الطرقات مضاءة بشكلٍ جيد
اذاً لماذا الجميع تائه...؟
.........
رهف: امير مااريد نكمل سووه خلي نفصخ الخطوبه
امير: شكو شصاير ليش هيج تحجين شفتي اي شي من امي حجت وياج اي شي
رهف: لا بالعكس اصلا الي شفته منكم بشكم يوم الي راحت محد يسووي
امير: لعد شكو
رهف: امير انته تعرف بيه اني شكد احبك وجنت اعرف من البدايه عمتي متحبني بس علمودك قبلت بس هسه الوضع اختلف اني صرت مسؤوله عل حنين وجود مااكدر اخليهم وحدهم و مراح اخلي عمامي ياخذوهم لان اعرفهم رح يرجعون جود لابو لان يكولون هو مو ابنه شلون تريد اتزوج واجي وياك واعوف هاي الهوسه ورايه
امير: اصلا اني حجيت ويه امي علمودهم كتلها نجيبهم يعيشيون ويانه
رهف: شلون نجي يمكم واني باذني سمعت هالعالم تكول اني ممجبوره بيهم ورحت تشلين حمل مو الج انته تراضاها عليه اعيش عاله على احد...؟
امير: هسه شنو يعني تردين نفصخ
رهف؛ ياريت وبدون ماتعتب عليه انته شاب وبعدك صغير الف وحده تتمناك
امير: عادي انتضرج لحدما حنين تكبر وتتزوج وجود عادي بعد يعيش ويانه
رهف: امير اني مااتشاقه وياك اني احجي صدك حنين بعدها صغيره وجاي تدرس يجوز خمس ست سنوات يلا تتزوج
امير: خلي تصير عشر سنوات اني ما عاندت امي و وكفت بوجهم علمودج حتى يوم الي تحتاجيني بيه اعوفج واروح
رهف: امير ليش تخليني ا
امير: اشششش كافي حجي روحي نامي بعد تعبتي واني هم اروح مع سلامه
عافني وراح شسوي شنو طالع بيدي رح ينظلم ويايه و عمتي اذا سمعت بهاي السالفه رح تاكل بكلبه اكل اوووف بابا اوووف ماما وين رحتو وعفتوني
ثاني يوم الصبح اجتي عمتي كعدتنه كالت عمامج يردوج عرفت ليش
كعدت حنين غسلنه وطبينه للاستقبال لا حجيت وياهم ولا سلمت كبل كعدنه وعمي كعد يسولف
انتو هسه بنات وحدكم ميصير تبقون بالبيت بدون رجال فراح اخذكم يمي انتي وحنين
حنين :وجود
عمي:جود اول وتالي هو مو ابنه غريب ورح يجي يوم و يرجع لابوه
حنين : مستحيل رجله عل رجلنه وين منروح ناخذه ويانه
اني لزمت حنين من ايدها وكتلها خلي يكمل وبعدين
كال وانتي مخطوبه هو فتره ورح تتزوجين من ابن عمتج وحنين تبقه امانه يمي لحدما يجي نصيبها
كتله كملت محجه شي
رهف: هذا هو حلك للموضوع
عمي:هذا احسن حل
رهف:تحلم تشوف خيالي اني واختي بيتك وجود مو غريب ابن اختي وهو كبر ويانه وابوي وامي همه مربي يعني تربيه اخوك واني اعرف انته رح تاخذ حنين منا تزوجها لابنك لان جنت تريدها لابنك وابويه مقبل ولا عبالكم الشغلات الي ابويه مجان يقبل بيها هسه من مات تردون تطبقوها علينه تحلمون ومن شوكت انتو تحبونه وتردون مصلحتنه جان اخوكم عايش جنتو تظلمو حتى الورث مال اهله تنازل علي علمود يريضيكم وهم مرضيتو مع انو محد منكم جان محتاج وهسه جايين تسوون روحكم جنتو تحبون ابويه ومقهورين عليه لعلمكم حتى بالفاتحه مردتكم موجودين بس عمتي مقبلت احجي ولخاطرها سكتت
