله احرك البيت على راسك
كلها طلعت على صوتنا
بابا: شكو شبيكم ليش صوتكم طالع
رهف: بابا حسن اخذ هدفوني بدون مايرجعلي وهسه ميقبل يرجعهن
بابا: شكبرك تصير بعد تخلي عقلك بعقل خواتك هاي بدال ما انته تجيبلهن
حسن: لتصدكها هي بنتك عياره
بابا: شوف علما تصعد رهف اريدها تلكه الهدفون بغرفتها والا والله العظيم تشوف شي ميعجبك
راد يحجي بس بابا خنزره كبل صعد
بسته بخده
حبيبي بابا لتعصب ماكو شي يستاهل
صعدت لغرفتي لكيتهن على الميز بس اشو صايره ثلاثه قطع
كعدت بالكاع اعيط كلها صعدت ركض
رهف بدموع: بابا شوفه كطعهن وهاي جانت هديه من امير
بابا عيط على حسن حتى يجي
بابا: انته شنو تبقى زعطوط مجوز من سوالفك شوف لك هسه تروح تجيبلها واحد جديد
حسن: وين اروح هسه منين اجيب كلها معزله
ماما : ابو حسن على كيفك ويه الولد باجر الصبح يجيبلها واحد
بابا: تردين بنتي تنام واخلي شي بكلبها والله ثم والله اذا مرحت هسه هالشهر مالك مصرف
حسن: يابه والله تعبان راجع من الامتحان منايم
بابا: ها هسه تعبت بس من تكعد بالساعات تحجي بالموبايل هذا ميتعب مو
حنين واكفه بصفي
والله جابها بالكصه
رهف: اشش بابا عصبي سكتي ترى يجيج الدور
رفل: رهف اخذي مالتي والصبح يجيب وحده
ماما: ولج احجي ويه ابوج خطيه الولد وين يروح بهالوكت وبعدين مو باجر عندج امتحان رح تنامين شتشوين بيه
نداريت اشوفه ونقهرت عليه مسحت دموعي
رهف: ماريد عوفه باجر يجيبلي وحده ثانيه
بابا: كلت يروح يعني يروح شناقصه شو حتى مصروفه اكثر من مصروف البنات ليش يطلب
ماما: رح تخرب البنات بهذا دلالك كافي عاد لخاطري عوفه بس هالمره
بابا مسح وجهه: استغفر الله هاي لخاطرج رح اعوفه بس مره ثانيه خلي اشوفك تعاند ويه خواتك
ماما: هاهيه بعد ميسويها
جان يباوع عليه نظره يريد ياكلني بعيونه سوالي حركه يمسح على لحيته يعني اصبريلي وطلع
بابا باسني براسي : خوما بعدج زعلانه ماعاش الي يزعل بناتي
رهف بضحكه نصر: شلون ازعل وانته موجود
كلها طلعت من غرفتي واني فتحت الفون احجي ويه امير
امير بنعس: هلا حياتي شنو حلمانه بيه
رهف: شنو ممشتاقلي
امير: شلون ممشتاقلج يعمري انتي غير اني منتضر باجر اكثر منج حتى تخلصين واشوفج
رهف: حبيبي باجر اريد اشوفك
امير: طبعا اشوفج رح اجي من الكليه اخذج
رهف: لا حياتي شكلي ميساعد واني تعبانه اريد ارجع للبيت انام شويه
امير: اوك براحتج حبيبي قريتي عدل
رهف: اي طبعا حتى نحولت من كثر القرايه
امير: اي عفيه اريدج تنجحين حتى تخلصين ونتزوج بعد
رهف: هسه اني ميته قهر
امير: ليش شبيج
رهف: من حسن كطع الهدفون مالتي لان شكيته لبابا
امير: هههه انتي وحسن ولاجوزون من سوالفكم
رهف: انته تضحك واني ميته قهر اصلا لوما اني مسامحته جان هسه يفتر بالشوارع على محل مفتح
امير: مدلل امه ممتعود احد يكله لا
رهف: اي والله امي خربته بدلالها يلا انام بعد احس روحي نعست
امير: يلا لعد روحي نامي حتى الصبح تكعدين من وكت تراجعين
رهف: يلا حبيبي تصبح على خير
امير: وانتي من اهلو يعمري
امير ابن عمتي حب الطفوله من جنه صغار سووه وجان كل جمعه يكول لامه حتى يجون لبيتنا جان يعوف اخويه ويجي يلعب ويايه ويوم نجحت من السادس دزلي هديه دب وبيها تسجيل بصوته واعترفلي بيها بحبه وصرنه نسهر سوه ومن يجي لبيتنا انتظره بالحديقه ونسولف وصرت مرحله ثانيه كال يريد يخطبني بس اني رفضت لان اريد اخلص كليه يلا اتزوج وهو قبل اكمل وكال بس اخطبج اخاف اتاخر وترحين من ايدي وكال لامه تجي تخطبني بس امه رفضت ماجانت تريدني لابنها لان هي وامي بينهم مشاكل ورا شكد يلا وافقت ومن اجه يخطب امي وابويه رفضو هم لنفس السبب بس ابويه كال ماانطيج اله الا اتاكد هو الشخص المناسب الج ويحبج ورح يكون سند الج واني كدرت اقنع امي توافق لان ابويه جان يحترم رأي امي وياخذ بي بس ابويه بقى هوايه يفكر الى ان وافق والسبب مااعرف ليش بس الي اعرف صار شي بينه وبين امير خلاه يوافق بس حتى امير مكلي شنو هذا الشي هو وافق بس بشرط اكمل كليه بيت اهلي....
