حين يعصف العشق❤

48

الجزء الثامن و الأربعون

يوم الخميس 11 يناير
الساعة 1:35 ظهرا

في مكتب رئيس اتحاد الطلبة
كيكة صغيرة 🎂 فوقها 19 شمعة صغيرات و طاسات  عصير
و جنبهم بوكس هدايا مغلف
انفتح الباب و خشت أميرة و أسيل إلي كانوا مستغربات من إلي يشوفوا فيه قدامهم
أميرة شافت لأسيل باستغراب و أسيل رفعت إيديها فوق و تكلمت : و الله ماهو أني و لا ليا علاقة
في نفس اللحظة سمعوا صوت من وراهم
Happy birthday to you
Happ birthday my princess

أميرة تلفتت بعيون ملهوفة و متفاجئة لجابر إلي قرب عليهم و مازال يغني
سنة حلوة يا جميل سنة حلوة يا أميرتي
و أسيل شاركاته الغناء
و أميرة حاطة يدها على فمها و تضحك بكل حب و من قلبها
و بعد لا كملوا غناء جابر أشر على التورتة و الشمعات بش تطفيهم
و هيا طبست و غمضت عيونها و تكلمت بحب:
ربي يخليكم ليا و مايحرمني منكم أنتم الإثنين
و طفت الشمعات و أسيل طول نقزت عليها حضنتها
و بعد لا تبعدوا عن بعض جابر تكلم بإحراج:
اعتبريني درت زيها ...
كل سنة و أنتي حبيبتي و معاي و قريبا ليا و حلالي يارب ❤️
و أميرة من كمية المشاعر إلي معبية قلبها
تجرأت و شدت يده:
و أنت حبيبي و دنيتي كلها جابر
متصدقش قداش كنت مستنية حاجة حلوة زي هكي تغيرلي جوي و تفرح قلبي
قبل شوية كنت نقول لأسيل أني خلاص متضايقة من الإمتحانات و ضغط القراية لدرجة قريب نهبل
و جابر رفع يدها و باسها بحب:
بعيد السو عليك يا عمري من الضيق
طول ما جابر عايش إن شاء الله مفيش غير الفرح بس
أميرة: لكن كيف درت هكي ؟؟
جابر : عادي حبيبتي رئيس اتحاد الطلبة صاحبي
طلبت منه المكتب و هو مقصرش
و الثاني حاجة بسيطة مش صعبة
كنت متمني نديرلك حاجة أحلى و أكبر
أميرة : ربي يخليك ليا جابر و يفرح قلبك زي ما فرحتني
أني هكي سادني أنك فكرت فيا خلاص معش نبي شي
جابر : فرحك فرحي يا عمري
و أسيل الهامعة معش قدرت تصبر :
ياهووووه وكلوني و بعدين حبو بعضكم قداش ماتقدروا
بصراحة منظر الكيكة لا يقاوم😋😋
و هما ضحكوا عليها
قصوا كيكتهم و إيديهم متشابكة
أسيل خدت حصتها و مشت قعمزت على كرسي بعيد عليهم شوية بش تخليهم على راحتهم
و جابر قعد يوكل في أميرة و هو يتغزل فيها و في جمالها
: أميرتي نقولك شي هوا أني كنت بنأجله لا بعد نكملوا نصفياتنا أني وياك لكن بصراحة مش قادر نصبر
و أميرة استغربت من لهجته الجدية:
قول حبيبي إن شاء الله خير
جابر : خير خير
بصراحة فرحتك إلي شفتها في عيونك شجعتني نحكيلك
أني كنت قايلك أنه أمي و بوي ماشيين لأختي نور في ألمانيا لأنها جابت
أميرة : إيه حبيبتي حكيتلي
جابر : هو أني منعرفش أمتى مروحين لكن بمجرد مايروحوا على طول حنقوللهم عليك
أميرة خافت :
كيف تقوللهم عليا قصدك ؟
جابر بحب ❤️ :
نقوللهم أنه فيه أميرة حلوة خطفتلي قلبي نبيهم
يمشوا معاي لحوش بوها يخطبوهالي رسمي بش تولي حبيبتي و مرتي و دنيتي كلها
أميرة من بعد كل البعد إلي صار بينهم مكانتش تبي حاجة تفرقهم ثاني و مبتش تفكر في أي شي
ممكن ينغص عليها فرحتها و يضايقها :
و أني معاك و حنستناك أنت و عيلتك بفارغ الصبر
و لآخر لحظة في حياتي
و جنبهم أسيل إلي مدايرة روحها مركزة على تليفونها
كانت تسمع في كلامهم و فرحانة هلبااااا لصاحبتها و رفيقة عمرها