عمي عاط بيه ذيج العيطه فززنه
عمي:انتي تربيه امج احنه شخذنه منها حتى نستفاد منكم
رهف:عل الاقل احسن من عدكم وكفت ويه ابويه هي واهلها بالوكت الي انتو عفتو
واجه ضربني راشدي قوي بس عمتي شيماء لزمته مقبلت وعاطت بيه
عمتي شيماء: عوفها ليش تضربها
عصرت الدمعه بعيني واني لازمه خدي
رهف: لاعمه عوفي خلي شاف ابويه مموجود يكسر ايده مراح اكلك شي بس اكول حسبي الله بيكم وبكل واحد استغل موتت ابويه
وصعدت فوك حنين بقت واكفه
عمي: وانتي هم لحكي اختج
ظلت تباوع عليه نظره حقد
عمتي:صعدي هسه اني احجي وياهم
حنين: الله ياخذكم كلكم وارتاح منكم
و صعدت حنين
عمتي ام امير : البنات عوفهن اني اخذهن يمي بس هاي الفتره عمي: اي اخذيهن و ربيهن من جديد لان هذني تربيه امل شتترجين منهن
عمتي ام امير : أمسحها بوجهي هاي المره البنات بعدهن مقهورات هسه اني احجي وياهم
طلع عمي راح روحه بلا رجعه وصعدت عمتي ام امير فوك وضلت تصيح انتو شلون تحجون وياه عمامكم هيج انتو متستحون ومن هل الحجي اني مكدرت اتحمل وحجيت
رهف: عمه انتي قبل اسبوعين جنتي يم امي تحجين عليهم و تكولين مو خوش اخوه ومصلحجيه وهسه جاي دافعين عليهم عمه انتي تدرين انو اخوج لا يحبنه ولا يفكر بينه كل الي يريده فلوس ابويه و يريد ياخذ حنين يمه حتى يزوجها لابنه وياخذ الورث مالها مثلما سوو بمرته منتضر يطلع الاربعين مال ابوها ودزه لابيت اهلها علمود الورث اني مرايده اختي ادزه هناك
عمتي: لعد تعالو كعدو يمنه بالبيت اني مااكدر اعوف البيت اكثر من هيج
رهف : حنين نزلو انتي وجود تريكو عندي حجايه ويه عمه
عمه اني قررت افصخ خطوبتي من امير
عمتي: ليش شكو شصاير بينكم
رهف: عمه اني مااريد اظلم حنين وجود عل حساب راحتي و مااريدج انتي تشيلين مسؤليه مو الج ولا اريد اظلم امير ويايه اني مااكدر اتزوج الا ازوج حنين
عمتي: وامير يعرف بهاي السالفه
رهف: اي يعرف بس مقبل واريدج انتي تقنعي
عمتي : انتي مو تحبين امير شلون رح تتحملين تشوفي ويه غيرج.
رهف :اذا هو سعيد اي و اني تحملت الاصعب من هاي مااتحمل هاي الشغله
عمتي : وانتو شلون رح تعيشون وحدكم بالبيت
رهف: لازم نتعلم شنسوي مااريدهم يصيرون عاله عل احد وهذولي بس الي بقولي من ريحه اهلي
عمتي عافتني وراحت بقيت وحدي طبيت جوه اللحاف بجيت بحركه طلعت قهر كلبي كله وكعدت غسلت وجهي ونزلت اتريك وياهم .