ثاني يوم الصبح كعدت شفت امي محضره ريوك هي وبابا كاعدين منتضريني كملت ريوكي صعدت لغرفتي لكيت مصروفي على المخده بدلت لبست قميص ابيض وتنوره قصيره وسشورت شعري وخليت مكياج خفيف
،،نزلت شفت بابا منتضرني حضني وباسني
بابا: لتخافين من الامتحان ان شاء الله سهل
رهف: ان شاء الله بس ادعولي
دك عليه السايق طلعت بسرعه
رجعت من الامتحان نمت ساعه والعصر طلعنه اني وامير هم اشوفه قبلما اروح وهم اشتري ملابس للسفره
امير: اخخ رح ترحين اسبوع شلون رح تخلص بدونج هذا الاسبوع
رهف: حبيبي ترى اغير رأيي ومااروح بعد
امير: لا روحي تونسي صارلج هوايه مطالعه بس تقرين شويه غيري جو
رهف: اي والله لو باقيه بعد يومين اقره جان تخبلت
امير : احلا مخبله بعد احسن حتى تبطلين من الكليه ونتزوج بعد
رهف: امير شراح تسوي من اني مو هنا
امير: ادور شغله اكضي بيها وكت
رهف: يعني شتسوي مثلا رح تحجي ويه بنات
امير: هذا الشي مو جديد ادور شي اجدد
رهف: يعني صدك تحجي ويه بنات
امير: شبيج عيونج دمعت اتشاقه وياج والله لتبجين
رهف: مااحبك بعد رجعني للبيت وبعد مااحجي وياك
امير: كلبج ينطيج تسافرين وانتي مزاعلتني
رهف: اي عادي مثلما انته كلبك انطاك تزعلني
امير: ولج ثوله شلون احجي ويه غيرج وانتي تسويهن كلهن
ضحكت وكتله يلا سامحتك هاي المره
ورجعت للبيت شفت رفل جاي تسد الجنط ولامه غراضي وياها
رفل: يلا بعد شنو تردين اخليلج بي
رهف: هاي انتي لميتي غراضي
رفل: اي مو ادري بيج كلت هسه ترجع تعبانه متكدر
رهف: والله محد يحس بيه بهذا البيت غيرج
رفل: كافي لواكه شنو بعد تردين
حنين: اي عيني بس تلم غراض رهف واني لا
رفل: مو هسه لميت ملابسج وياج بس رهف خطيه اليوم تعبانه رجعت من الامتحان بعد مكاعده
رفل اختي الجبيرة جانت حنينه علينا مثل حنيه امي وجانت تعاملنه مثل متعامل ابنها جود بس جانت مكسورة من جوه لان اخذت الي تحبه بس ماقدرها وطلكت منه وبينهم ولد جود حاليا عمره تسع سنين وكل هاي السنين هو ميجي الا احنه ندك عليه ونكله تعال شوف ابنك ورفل من جانت تشوف هيجي شي تكول صوجي معرفت اختار اب صح لابني.
