حين يعصف العشق❤

39

الجزء التاسع و الثلاثون

وفي جنح الليل بينما راجلها كان يغط في نوم عميييق
هيا كانت متكية جنبه و تتواصل مع فوزي بعد العشرات من التهديدات
فوزي إلي رجع لليبيا بالخفاء و ميندري عليه حد إلا أشخاص معدودين
مروح و هو حاط بين عيونه يرجع أماني لعصمته
تحت أي ظرف
و هو توا يهدرز مع حكمات عالفايبر و يقصقص فيها عن أماني و يعرف منها في آخر تحركاتها
حكمات: ( هالأيامات هذه كلها مقسمة الخدمة
مع البنت و الشاب إلي معاها ،،
هيا تخدم صبح و البنت تخدم من بعد الظهر للعشية ..
و الشاب يشد لعقاب الليل
و من لما تروح شبه معش تطلع دابها و داب بنت خوها شهادة و تساعد فيها في قرايتها)
فوزي : (و الراجل إلي جي يخطب فيها شن ردت عليه)
حكمات : ( مش قلت لك خوها مش حيقدرها..
صكرت رأسها و قالت منبيش نتزوج لذلك اطمن )
فوزي : ( من الناحية هذه أني مطمن .. أني متأكد أنها معش تقدر توافق يتصكر عليها باب دار هيا و لا أي راجل من ماكان يكون)
حكمات : ( كان نعرف شن داير فيها بس
لن مخليها ترعش هكي
و أي موضوع زواج يجيها تقعد ترعش زي الجريدة لن تصكره بكل)
فوزي: ( مدخلكش ألهي في روحك ..
و متنسيش قريب انفذوا إلي تفاهمنا عليه
و ليك الحلاوة لو صار إلي نبيه)
حكمات : ( ماشي قولي أمتى تلقاني جاهزة )
فوزي : ( مليح هي طيري توا مش فاضي)
و حكمات ضحكت بشر :
و أخيرا يا أماني الشياطين بنفتك منك
و من همك و أنتي قاعدتيلي زي عظم بو غصاص
و تلفتت على راجلها لقاته ناعس بعمق :
و أنت ارقد خليك راقد و راقد عليك الزمان
نوم الظالمين عبادة
و من محادثتها مع فوزي لصفحات بيع الأثاث
بش تختار صالون جديد تفرشه لوسط حوشها
بعد المبلغ الكبير إلي خداته مقدم
لتنفيذ إلي اتفقت عليه هيا و فوزي
و يستر الله منك يا شعشبونة 😔😔

🌿🌿🌿🌿🌿🌿🌿🌿🌿

يوم الجمعة 6 مايو
في فيلا منصور رزق الله راجل فريحة

سمر كانت ناعسة بالنوم
فاقت على رنة تليفونها مكالمة فيديو عالماسنجر
من رائد
كانت يا دوب قادرة تفتح عيونها
مدت يدها و فتحت المكالمة
و التليفون كاميرته موجهة للحيط و أول شي سمعاته صوت رائد إلي كان مليان بحب و حنية الكون :
سمورتي بنيتي السمحة صباح الحب يا عمري
سمر بعيون مغمضة و صوت يا دوب طالع:
صباح النور رائد
رائد : هيا يا قلبي وريني وجيهك السمح
و سمر لفت الكاميرا ليها
كانت عيونها منفخات و وجهها قعد معبي نوم
و شبه متبانش في وسط بطانيتها
: يانا عليا من بنتي السمحة كيف لافة نفسها
سمر : نعسانة يا رائد و الله
نحنا مغفيناش غير بعد الفجر
و عيوني مغمضات خلاص
رائد: باهي كيف ندير قوليلي رايفت عليك
و بعدين نا مش كيفك عاطل عن العمل ..
عندي موعد مهم بنعديله..
بس قلت قبل لا نطلع من داري نشوف وجيهك السمح و نصبح عليك
و سمر تكلمت مع ابتسامة من وسط قلبها:
حبيبي أنت أصلا .. و نا مرايفة عليك كل وقت
ربي يخليك ليا و مايحرمنيش من تصبيحاتك الحلوات كيفك
رائد : الله الله هاذينا كليمات يفتحوا النفس
خلاص حبي كملي نومتك
و نا نكمل شغلي و نرن نوعيك نحكوا شوية تمام
سمر : تمام
رائد : سمر أنتي بنيتي السمحة و حبي و نور عويناتي
و بعون الله حتكوني مراتي و حلالي و دنيتي كللللها يا عمري .. باي
و صكر الخط
و سمر دقات قلبها كانوا كأنها في ماراثون
من يوم إلي عرفت كل شي عن حالة رائد الصحية و النفسية و كل شي بينهم تغير
يومها بعد لا انهارت سمر بعد الكلام إلي حكاته الدكتورة سارة ليها ..
رائد و الدكتورة سارة حاولوا هلبا يهدوها
و بعد لا ارتاحت شوية قعمزوا الإثنين جنب بعض
و الدكتورة سارة نصحتهم أنهم يقعمزوا
و يتكلموا بهدوء عن مشاعرهم و حبهم لبعض
و يشوفوا هل حتقدر سمر تتحمل توابع علاقتها برائد و لالا. .. و تقدر تعيش معاه كل مراحل مرضه و مضاعفاتها
أو حتتراجع و تبعد عليه
سمر توا مخطوبة و مش بالساهل تفسخ خطوبتها
و أهلها مش بالساهل يوافقوا على رائد و الأسباب واضحة و معروفة
يعني فيه هلبا تحديات تمنع الإثنين
أنهم يكونوا مع بعض
هذا غير فوبيا الفقد إلي يعاني منها رائد
و إلي ممكن تأثر سلبا على علاقة سمر برائد
لكن سمر مكانش عندها غير رد واحد
أنها تحب رائد و تموت في تراب رجليه
و مستحيل تتخلى عنه بعد سنين و سنين
من حبها ليه في صمت و كتمان ❤️❤️
يومها لما روحوا للفيلا متكلموش هلبا
رائد طلب من سمر تفكر في الموضوع بجدية و هدوء
و أصلا مقدروش يقعدوا بروحهم من يومها
لأن رغدة و رعد لحقوهم لتركيا قعدوا معاهم لن روحوا مع بعض من يومين بس بعد لاكملت علاجها الطبيعي
و رجعت تمشي على رجليها
لكن رائد لما هيا في حوشه مسيبهاش بكل
كان مهتم بيها و بأدق تفاصيلها
علاجها و جلساتها و أكلها و شربها
حتى أنه لما طلعت هيا و رغدة للتسوق
طلع معاهم هو و عمته
و دفع لهم حق كل إلي شروه و مخلاش عمته تدفع عن سمر و لا قرش
حتى أنه شرالها حاجات على ذوقه بدون علمها
و قبل لا تسافر اتفقوا أنه أول ما يروح خطيبها منذر من سفرة العمل متعه بتنهي معاه خطوبتهم
و بعدها رائد بيتقدم لها بشكل رسمي
الأيام إلي عايشتهم سمر توا كانوا و لا في الأحلام
حلم طفولتها و مراهقتها و أخيرا تحقق💕💕
و نص قلبها المفقود و أخيرا اجتمعت معاه
و حسسها بحبه و حنانه و مشاعره تجاهها
و عايشة معاه أحلى أيام حياتها
بس يا ترى هل الحلو يكمل ؟؟