رجعت عمتي للبيت بدون ماتسلم علينا وعمتي شيماء هم رجعت واني صار عادي يمي اي واحد يزعل اهمشي حنين وجود
ساعه واندك الباب باوعت من الزرف شفته امير فتحت الباب جان صاير عصبي وسحبني من ايدي للحديقه وكلي شنو حاجيه ويه امي
رهف : محاجيه شي وياها بس كتلها نفس الي حجيته وياك البارحه
امير: اني مو كتلج تنسين هاي السالفه
رهف: مراح انسه وانته ميصير تظلم نفسك ويايه اذا انته تقبل فلا اني ولا امك نقبل
امير: مو هيج انتي خليتي لامي حجه عليج
رهف: امير اني تعبانه ومابيه حيل والله تعبت الله يخليك لتزيدها عليه
حضني بكل قوته
امير: كل هالتعب بيج وتريدين اعوفج واتزوج غيرج لتنسين حجايه ابوج من كلي اني زوجتها رجال ميعوفها يكون الها سند بعدي تريدين ابوج يزعل مني خالو جاي تشوف بنتك اني معليه
كمت اضحك ومسحت دموعي وتذكرت بابا راح ورجعت ابجي بحركه حضني
امير: ابجي بعد لتضمين دموعج عليه اني رح ابقه وياج وانتضرج الى ان تجين انتي وتكولين امير خلي نتزوج بعد وامي معليج اني اعرف شلون اقنعها مثلما قنعتها قبل هاي المره
رهف: بس اني اخاف لا تكرهني اكثر من قبل
امير: لا لتخافين ميصير شي وثاني مره قبلما تفكين حلكج بحجايه تخصنة كدام امي كوليلي لان هاي المره سامحتج مره الجايه اشك حلكج
رهف مسحت دموعي: يلا تعال تريك ويانه
امير: لا اريد ارجع غراض الفاتحه
رهف: يلا ماشي روح الله وياك
طبيت جوه ولكيت حنين واكفه بالباب جاي تسمع كلشي
حنين: انتي شلون تسوين هيج شي بدون ما تحجين الي ومن شوكت انتي تضمين عليه هيج سوالف
رهف: حنين ترى مالي خلكج عندج ش بي حظ كولي ماعندج عوفيني وحدي
حنين: اي عندي اني رح اروح يم عمي رسول اكعد
رهف: شنو تخبلتي اكو واحد يروح للموت برجله
حنين: اي اني يعني انتي عادي تعوفين امير الي وكفتي بوجه امي الله يرحمها علموده بس اني ميصير اروح لهناك علمودج
رهف: انتي شنو نسيتي جود مو عمج كال اخذ حنين وجود نرجعه لابوه وبعدين عمج ميحبج ولايحب ابوج هو يحب فلوسه ولتخافين اني وامير اتفقنه على كلشي مراح نفصخ الخطوبه انتي اهتمي بروحج
حنين: اكيد مراح تصير مشكله بينكم بسببي
رهف: لتخافين ميصير شي يلا تعالي نكمل ريوك
مر هاي الشكم يوم بصعوبه لان ممتعودين نبقه وحدنه بالبيت والبيت كله حزين وجانت عمتي شيماء تجي يمنا شويه وترجع هي ماعدها جهال بس رجلها واخوه بالبيت هي كالت مااكدر اخذكم يمي لان حماي كاعد ويايه بس جانت كلش تتعب خطيه تكضيها رايحه جايه لبيتنا النهار كله و كلش جنت انقهر عليها واكثر من مره كتلها لتعبين نفسج وتجين اذا اريد شي ادك عليج بس مجانت تقبل، ياريت لو اخوانها ماخذين منها شويه ومن حنيتها علينا
جنه من ناكل كل يوميه اسويلهم اكله جان يحبوها اهلي ونقره عليه الفاتحه الهم حتى يوصلللهم الثواب وهم طريقه حتى اقنعهم ياكلون و لينسوهم بالدعاء ابد
و مبقت للعطله غير يومين وتخلص و لازم نرجع للدوام بس المصيبه شلون اقنعهم يرجعون للدوام اذا اني ماريد اداوم لان الي مرينا بي بهذا الأسبوع مو شويه اتعس اسبوع مر بكل حياتنا
جنه كاعدين ناكل وكتلهم ترى الاحد دوام حتى نشوف شنو النقص وباجر نروح للمكتبه
حنين: ممحتاجين شي الله يرحمهم مجانو يقصرون بشي قبلما نحتاج الشغله يجيبوها النه