نزلت للمطبخ اساعد امي بالمطبخ سويت الزلاطه طب علينا حسن وذب عليه جيس
حسن: هذا الهدفون الجديد مو تبجين
رهف: اكيد هسه جايبلي هاي الرخيصه ام الالف
حسن: فوكاه شوكت تتزوجين ونخلص منج أدري بس انتي هيجي صارلج اربع سنين مخطوبه ترى ملينا
رهف: يووم احجي وياه
ماما: غير عدها دراسه وبعدين كاعده بيت ابوها مو بيتك
حسن: هذا الكاسر ايدي لو بيتي جان انطيتها بملابسها
ماما: شنو هالحجي يا ماما هاي اختك ميصير تحجي عليها هيجي
رهف بزعل: هسه ادك على امير ونحدد العرس اسبوع الجاي حتى حضرتك تخلص مني
ماما: ترى يتشاقه وياج متعرفين شقاه
كمت من مكاني وصعدت لغرفتي الم غراضي للسفره وندك الباب
رهف: تفضل
حسن: هاي شنو صدك رح تتزوجين اسبوع الجاي ترى اتشاقه وياج على بختج
رهف بضحكه: لا ولك هاي للسفره
حسن: حريمات عبالي حسيتي على نفسج
ضربته عل جتفه
والله انته متستحي
حسن: اني شعندي غيركم صدكيني تجي عليه ايام اتمنى متخلصين كليه حتى لتتزوجين وامير يدعي علينا لان يشوف على حقيقتج
ضحكتله ضحكه باستهزاء
يلا اطلع برا اريد اكمل شغلي
طلع وبقى الباب مفتوح
اووف ياربي شوكت يغير هاي العاده ابد مياخذ الباب ورا بس يعرف يدفر
حسن من النوع الخجول ميبين مشاعره صح عنده لسان بس بحياته ميكول كلمه حلوه للمقابل وهو صعد حتى يراضيني بس بطريقه غير مباشرة هو اصغر مني عمره 20 سنه هسه ثاني كليه ولحد هذا عمره ميعرف شلون يحجي بالمواضيع الجديه
ثاني يوم الصبح كعدنه من وكت حتى نلحك على الطياره وجان البيت بس صياح كلها مضيعه غراضها اخر شي ابويه كال منا لنص ساعه اذا مخلصتو منروح وكلها صارت تركض بس حتى نكمل وخلصت النص ساعه واحنا باب البيت جاي نقفل البيبان وطلعنا
وصلنا لتركيا وتونسنا وطلعنا ورحنا للسوك نشتري غراض وهدايا اشتريت لامير عطر
جانت احلا سفره بس مجنت اعرف .....
وخلص الاسبوع بسرعه وبدون ما نحس
لمينا الجنط واحنه ضايجين شبسرعه خلصت السفره
بابا: يلا الصبح نرجع لاربيل بالطياره ومن اربيل نرجع لبغداد بالسياره
هنا كمنه نكمز من الفرح لان احنه منحب الطياره بسرعه توصل بالسياره احلا نشوف مناظره حلوه واي مكان يعحبنا ننزل بي
نزلنه باربيل حتى ناكل ومن خلصنا اكل كلهم صعدو بالسيارة بقينه اني و حنين وجود نطك صور وهمه مشغلين السيارة وجاي يصيحون علينه حتى نصعد وهنا صارت شغله كلبت حياتي كلها اجتي سيارة سريعه ضربت سيارتنا والسيارتين وكعو من الجبل من الصدمه معرفنه شنسوي ضلينه نصيح حتى يجي واحد يساعدنه و نزلنه الجبل وراهم وشفت السيارة جاي تحترك كدامي واني مااكدر اسوي شي وهمه يعيطون بنصها الى ان طكت السياره بيهم وكلشي راح وراها بدقيقه وحده صرت يتيمه ام واب ومبقى الي اخ واختي فجاءة الكه نفسي وحيده ماعندي احد الدنيا صارت سوده بعيني ومااكدر اصدك الي صار وكلساعه احسب روحي جاي أحلم وهسه امي تكعدني تكلي كومي وصلنه للبيت اهلي احتركو كدامي واني مكدرت اسوي شي ضليت اباوع عليهم من بعيد ياريت لو جنت وياهم بالسيارة عالاقل جان متت وياهم وارتاحيت من ورا هاي الحادثة كرهت الصور لان لو مو الصورة جان هسه ميته ويه اهلي اصعب شي بالعالم انو تشوف الي تحبه يتاذى بس متكدر تسوي شي اني أربعة احبهم جانو يحتركون كدامي واخوي حسن يصيحني واني واكفه مصدوومه مسويت شي شعور صعب كلش
اجتي الشرطه والاسعاف بعدما كلشي خلص طلعوهم وخلوهم كدامي وجان اشوف جود يركض ويصيح
ماما لتعوفيني اني احبج ماما والله بعد مااضوجج بس كومي حنين واكفه وتحاجي ابويه:
بابا انته رحت وين اروح المن اشكي من احتاج شي وين اروح بابا الله يخليكم رجعو انطيكم عمري كله بس رجعو بابا جنت متخلينا اني ورهف نطلع وحدنه حتى لو للاسواق وهسه انته عفتنه بهاي الدينا وحدنه شلون تقبلها كلبك شلون ينطيك تعوف بناتك وحدهن
وهاي كله اني واكفه اباوع عليهم وبعدني ممصدكه انو الي صار حقيقة.
