حين يعصف العشق❤

2

الجزء الثاني

~~~~~~🌿🌿🌿🌿~~~~~~

بالرجوع لطاولة البكلاوات(أماني، هالة، أميرة، أسيل آيات والسمحة الصغيرونة بيسان)

الجو كله كان ضحك وهدرزة وبصارة..
وأكثر شي كانوا مستمتعين بيه هدرزة بيسا الحلوة ومرحها وبراءتها ،،
ومواقفها الكوميدية مع صاحباتها في المدرسة...
هالجو الحلو نساهم كل الطاقة السلبية
إلي كانوا جايين بيها ..
طلبوا عصير طبيعي ونوع كيك ..
وفي عز تهدريزهم بيسا كانت تبي تمشي للحمام ،،
قالت لأمها إلي كانت تبي تمشي معاها لكن أميرة
قالت لها أنها بتمشي معاها ..
مشوا الاثنين للحمام ..
ولما جو طالعات بيسا كانت تمشي بسرعة وبدون تركيز
وهيا ماشية لطاولتهم خبطت في رجل راجل كانت
عنده مكالمة مع مرته
إلي كان عارفها ناوية تعيط وتعارك بصوت عالي زي عادتها في الفترة الأخيرة كل
ماتتصل بيه لما يطلع من الحوش
ولأنه ميبيش إلي معاه عالطاولة يسمعوا
لمكالمته معاها وعياطها اضطر يستأذن منهم يرد عليها في البلكونة متع المطعم..

المكالمة كانت مقتضبة جدا ومختصرة تمت بأنه عيسى سكر على صابرين الخط لما متحملش عياطها وأسلوبها العصبي في كلامها معاه

وحط هاتفه عالطيران لأنه لو خلاه ممكن توصل حتى ل50 مكالمة في أقل من نصف ساعة هذا غير المسجات المكررة وإلي بدت مصدر إزعاج وخنقة بشكل كبير بالنسبة لعيسى

أما بيسا لما خبطت في عيسى نهضت عيونها معاه شافاته كيف باين على وجهه التعصيب خافت منه وقعدت تقول بسرعة بارتباك وخوف : آسفة يا عمو .. آسفة والله تسامحني وراس اميمتك وراس... وراس عمك وراس خالك تسامحني..

شدت يده الكبيرة بإيديها الاتنين الصغيرونات وقالت وهيا داهشة وكلامها سريع وفي جرة بعضه:
ماما قالت لما نغلطوا في حد ولا .. نتأسفوا لن يسامحنا ومعش يزعل والنبي والله وراس خالك سامحني
ونفخت بصوت عالي وقالت ... دهشت...

عيسى سبحان إلي غير حاله للنقيض..
ملامح وجهه ارتخوا بعد الضغط الشديد إلي كان صايرله..
وبان فيهم الاندهاش بالإضافة للملاك البريء لأنها كانت تترجا فيه لأنها جت في طريقه..
شاف فيهم صورة لملامح أدمنها في يوم من الأيام ملامح كبرت معاه وكبرت في قلبه ومنه وليه

قعمز ركبة ونص قدام بيسا وقعد يسمح بإيده على إيد بيسا إلي شاداته بيها:

معليشي يا سموحة ماصار شي...

أميرة إلي كانت على بعد خطوتين منهم ومتابعة للموقف وهيا ميتة بالضحك على بيسا قربت منهم ومسحت على شعر بيسان::
آسفين ياخوي مع أنه بيسا قلبت لك على جو الشحاتين عالسيمافرو بش تسامحها
عيسى شاف لأميرة بابتسامة متفهمة وبعدها رجع التفت لبيسان وباس إيدها: شن اسمك يا حلوة؟؟