حين يعصف العشق❤

8

الجزء الثامن

مورا أنتي فيه شي بينك وبين
رائد ولد خالي ؟

سمر تفاجئت من السؤال المباشر
والغير متوقع ملامح وجهها تغيرت وخافت
من المواجهة، ،
مشاعرها تجاه رائد كانت سرها الخاص
ميعرفش بيه حد
وحتى رغدة محكتلها شي إلا بعد لاخلاص
فاض بيها وحست أنها محتاجة
لشخص يفهم عليها

ورغدة كذا مرة مركزة على لهفتها
تجاه رائد وتسأل فيها بمواربة
ولما خلاص كانت محتاجة
تحكي فضلت تحكي لرغدة
لأنها كانت شاكة فيها

لكن مكانش في بالها يجي يوم
ويكون فيه حد مركز عليها..

وصفاء من ملامح وجه أختها
إلي تغيروا شكوكها تأكدت
وقفت قعمزت جنب أختها عالسرير
وشدت يدها: مورا بالله عليك ماتخافي
ولا تتحشمي مني نا أختك وسرك سري

سمر : مفيش يا صفو والله مافيش
شي بيننا بحتي نا نبيش نكذب عليك ،،
لو فيه شي فهوا مني نا بس
رائد ماليه علاقة أبدا

صفاء : امممم يعني حب من طرف
واحد صح؟؟
سمر بزعل وعيونها دمعوا
تكلمت بشبه همس: صح

صفاء وجعتها أختها:
ليش يا قلبي ليش يعني فضوا الشباب
خلاص ،،
لا من العيلة ولا من الجامعة
ولا من أي مكان مافيش غير رائد

سمر : كنه يا صفاء رائد قوليلي !!

صفاء : كنه!!!،، يعني أنتي مش عارفة كنه
كبير وااجد عليك ،،
وأرمل وعنده بنت وغير هكي نحنا
نعرفوا كيف كان يحب المرحومة
وكيف صار معاه عشان ياخدها، ،
وبعدين أنتي طول عمرك قدام
عيونه عمره ماحقك ولا بحت فيك
والكل يعرف كيف هو قريب منك
واااجد ويعامل فيك كيف رغدة أخته

سمر قعدت تبكي: نعرف ياصفو نعرف، ، لكن والله مابيدي والله
مش مني ياصفو،، قلبي رايده
عدى عنده وميبيش يرجعلي
قوليلي كيف ندير بس؟؟

صفاء عيونها دمعوا وصعبت عليها أختها:
صح قلوبنا نحنا مانقدروش نتحكموا فيهن.. لكن ... وسكتت

سمر وهيا تبلع في غصتها: لكن شنو قولي؟؟

صفاء كانت لازم تحط أختها
في الصورة بعد لا تأكدت من مشاعرها
اتجاه رائد
حاولت تتكلم بعقلانية:
بحتي نا مش ضدك والله العظيم
لكن ياسمر أنتي فيه شي
مازلتي مش سامعة عنه

سمر خافت : احكي صفاء بالله عليك ماتخبي عني ولا شي

صفاء : لو كنت نبي نخبي راني مش قاعدة معاكي هنا ونحكيلك
سمر نا مش وحدي إلي حاسة بيك ..
فيه غيري والدليل يلي صاير من فترة

سمر كانت خايفة من إلي بتسمعه:
ادوي نسمع كملي أرجوك
صفاء: من دون أرجوك حاضر حندوي
( وحكتلها على مرت آدم ولد خالهم فيصل جنات والكلام إلي حكتهولهم على علاقة جنى أختها برائد وكيف تعمدت توصل الكلام لبنات العيلة )
هيا كانت قاصدة نحنا نسمعوا، ،
وممكن ممكن تكون عرفت شي عنك ،،
فاحبت توصلك الدوة بطريقة غير مباشرة