اجتي الشرطه تحقق ويانه بخصوص الحادث وشلون صار الحجي يطلع منه بالكوه وسالوا اذا عدنه احد نخابره او ندك عليه حتى يجي ياخذنه ودكيت على امير و محجيت اي شي وياه الشرطه هي حجت وياه ومعرفت شنو حجو وشنو كالو صرت عبالك مو بهاي الدنيا . وبعدين نقلوهم للمستشفى حتى يعرفوهم لان جسمهم كله محترك ميبين منهم شي ومو بس همه جانو جان وياهم السياره الثانيه هم بيها ثلاث اشخاص وكالو باجر تعالو استلموهم وخلونه ننتضر بالقسم لحدما يجون بيت عمتي.
اجتي عمتي ركض تكول وين اخويه انتي واختج بومات على امجن اكلتو راس ابوكم وارتاحيتو لو الله ماخذكم انتو هم ومبقي اخويه واني مجاوبتها و بس ابجي .
وراها اجه امير هو وابوه بعدما شوفوهم المستمسكات للشرطه انو همه بيت عمتي وهذا زوجي حتى يخلونه نروح وياهم .
ورحنه بقينا بفندق ذيج الليله
بالليل محد من عدنا نام كللكم تعرفون شعور اول يوم بعد موت شخص عزيز شلون لو جانو اربعه واني كاعده اخذتني نوومه بدون مااحس من التعب وجان احلم بامي
رهف ليش تبجين ماما
رهف: ماما انتي بعدج موجوده مرحتي
امي: ومنو كلج رح اروح واعوفكم اني امكم حتى لو متت رح ابقه وياكم مراح اعوفكم
رهف : جنت اعرف اني جاي احلم و هسه كعدت من الحلم
امي : لا ماما انتي اقوى من هاي الصعوبات هذا واقع ولازم تتقبلي واحنه متنه وبعد مموجودين بهاي الدنيا بس اكيد مراح نعوفكم كلما تحتاجين تحجين ويايه رح تلكيني يمج احجي وابجي شكد ماتردين بس مو كدام حنين وجود لان همه صغار بعدهم وهاي الحقيقه صعبه عليهم حاولي تصيرين قويه كدامهم لان انتي هسه مسؤوله عليهم حاولي تواسيهم وتخففين عليهم،
رهف: واني منو يخفف عليه كلبي محترك وضميري يانبني لان ماساعدتكم وخليتكم تحتركون وحسن بقه يصيح عليه بس اني مسويت شي
امي: هذا قدر الله وصار جان مكتوب علينا نموت بهيج يوم حتى لو ساعدينا جان متنه بغير طريقه محد يكدر يغير القدر وانتي كلما حسيتي نفسج صرتي ضعيفه اشكي همج الي اني اسمعج ورح اجاوبج بس رح تسمعين جوابي بكلبج
رهف: يوم يوم ماما......... وين رحتي ماما تعاي الله يخليج
وفزيت من النوم واني اصيح امي وشفت حنين وجود هم نايمين من التعب والبجي بس شلون يشهكون حتى وهمه نايمين وطبيت للحمام وكعدت ابجي وبقيت ابجي للصبح الي ان طلعت الشمس وكعدتهم حتى نروح نستلمهم وناخذهم للنجف قبلما تغيب الشمس واجه علينا امير دك الباب
كال يروح يستلمهم ومقبل اروح وياه علمود حنين وجود
المهم قنعني ابقه بالفندق انتضرهم.