و انته جود شنو عندك نقص
جود: اني مااريد اداوم مااروح للمدرسه
رهف: ليش حبيبي متريد داوم
جود: مااريد اداوم اريد امي
حنين: ماتذكر شلون ماما جانت تضوج من تكوللها مااداوم وهسه تسمعك تكول هيجي تزعل منك
جود: اصلا اني زعلان منها اذا تريدني اروح للمدرسة خلي هي تجي تاخذني
رهف : جود ماما راحت وبعد مترجع وبعد متشوفها بس هي تشوفك وتفرح من تروح للمدرسه
بقينا الليل كله نقنع بي اني وحنين الى ان اقتنع
واجه يوم الأحد الصبح خليت منبه ب4 دك المنبه طفيته وكلت بعد وكت امي بعدها مكاعده هسه هي تجي تكعدني ثواني وتذكرت انو امي راحت بعد كعدت بسرعه لان تذكرت ورايه هوايه شغل بسرعه كعدت وغسلت وبديت اسوي الجدر حتى من ارجع ماعندي شي
صح جنت مدلله بزمن اهلي بس جنه دائما نشتغل بالبيت وحتى طبخ جنت اطبخ وياها واتعلمت كل شغل البيت منها جانت تكول مهما دللتكم يمي يجي يوم ورح تتعلمين
خليت الجاي عالنار و طبيت سبحت وطلعت شفت حنين كاعده جاي تحضر الريوك و كعدت جود وتريكنه بسرعه و بدلت لجود و خليت مصروفهم عل المخاد مالتهم مثلما جان يسووي ابويه واجوي الخطوط مالتهم وراحو واني هم بسرعه لميت البيت وبدلت و دكيت على السايق واجه ياخذني وصلت للكليه اول ما دخلتلها اختنكت مااعرف ليش دخلت للقاعه انتضر المحاضره اجوي صديقاتي محد جانت تعرف الي صاير ويايه واجوي يسالوني هاا سلامات شو لابسه اسود وعيونج طابه جوه و وجهج اصفر احجي شكو كتلهم اهلي ماتو وبديت ابجي وطلعت من القاعه ولحكتني رغد للحديقه الي ورا القسم بقيت ابجي بالنص ساعه وهي كاعده تباوع عليه واجوي بقيه البنات يحجون ويحاولون يواسوون بس بقيت ابجي حسيت بعد اكو كووومه بجي بداخلي ممطلعته أريده يطلع كله حتى ارتاح وراها بدو يحجون ويايه منو مات ومنو بقه وشلون عايشين هسه وشراح نسوي ومن هذا الحجي يعني حتى اسكت شويه وجابوها عل المحاضره والدروس والتقارير الي عدنه وكل وحده صارت تحجي مواقف وشغلات صايره وياها ارتاحيت شويه وحسيت نفسيتي تغيرت صدك يكولون الاصدقاء نعمه وهسه اكيد جود وحنين هم نفسي غيرو جوه طلعو من اجواء البيت والحزن
وصارت وقت المحاضرة الثانية بعدما خلصت المحاضره الاولى وفاتتنه وطبيت المحاضرة
المحاضره الأخيره مكملتها للاخير لان لازم قبل ال2 اني بالبيت لان جود وحنين مدارس اهليه ب2 يطلعون
رجعت للبيت بسرعه قبل لا يرجعون وبدلت بسرعه ونظفت البيت وحميت الجدر و انتضرتهم واول شي رجع جود و صرت اسئله شنو اخذتو ووشلون جان اول يوم الك بالمدرسه و ضل يحجي شلون تشاوف هو وجماعته
واجتي حنين بسرعه بدلت وتغدينه و بديت اقري جود وجنين كعدت تقره الى ان صارت ب7 بالليل كمل جود وكمت احضر العشه اني وحنين خلصت العشه نومت جود يم حنين وكعدت اقره وقريت المحاضرة الأخيره الي مكملتها ومكدرت افتهم شي حاولت شكد بس بدون فائدة اخر شي تعبت وعفته ب1 نعست ورحت نمت ونفس الروتين الصباحي تكرر ويايه و وصلت للجامعه رغد شرحتلي المحاضرة الي مفتهمتها وزين عرفته وهي كالت بعد كل يوميه اسجل المحاضرة حتى ثاني يوم تشوفيها و بقيت على هذا الروتين للاسبوعين وراها بدت توصلي انذارات وتبليغات و اني عفتها كلت مراح يسوون شي .
