الجزء التاسع و العشرون❤️❤️
الساعة 3:50
عصرا
أسيل و أميرة ماشيات لحديقة بش يتلاقوا فيها مع جابر
الجردينة كانت مطلة على سفح جبل و المنظر فيها خياااالي لأنها مفتوحة على سلسلة جبال ممتدة
و غالبا عالجردينة تكون فاضية شوية و مش زحمة
لأنها عائلية و لأن الجو مازال مصقع
الأهالي ميقدروش يجيبوا أطفالهم ليها
جابر كان واقف يستنى فيهم
و لما وصلوا البنات فيه
سلموا عليه
أميرة كانت لابسة كبوط فوشيا طويل للركبة و سروال جينز أزرق و وشاح أزرق فيه ورود صغيرة لونها فوشيا و وردي و حاطة لمسات ميك اب خفيفة على وجهها
و كانت هذه أول مرة يشوفها جابر حاطة هاللمسات
إلي خلت جابر يموت عليها و يهيم فيها عشق
أكثر ماهو هايم😍😍
و زيادة شوقه ليها كل هالوقت
كان مخليها زايدة حلاوة أكثر و أكثر في عيونه
و من نظراته الحارة ليها كانت حاسة أميرة أنها بتتبخر من الخجل ..
جابر كان جريئ في نظراته على غير العادة
لذلك أسيل خدتها من قصيرها و استأذنت منهم
و مشت قعمزت على كرسي خشبي طويل محطوط على جهة بعيد عليهم شوية بش تخليهم على راحتهم
و جابر تكلم بحب : أميرة شن هذا كله ؟؟
و أميرة ارتبكت : هذا كله شني ؟؟
جابر مسح على جهه و شعره :
و الله على هالجمال نبي قلبين ثلاثة مع قلبي
بش يسد حبي ليك❤️
أميرة تحشمت والخدود توردوا
و لفتت وجهها للجهة الثانية :
أنت إلي بالشوية على قلبي جابر
منيش قد كلامك الحلو
جابر : يحلييييله جابر و خلاص
تعالي تعالي خلينا نقعمزوا أحسن
و مد يده ليها و أميرة قعدت تشوف له
و تشوف ليده و بعدها حطت كفها
جابر دقات قلبه فاتت كل الأرقام القياسية💓💓
شبك أصابعه بأصابعها
و ضغط على يدها و مشو لجهة قريبة على أطراف الجردينة و كان فيه فرشة صغيرة و فوقها بخشة محطوط عليها حاجات
أميرة لما شافتهم ضحكت :
جابر شن هذا كله و علاش متعب روحك هكي ؟
و جابر مركز على ردة فعلها حك رأسه من الخلف :
هيا حاجة بسيطة الحق ،، حاولت ندير جو حلو
اسمعي بصراحة فتحت النت و نزلت على قوقل
كيف نجهز لقطات هكي
و حاولت شوية ندير زيهم
و بعدين أني مش متغدي جبت غداي معاي بش تسايريني و تفتحي لي شهيتي
أميرة طلقت يده و قعمزت طول :
أي نسايرك هذه ؟؟
تي أني ميتة جوع عندك علم من فطور الإستراحة مكليت شي
و جابر جي قعمز جنبها :
معقولة علاش هكي باهي؟؟ مفروض تغديتي
خلاص خلينا نتغدوا
هوا بصراحة معرفتش شن تحبي أكثر
لذلك جبت هامبورغا و بيتزا و شاورما
و أنتي شن تحبي ؟؟
أميرة : و حق ربي أنت أحسن واحد
و منور من الأخير
و بدوا يفتحوا في الحافظات بش يتغدوا
جابر : جبت حتى حصة صاحبتك معانا
أهيا حافظة حطي لها فيها و ارفعيهالها
أميرة : أسيل متحبش الهمبورغا و متشربش في المشروب
نرفعلها عصير و بيتزا و شاورما و شكلاطات
و بعد لا حطت الحاجات التفتت بتمشي لها شهقت بقوة :
حيييييه هن هاداكا إلي واقف عليها؟؟
جابر التفت يشوف فيهم
أميرة : زعما واحد يضايق فيها ؟
جابر : متعرفيشي قصدك ؟
مش متفقة معاه يجيها؟
أميرة : لا لا مش متفقة مع حد
و مأعتقدش نعرفوه هوا عاطي بظهره
لكن مش متأكدة الحق
خلي انوض نشوفها
جابر : لا لا قعمزي مفيش داعي تحرجيها و أني معاك
و أني عيني عليهم لو حسيت أنها متضايقة منه أو أزعجها أني توا نمشي نتفاهم معاه
و أميرة قعدت مركزة عليه لن تلفت بوجهه جهتهم :
حيييه و الله إلا عرفته هذا رعد العملاق
