الجزء العاشر 🤍
عند عيسى في حوشهم كانوا متغديين عندهم رجالة خواته وخالته الحاجة وردة ..
بعد ماسكر الخط من رعد بلغ خالته أنه الضيف إلي جاها المرة إلي فاتت بيجيهم يوم الإثنين وبيتغدى بازين هيا بتديرهوله بإيديها وهيا كعادتها رحبت بيه وبضيفه......
بعد الغدي عبير أخت عيسى الصغيرة كان عندها لمة صاحبتها رفعها راجل للمزين بتجهز روحها
وراجل عُلا أخته الكبيرة طلع ولده علي للحلاق
وبنتها رواسي راقدة داخل جنب جداها
عُلا طلعت بصفرة القهوة لعيسى إلي مقعمز عالطاولة برا وحطتها قدامه وهيا تعارك:
راهو ماما مابتش تعدل عليا قلت لها نديرلك زي خالتي وردة شاهي أخضر قريب كلت لي رأسي وآخر شي بتنوض اديرها بروحها
درتلها فنجان صبيتهولها وجبت البكرج بش متزيدش
نوضلها كانك تبي تتفاهم معاها أني راني عجزت معاها
عيسى: خلاص مدوريهاش أصلا أمي ماشاء الله عليها محافظة كويس
منقصة الملح وتاخد في علاجها بانتظام وأني نتابع فيها
مافيهاش بأس بفنجان في الأسبوع
علا : دبر راسك أنت وياها تتفاهموا
لكن أنت عارف ماما شن إلي مرقيلها ضغطها هالأيام ومخلينا كلنا جونا مش حلو
عيسى وهو يشرب في فنجانه:
امممممم بنرجعوا لنفس الدوة
على: مافيش غيرها وبالله عليك تسمعني ياعيسى
أنت وخينا الوحيد ومقعدش لينا غيرك بعد بابا
و علي الله يرحمهم ..
نبوا نشوفوك مرتاح ومتهني
سادك تجارب فاشلة ياعيسى بالله عليك دير لروحك حل ،،
دكتور ناجح ومستقبلك مضمون وأخلاقك كل إلي يعرفك يشهد بيها وميقولوش
إلا يرحم من رباك وشخصيتك تبارك الرحمن وشكلك وسيم
شن ناقصك يعني تره قولي؟؟
مرتك في مكان وأنت في مكان
ياكلمها وتفاهموا يا شوف نصيبك مع غيرها
نبوا نفرحوا بيك ونشوفوا صغارك
أمي تشوف فيها هكي ماتتكلمش وتساير فيك
لكن والله بتموت وتشوف لك عيل تلعبه وتفرح بيه ويقوللها يا جداي
أنت راهو ولدها إلي قاعد لها بعد علي الله يرحمه
وأعز من الولد ياعيسى والباقي عندك
نبوا نشوفوا صغارك حداك ومرتك معاك تونسك وتريحك وتفرح قلبك
حقك ياوخيي بعد التعب إلي تعبته بش تهنيت علينا ووصلتنا لرجالتنا وفتحنا حياش
عيسى بتنهيدة: التعب إلي تحكي عليه هذا واجبي نديره غصبا عني
أنتم خواتي وأمي وماعنديش أغلى منكم
وبالنسبة للزواج والصغار
هذا نصيبي يا لوليتي نصيبي وأني راضي بيه اللهم لا اعتراض
علا بعيون مدمعة وضحكة: الله محلاها لوليتي تتفكر فيا كيف عششت فيك ادورلي اسم دلع تقولهولي أني بروحي
عيسى بضحكة وجع: على قد ماساعدتيني وقتها ،، على قد ماكنتي تغاري منها
علا: وأنت والشهادة لله من لما حسيت بغيرتي عليك وحتى قبلها عمرك مافرقت بيني وبينها
لما كنت تجيبلها إن شاء الله حتى طرف شكلاتة تجيبلي زيها أني وعبير
ولما حمقت عليك على خاطر الفلوس إلي قلت لي نوصلهملها وأني عصبت وتنرفزت ولوحت الفلوس وحلفت لك مش حنعطيهملها ومشيت وخليتك أنت مزعلتش مني نهائيا
أنت تقرأ
حين يعصف العشق❤
Romanceروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