الى ان اجه يوم اجه تبليغ اليه بمراجعه القسم لامر هام عرفت علمود الغيابات ورحت للقسم و ضل الدكتور يحجي شلون اغيب ومااحضر واني طبيه وكل معلمومه تفوتني هاي حياه بشر
رهف: دكتور اني اي شي ياخذو بالمحاضره جاي اخذه من صديقتي واقراه
الدكتور: بابا ميصير وين من تنشرح المعلومه الج من قبل دكتور و وين من تاخذي من زميلتج
رهف: دكتور ظروفي متسمح ابقه لل2 ونص
الدكتور: انتي اذا تعرفين ظرفج ماكو داعي للمجازفه و دخلين طب باجر مدخلين للكليه بدون عذر يبين سبب غياباتج
اني: دكتور اهلي توفو
الدكتور: هذا هو سبب استهتارج بالدوام لان ماكو فوك راسج رقابه انتي حتى دروس التطبيقيه متحضرين
رهف: دكتور رجاءً اني طالبه شاطره جنت وتكدر تسال كل الدكاتره الي درسوني بالاربع سنين الي فاتت وحتى الكورس الاول بس اني هاي الفتره مريت بظروف انجبرت حتى اتعايش وياها اغيب عن اخرر محاضره اني لازم اكون بالبيت قبل لا يجون اختي وابن اختي الميته وشلون ارجع للبيت ب3 وهمه يرجعوون ب2
الدكتور: شوكت توفو اهلج
رهف: قبل شهر تقريبا
الدكتور: جيبي وياج شهاده الوفاه للوالد و الوالده و جنسيه اختج وابن اختج و تعالي حتى اسويلج عذر يم العماده وماتنحسب عليج غيابات
رهف : ماشي شكراً دكتور
طلعت من الدكتور ركض بس اريد اطلع لان تاخرت عالبيت وركض ركض طلعت وزين وصلت للبيت قبلهم
وثاني يوم اخذت المستمسكات للدكتور وكلي تعالي عليه قبل لا طلعين وانتضرت تخلص محاضراتي بسرعه حتى اشوف شصار ويه الدكتور
و بنهاية الدوام رحت للقسم وشفت الدكتور وكلي العميد واقف عل طلبج بس لازم هذا الشي ماايأثر على دراستج لان انتي طبيه يعني اي معلومه تفوتج يمكن يكون بيها حياه انسان
كتله ان شاء الله احاول دكتور
متصورون الفرحه مالتي
وصرت المحاضرة الي ماافتهمها اتفق ويه دكتور الماده ادخل بمحاضره ويه غير قاعات
مرت شهرين تعبت بيهن كلش صرت مااشوف امير ولا اتصل عليه الا هو يدك عليه ومااحجي ويا هوايه لان لو جاي اقره لو جاي اقري جود بس هو جان كلش متفهم وابد مضغط عليه .
وخصلت الامتحانات و حنين هي جانت تقري جود اكثر شي لان موادها قليله حتي اني اقره
وطلعت النتائج والحمد لله نجحنه بس نجحت بقرار كلش انقهرت لان هاي اول مره انجح بقرار بس اني راضيه المهم نجحت منو جان يتخيل انو ننجح او نكمل هاي السنه اصلا
هسه اني صرت مرحله السادسه والاخيره
حنين صارت سادس بكلوريا هاي السنه
وجود صار صف رابع ابتدائي
قررت ارجع علاقتي ويه امير شويه لان هوايه ابتعدت عنه بهاي الفتره و دكيت عليه وحجيت وياه
امير:ليش ما نطلع صار هوايه مطالعين
رهف: مااكدر شلون اخلي حنين وجود وحدهم بالبيت
امير: لا شلون ناخذهم ويانه
مردت اكسر بي وخصوصا هو مقصر ويايه وتحملني هواية وكتله اوك
امير: باجر نتغدى برا
وكتلها لحنين عل الطلعه كالت روحو وحدكم كتلها لا شلون اعوفكم بالي يضل يمكم
ثاني يوم الظهر تحضرنه وكملنه واجوي هو وعمتي.