جابر : من رعد العملاق
أميرة : هو اسمه رعد شوف هو قصته طويلة
المهم أنه أسيل تعرفه شوية
اشبح شن جاي يبي منها ؟؟
جابر : خلاص معش تشوفيلهم بلاش تحرجيهم
مش حلوة اللقطة و زي ما قلت لك توا نكسر عيني جهتهم لو هو مضايقها حنمشي نشوفهم
لكن الباين أنهم يهدرزا عادي شوفيه كيف قعمز جنبها
يعني الأمور طيبة
هيا حبيبتي سمي بسم الله و كولي
أميرة جت بتاخد بيتزا تأكلها
جابر مد لها بيده شوية و حطهالها في فمها
و أميرة عيونها 😍😍
و السعادة مالية قلبها و روحها
جابر : تعرفي كنت مستاحشك لدرجة الجنون
مش عارف شن درتي فيا يا بنت؟؟
هيا ممكن فكرة أنه أني في مدينة و أنتي في مدينة ثانية خلت شوقي ليك يزيد أضعاف الأضعاف
أميرة واطت رأسها و متحشمة :
حتى أني أول مرة نحس في روحي كأني متغربة جابر
وجودك بعيد عليا خلاني ناقصني شي مهم و كبير
في أوقات نحس كأني كنت بروحي
جابر : و أني عمري متوقعت نتعلق ببنت هكي
كلية الطب و نفخها و طموحي أني ننجح بتراتيب متفوقة و كل إلي في الحوش يقولولي أقرأ بش تنجح بتفوق زي خوتك
مخلييني حاط قلبي و مشاعري في آخر الرف
لن تراكمت عليهم الغبرة
لكن أنتي لما شفتك و من أول مرة و حسيت كأنك بديتي تنظفي فيهم و تلمعي فيهم من جديد
التغيير إلي درتيه فيا من داخل
خلى لأيامي ألوان زاهية زي وردية خدودك
تصدقي أميرة و الله حتى ضحكتي بديت نحس فيها نكهة غير و إحساس غير
منبيش نقولك أني كنت شاقي و لا تاعب بالعكس
أني الحمد لله ربي ناعم على بوي من واسع رزقه
و إلي نطلب فيه منه ينفذهولي
مدام أني ناجح و مجتهد إلي نبيه هما فيه
ادهوير و سفر و لبس و مصروف كبير
و كل طلباتي أوامر عندهم
المهم تمشي كيف ما يبي بوك و تسمع كلامه
لكن حياتي كانت باهتة جافة مفيهاش حاجة مميزة
لن عرفتك
و شد يدها بين إيديه
: من يومها و كل شي انقلب فوقي لوطي
ناكل بحب و نضحك بحب و نهدرز بحب
حتى نقرأ بحب ❤️❤️
أميرة أني نحبك و نموت عليك
و نبيك تكوني ليا اليوم و دوم
و في أقرب وقت نوعدك وعد راجل حنجيب أمي تخطبك و تكوني ليا رسمي
أميرة بارتباك : شن خطوبة جابر بابا مرات ميوافقش أني مازال صغيرة و مشوار قرايتي مازال طويل و بعدين متنساش أنه حتى أني أمنيتي نكمل طب
جابر : وين المشكلة اقري شن ماتبي
أني ماقلتش بنتزوجوا غدوة
متنسيش أني حتى أني مازلت نقرأ و مازال مشواري طويل لكن نخطبك و نكملوا مع بعض و تكوني ليا قدام الناس كلها
أكيد مش حنقعد نلف و ندور
و نقعمز معاك في الجرادين
منبيش يجي يوم يشوفك حد معاي
و ندير لك مشكلة أني منرضالكش هكي
أميرة : ربي يخليك ليا عارفاتك و متأكدة لكن مازال شوية خليها للأيام على الأقل نكمل الثانوية و ناخد الشهادة و بعدين ساهل نحكي لأختي آيات
و نشوف شن رأيها في موضوع خطوبتنا
جابر : باهي شن رأيك تكلميها و أني نهدرز عليها و نفهمها أني نبيك رسمي
أني و الله لو كانوا خواتي في ليبيا راني عرفتك عليهم
لكن الإثنين مسافرات و حتى معندهمش مرواحة قريبة
أميرة : ربي يرجعهم بالسلامة إن شاء الله و يوفقهم في سفرهم بعدين أني واثقة فيك جابر صدقني
حتى فيه حاجة بنقولهالك
حتعرف أني واثقة فيك فوق الثقة
جابر : حاجة شني قوليلي؟؟
و أميرة طلعت تليفونها من شنطتها
و قعدت توري فيه
في كل المسجات إلي وصلتها
أنت تقرأ
حين يعصف العشق❤
Romanceروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