واجوي علينه بكيه اخذناهم ورحنه دفناهم
ورجعنه لبغداد بسرعه لان كالو هسه تظلم الوضع جان يخوف بوكتها و كسرنه الباب لان ماعدنه مفاتيح المفاتيح بقت وياهم وقت الحادث ودخلت البيت ظلمه وحشه وهدوء وملابس حسن مطشرات بالكاع لان جان دائما اخر شي يتحضر وبسرعه ركض يكمل كلشي ويبقى غراضه بالكاع لاول مره الم ملابسه بدون ما اتعاجز لان عرفت هاي اخر مره الم غراضه ورا. كعدت المهن ويه كل قطعه ملابس ارتبهم احضنها واشمها وابجي. اجتي حنين كعدت يمي ترتب الملابس وتحجي تاريخ كل لبس بيهن وشلون اشتراه وشوكت اخر مره لبسها و هي تبجي.
ومااحس الا صوت عياط ومن اركض اشوف جود جاي يبجي على صورت امه اسوء شي بالدنيا انو انته تواسي شخص انته تمر بنفس المصيبه ومااعرف شنو احجي شلون اسكته اذا اني بهذا عمري ابجي لان امي عافتني وراحت شلون وهذا طفل خليته بحضني واني امسح على راسه لان مااعرف شنو احجي
عمتي بقت يمنه بالليل هي وعمتي شيماء وعمتي ام امير هي صح مجانت تحبنه بس جانت تحب ابويه هوايه لان جان احن اخ عليها من بين اخوانها والليل كله اني اسمع صوت بجيها وسمعتها تكول صدك اليوم صرت يتيمه وراك خويه تعجبت عليها من سمعتها لان ولا مره سامعتها هي ضعيفه وتبجي جنت دائما اشوفها قويه ومتبجي والي يحجي وياها ترد عليه بعشره
واندك الباب وعمتي طلعت جان امير جايب وياه اكل من برا وكال ادري بيكم مماكلين
رهف: والله مالي نفس اكل شي
امير: اذا مو علمودج علمود حنين وجود
وعمتي راحت جابت صينيه مواعين حتى تصب الاكل وكالت روحي صيحيلهم واني اشوف ام امير وين ودخلت عل حنين جانت تبجي وكتلها تعاي اكلي كالت مااريد مو جوعانه كتلها علمود جود خطيه ترى بعده صغير وهسه اذا يشوفج متاكلين هو هم مياكل وقبلت نزلت تاكل ورحت يم جود
جود: خاله شلون اكل وامي مااعرف ماكله لو جوعانه
رهف:تريد ماما تاكل من نفس اكلك ادعيلها عل الاكل واقرالها سوره الفاتحه حتى يوصللها هذا الاكل
قبل ياكل ورحنه تعشينه وامير كال احنه رح ننصب الجادر من هسه حتى الصبح العالم من تجي ماننخبص وانتو هم نامو ارتاحو باجر وراكم تعب واصعب نومه جانت ذيج الليله نمنه بغرفه ابويه وامي كلنه و اريد انام وارجع اتذكرهم وابجي واني اسمع ونه حنين بأذني لو جود الي نام بحضني ذيج الليله وايدي تبللت من دموعه وهو ونايم يجر حسره اوووف شنو الكلام الي لازم ينكال حتى يزيح همنه وياه ونرتاح شويه وبقيت ادعي انو الله يسحب هذا الحزن من كلبهم ويذبه عليه والله الاصعب من فراقهم هو شوفت حنين وجود بهاي الحالة
ومحسيت عل روحي شلون وشوكت نمت للصبح.