و طلعنه هو ضل صافن عليه الطريق كله ومن وصلنه للمطعم سالته
رهف:شكو صافن عليه متغيره وصايره مو حلوه
امير: رغم التعب الي بوجهج بعدج حلوه
وحجيت وياه واعتذرت منه لان بهاي الفتره صرت بعيده عليه
امير: ولا يهمج عادي اني ادري بيج وبظروفج
وجان تقاطعنه عمتي وتسال عل المحلات مال ابويه منو يديرها والوارد ماله شلون يطلعو اني جنت ناسيه هذا الشي ومو بالي ابويه عنده محلات ملابس هوايه افرع مو فرع واحد وجان كله هو يديرها بس صار فتره بيد العمال لان مااعرف شي عنها
رهف :عمه اني مااعرف شي بهاي السوالف لا حسابات ولا المحلات
امير : اكيد خالو عنده مستندات مال محلات تكدرين دورين ويه غراضه
ورجعنه للبيت فتحت الكنتور مال ابويه واخذت الصندوق مال اوراقه وفتحتها لكيت بيها كووومه اوراق ضليت ادور بالاوراق ولكيت الاوراق ونزلت انطيتهن لامير
امير:عندي صاحبي خريج تجاره اكدر اخلي عل المحلات وكل راس شهر يجيب الوراد
رهف: ياريت احسن لان اني مااعرف شي بالتجاره وملابس وهاي السوالف
امير: ميخالف اليوم احجي وياه
ثاني يوم العصر امير دك عليه
امير: الولد قبل وياخذ بالشهر 800 الف
رهف: عادي
امير: حضري روحج باجر الصبح اجيبج لبيتنا حتى تشوفي وتتفقون عل كلشي
رهف:اني مااعرف انته سووي كلشي و اتفق وياه وانته هم استلم منه الوارد
امير: اي طبعا اني رح اخذ منه الفلوس بس انتي هم لازم تشوفي والاتفاق يصير كدامج
رهف: ماشي دك عليه الصبح قبل لا تجي حتى اتحضر
مرت الايام واحنه على هاي الحاله عايشين ونريد بس اليوم يخلص حتى كلمن يروح لفراشه يبجي حياتنه صار بيها روتين ممل نكعد الصبح نكمل شغل ناكل نكعد شويه نسولف وراها كلمن يروح لفراشه يبجي الى ان يتعب وينام جنت كل يوميه الصبح قبل لا اروح للدوام اشوفهم واشوف المخاد مالتهم صايره مي من البجي مااعرف شنو اسويلهم لو اكو شغله بالدنيا اكدر اسويها الهم حتى يخفف عنهم الوجع والله اسوي حتى لو جان الثمن حياتي صار وجودي وعدمه واحد شلون احقق وصيه امي
شلون اني اخلصهم من هذا الوجع
بالعطله اتفقنه اني وشكم طالب وطبعا رغد ويايه نسوي فتره تدريب صيفي نقدم باي مستشفى حتى نتعلم وايدنه تاخذ وهالشي احسن الي لان بالدوام مااكدر كل مره اروح وياهم.
جنت اروح للدوام يبقون وحدهم بالبيت وكعد حنين تقفل الباب ورايه و وكلساعه ادك عليهم حتى اطمن عليهم خوفي مو من الحرامي الغريب لا خوفي من الحرامي الاقرب عمامي صرنه بزمن نخاف عل البنات من عمهم بعد ما جان حاميهم
الى ان يوم من الايام رجعت للبيت اريد افتح الباب بالمفتاح شفته مفتوح الف فكره وفكره صارت براسي دفعت الباب ودخلت بسرعه.....!!
أنت تقرأ
حكاية رهف
Chick-Litفتاة مدلله تعودت على الحب والحنان لتستيقظ فجاءة على حلم مؤلم وهي تشاهد فقدان اعز الناس لها وما بين الم الحاضر وذكريات الماضي نسيت ان تعيش للمستقبل فهل تعزف اصابعها اوتار الحب من جديد ام ان اصابع الماضي تلاحقها
