حين يعصف العشق❤

51

الجزء الحادي و الخمسون
(فرحة بعد طول انتظار )

يوم الخميس 2 فبراير
في عشية فارقة بالنسبة لأماني

اليوم و لثاني مرة عيسى يكون في مربوعة حوشهم
بش يخطبها بشكل رسمي
كان جاي هوا و نزار راجل أخته و خاله مصطفى
خو أمه غير الشقيق
و كان في استقبالهم خوها أسعد و جارهم العم محمد
أماني كانت في قمة التوتر و الإرتباك
و هيا تحوس في المطبخ جنب أميرة و أسيل إلي
يجهزوا في الضيافة
على قد ما كانت فرحانة على قد ما كانت خايفة
هالمشهد تكرر قبل مرتين
مرة لما خطبها عيسى
و مرة لما خطبها فوزي
و في المرتين النهاية متكونش إلا حزينة و قاسية
على قبب أماني و مخلية أثر سيء في نفسها إلي حد اليوم

بينما في دار المعيشة كانت مقعمزة حكمات و رحاب يهدرزوا
الأمور كانت بين الرجالة سلسة و هادية
و عيسى كان حاس بروحه طاير في السماء
بعد لا تبادلوا المحادثات الشكليات
تكلم العم محمد :
حني بصراحة بنشروا راجل و هالشي معندناش شك فيه يا دكتور عيسى
لكن فيه حاجات من حقنا نشرطوها بش نضمنوا
سعادة بنتنا و راحتها
عيسى : أكيد تفضل قول شن تبي
و أني يا عمي محمد مستعد لكل شي تؤمروا بيه
محمد : الأمر لله يا ولدي الأمر لله
حني راهو ما نبوا كان الماير و المتعارف عليه
بنتنا أغلى من فلوس الدنيا
و إلي بنطلبوه حقها و حقنا بش نطمنوا عليها
تعيش مرتاحة و مفيش من ينكد عليها
حوش بروحها يعني بلا مؤاخذة مش مع ضرتها
هكي أريح ليك و لبنتنا
و أني نقولك حتى حويش صغير ساد
عارفين الوضع في البلاد و العقارات غالية
منبوش نكلفوك
و الذهب و المهر و الشرط و الدوة الثانية كلها أنت تقدرها
و إلي بتجيبه بيقعد ليك و لمرتك
و آخر حاجة بنتها و خدمتها
يعني إن شاء الله بعد لا تنفض قضية الصيدلية
ترجع لخدمتها متبطلهاش
و بنتها وين ما أمها وين ما هيا
أني هادم إلي نبي ناخد منك كلمة توا قدام
خالك و قدام نسيبك يا وافقت عليهم
نقولك من غدوة تقرأ فاتحتها و تروح بيها
يا متوافقش و هذا حقك
و كل حد يمشي على حاله

عيسى شاف لخاله و رجع شاف لمحمد :
بعد إذنك يا خالي
أني يا عمي محمد بنتكم شاريها زي ما كنت شاريها قبل
و كاني المرة الأولى دفعت ألف المرة هذه مستعد ندفع عشرة آلاف
و ذهبها كله نجيبهولها كامل
بنتكم بتولي مرتي و قدرها من قدري و بإذن الله منقصرش
و كانك على خدمتها فأني بعد تطلع برائتها حنساعدها
توسعها و تطورها
و كان ربي أعطاني ناخد لها محل ثاني أكبر
و في موقع أحسن و تحول فيه صيدليتها
و بالنسبة لبنتها فأني سبق و قلت لك كلمت
بوها و تفاهمت معاه و هو قال تتربى مع أمها
لأنه مسافر و ميقدرش يعانيها بروحه
و أني بعون الله حنعاملها زي بنتي و ربي يقدرني و منقصرش لا في ربايتها و لا في معاملتها و لا مصاريفها
لا هيا و لا أمها و أنت يا عمي محمد تعرفني كويس
محمد : و أني قلتهالك قبل و قاعد نقولهالك أنت راجل
و أني بنعطيك كان ربي أعطاك
خال عيسى مصطفى :
خلاص شروطكم كلها متوفرة
و ولد أختي شرالها حوش على روحها
و ذهبها و شرطها و حق كسوتها كله جاهز
معناها خير البر عاجله
خلونا نتوكلوا على الله و نقروا الفاتحة إن شاء الله
16/2
و باقي التفاصيل ساهلة
كله نجيبوه و منقصروش إن شاء الله
في الأخير هذه بتولي بنتنا حتى حني
و تستاهل نديرولها الخير كله
عيسى : أني بعد إذنكم نبي ليلة نروح بيها
نبي نحجز في صالة أفراح و نديرلها حفلة
و ادير إلي خاطرها فيه
منبيش انقص عليها حتى حاجة