حين يعصف العشق❤

57

الجزء السابع و الخمسون

تابع .. المصائب لا تأتي فرادى

فيه أيام تجي علينا غريبة..
يعني و كأنها حلم نستغربوه هلبا بالرغم من أننا عايشينه
نبدو فيه كأننا مسيرين مش مخيرين
أيدي خفية و إرادة مجهولة تحرك فينا
نخططوا و نفكروا و نحللوا و نستعدوا و حتى نجهزوا
لكن زي مايقولوا ساعة القدر يعمى البصر
و حياة الإنسان ماهي إلا أقدار مكتوبة

يوم الخميس 23 فبراير
الساعة 8 صباحا

في الدار إلي راقدة فيها سمر
دقات خفيفة على الباب
فريحة : تفضل
رائد فتح الباب بهدوء و تكلم بصوت هادئ :
صباح الخير عميمة
فريحة حطت المصحف الشريف من يدها
و ردت عليه: صباح الخيرات تعالى
رائد كان شاد باقة ورد حلووووة في يده
و عيونه على سمر:
مازالت ما فاقت ؟
فريحة : لا من بعد المسكن إلي خذاته
الساعة 6 خف عليها الوجع نعست
بس الممرضة طلبت مني نفيقها عشان تصحصح
قبل موعد عمليتها
الله يخليك رائد أنت فيقها خليني نعدي
أنا نجيب قهوة محتاجة نصحصح كويس
عيوني بيتغمضن خلاص

رائد حط باقة الورد على الطاولة :
خليكي أنا نعدي نجيبها لكي و نجيب لك تفطري
اليوم طويل و صعب و محتاجة تتغذي عشان تقدري
تقعدي مصبية على رجليك
فريحة ناضت تلبس في وشاحها :
لأ خليك أنا أساسا نبي نشربها في الحديقة
محتاجة نشم هواء نظيف
ريحة المعقمات و المطهرات خنقتني خلاص
و بعدين سمر في يوم كيف هذا
محتاجة أول ما تفيق تحقك أنت أول واحد

من بعد باتها ما وافق على خطوبتكم
محكيتوش مع بعض
وجودك جنبها حيقوي عزيمتها و حيخليها أقوى
رائد قدم باس رأس عمته :
ربي يخليكي لينا يا فهومية أنتي
بس أمانة عليك تاخدي شي حاجة تفطري عليها
و أنا خليت العيلة في الفيلا يادوب واعيين و حيكونوا
هنا كلهم قبل لا تبدأ العملية

فريحة : تمام أنا حنعدي و نخليك تأخد فرصة معاها
قبل يجينا عمك منصور
رائد بعد لا عمته طلعت وصكرت الباب
خدي باقة الورد و قعمز على ركابه مقابل وجه سمر
مسح على شعرها و باسها من جبينها بحنان
و هيا لما حست بلمسته على جبينها ابتسمت
ابتسامة عريضة على محياها
و هيا مازالت مغمضة عيونها

رائد لما انتبه على ابتسامتها مسح على خدها بسبابته
و تكلم بصوت هادئ و حنون :
يا رب ما ننحرم من هالضحكة السمحة يا سمحة أنتي

سمر فتحت عيونها : صباح الخير رائد
و رائد طبس باس عيونها الإثنين:
صباح النور على عويناتي السمحات
صباح الحب لبنيتي السمحة
صباح الفل و الياسمين على أحلى
و أنعم و أجمل سموحة فيكي يا ليبيا
شن يا عمري كيف كانت ليلتك
نعستي كويس ؟

سمر : يعني بعد يعدي مفعول الدواء المسكن
يقعد كيف السكين نحسه مغروس في ظهري
و مرات يقعد يضغط عليا جوا لعند نحس ظهري حينقسم نصفين
بس بعد ناخد الدواء خلاص يخف الوجع الحمد لله
رائد مازال يمسح على شعرها بحنان و حب :
خلاص هانت يا غلايا ..
نديروا العملية و تنجح إن شاء الله
و نتحملوا بعدها كم يوم بس
و نبدوا في جلسات العلاج الطبيعي
و تردي تصبي على رجليك كيف قبل
و ليك عليا بعدها نلففك الدنيا كلها
أنتي بس حددي الدول إلي حابة تعدي تشوفيهن
و نقضوا أحلى شهر عسل ..
هيا عروستي نبيك تشدي حيلك
عشان نستمتعوا بكل لحظة لينا مع بعض