الصبح اجوي عمامي وخالي وخالاتي للبيت
اني من شفت عمامي مبقه عقل براسي وكلت لعمتي ام امير هذوله شيسوون هنا
عمتي: اني خابرتهم
رهف: عمه انتي تعرفين ابويه علاقته مو هلكد وياهم
عمتي ام امير: حتى لو لازم موجودين بالفاتحه العالم شتكول علينه اذا اجوي وماكو احد يعزو
رهف: هذا خالي موجود بس المهم مااريد اشوف اخوتج
عمتي ام امير: هاي امج علمتج مو تفضلين خالج عل عمامج
رهف: عمه اولا امي ماتت الله يرحمها ماكو داعي كل شويه امج وامج وثانيا ولتضوجين عمه بس ظفر خالو يسوه عمامي كلهم ابويه وكع بشده محد وكف وياه بس خالي وانتي الي جنتي شاهده عل هذا الشي شنو الفايده يوكفون بفاتحته وهمه من جان عايش ناسين وجوده
عمتي: اسمعي لسانج صاير طويل ينرادله كص بس مو هسه ورا الفاتحة وعمامج رح يبقون ان رضيتي وان مارضيتي
اني بعد محجيت شي مااريد اسوي مشاكل بس تخلص الفاتحه حتى عمتي ترجع وارتاح بعد
اجوي هوايه عالم ناس اعرفهم وناس مااعرفهم وناس كاعده عل صفحه جاي يسولفون ويضحكون و ناس تحجي عل فلان وعلان حسيت صدك انو احنه عايشين بعادات وتقاليد متسوه لان التقليد يمنه انو نروح نعزي لان هذا واجب علينه مو نروح لان احنه مقهورين صدك عليهم
وسمعت وحده تحجي ويه عمتي ام امير تكوللهم خطيه ذولي ايتام شراح تسوون بيهم
عمتي: والله يجوز البنيه ناخذها بدون عرس ولا زفه و اختها وابن اختها لو ناخذهم ويانه لو عمامهم ياخذوهم
المره: الله يعينج عيني والله لازم تشيلين مسؤليتهم وانتي ممجبوره
عمتي : شسوي بعد
هنا صفنت لحظه شنو شراح تسوون بيهم شنو احنه غراض شنو نزفها لابني شنو ناخذهم ويانه ومن شوكت احنه نصير عاله عل احد من جان ابويه عايش محد جان يياوع علينه نظره وهسه العالم تباوع علينه نظره شفقه وهنا قررت اراجع قراراتي و ارجع وارتب كل الامور بس مو هسه ورا الفاتحه
بالليل ورا ما راحو العالم اجوي عمامي عود ياخذون بخاطرنه ويعزونه ردت احجي بس اني جنت تعبانه من كلشي حتى النفس الي جنت اخذه جان يتعبني مكدرت احجي شي اخذت حنين وجود بدون مااحجي اي كلمه عفتهم ورحت عمتي شيماء كالت خطيه مصدومين من الي صار وميحجون ويه احد
وعمي كال سهله وراحو وعمتي شيماء هم رجعت لان رجلها مريض ويريد واحد وياه
واجه امير سالني اذا محتاجه شي كتله اريد احجي وياك انته وعمتي هسه انزل للاستقبال واخذت فلوس ونزلت وراه و انطيت الفلوس لعمتي وكتلها هاي فلوس الفندق و التغسيله ومال الفاتحه عمتي وامير ضاجو
عمتي : انتي متستحين جاي تعاملينه عل انو احنه نشتغل يمج ولا جن الميت اخوي
رهف : عمه والله ادري شكد تحبين ابوي واني مااقصدت اي شي بس انتي اكثر وحده تعرفين ابوي مجان يحب احد يصرف عليه او يسويله شي واني مااريده هو وجوه التراب ينقهر لان الفاتحه مالته مو بفلوسه
امير : بس هاي الفلوس مو الج وحدج لاختج هم وانتو وراكم هوايه مصاريف اكيد مراح اقصر وياكم بس حتى لو يجي يوم تحتاجون
رهف: الحمد لله ابويه عاف خير هوايه ورا وان شاء الله منحتاج
عمتي اخذت الفلوس ومحجت شي كالت رح انام وامير هم كال رح اروح بعد
الليل كله ما نمت واني جاي افكر شلون ابقه ويه حنين وجود بدون ماا اسبب احراج لاحد او انضايق احد ......
اخر يوم الفاتحه بالليل دكيت عل امير وكتله اريد احجي وياك تكدر تجي لبيتنا كال هسه بس نلم الجادر واجي
مطول ساعه واجه كال لامه اريد احجي ويه رهف وحدنه
كعدنه بالحديقه نسولف
رهف: امير مااريد نكمل سووه خلي نفصخ الخطوبه
أنت تقرأ
حكاية رهف
ChickLitفتاة مدلله تعودت على الحب والحنان لتستيقظ فجاءة على حلم مؤلم وهي تشاهد فقدان اعز الناس لها وما بين الم الحاضر وذكريات الماضي نسيت ان تعيش للمستقبل فهل تعزف اصابعها اوتار الحب من جديد ام ان اصابع الماضي تلاحقها
