الجزء السادس و الخمسون 😔
المصائب لا تأتي فرادى
عيسى و أماني كانوا على بعد خمسة دقائق
من الوصول لحوشهم.
لما رن تليفون عيسى برقم مدير المصحة الخاصة إلي يشتغل فيها ولأن عيسى مش متعود على مكالمات الدكتور إسماعيل
إلا في أوقات الضرورة القصوى
ولما يكون فيه حالات مستعجلة وطارئة
اضطر أنه يرد عليه
وفي نفس الوقت باش يتهرب من أسئلة أماني المتكررة عن حالة المريض إلي على أساس إنه توفى
وعيسى بما أنه دماغه مشتت خاف
ينكشف كذبه قدامها بسبب ردوده العشوائية عليها
فتح الخط و تكلم :
أيوة دكتور إسماعيل مرحبا
د.إسماعيل : دكتور عيسى كيف حالك؟
عيسى : الحمد لله بخير .. كيف حالك أنت يا دكتور ؟
إسماعيل: في نعمة و الله .. دكتور عيسى وين أنت توا بالضبط؟
عيسى استغرب سؤاله:
كيف خاش لشارع حوشنا إن شاء الله خير يا دكتور
إسماعيل : خير خير
دوّر و تعالى للمصحة فيه موضوع ضروري صاير في مكتبك لازم تشوفه
عيسى زاد استغرب أكثر:
في مكتبي أني ؟؟
عموما أعطيني ربع ساعة بس و نكون عندك
معاي المدام نحطها في الحوش و جايك طول
إسماعيل : متعطلش يا دكتور الموضوع عاجل جدا
عيسى و القلق زاد عنده :
تمام هي مسافة الطريق إن شاء الله و نوصل فيك
إسماعيل: مع السلامة
و صكر الخط
و عيسى حط التليفون جنبه و وجهه تغير
و أماني سألاته على طول : يبيك تمشيله ؟
عيسى: مش عارف قال صاير موضوع في مكتبي
مفهمتش كلامه بالضبط
أماني : أكيدة ليه علاقة بالحالة إلي توفت و لا ؟
و عيسى زاد تلخبط : أه إيه إيه أكيدة هذه
أني توا ندخلك الشناطي للحوش
و أنتي خشي نظمي أمورك لن نجيك
تمام منونتي ؟
أماني : إن شاء الله
و عيسى وقف قدام الباب الخارجي
فتحه و بعدين فتح لأماني بابها بش تنزل
أماني خشت للصور و هوا فتح الكوفينو
نزل شناطيهم دخلهم و خش للباب الداخلي
لقي أماني فاتحاته و تراجي فيه قدامه
خشو مع بعضهم
حط عيسى الشناطي و شاف لأماني :
منونتي أني ماشي منبيش نعطل عليهم
الدكتور إسماعيل قال الموضوع عاجل
أماني جت خشت في حضنه :
بنستاحشك لن تروح
دير بالك على روحك حبيبي
عيسى باس رأسها و خدودها بحب :
حاضر و إن شاء الله منعطلش عليك
و توا نجيب غدي من برا معاي ارتاحي أنتي
حوسي على روحك و استنيني باهي ؟
أماني: قبل كل شي بنمشي نشوف البنات
بنهبل عليهم و مستاحشتهم
عيسى بشيء من القلق إلي حاول ميحسسهاش بيه :
منونتي حبيبتي عادي تستنيني نمشي أني وياك
لما نروح
أماني باساته بحب : أنت تؤمر و تدلل
حااااضر مش ماشية لن تجيني
أنت بس متعطلش عليا باهي
و عيسى ميعرفش علاش قلبه كان مقبوض
حضنها بقوة لن قريب كسر لها ضلوعها
حضن خلا شعور القلق ينتقل تلقائيا لأماني
و أخيرا بعدها عيسى و شافلها بهيام
: لازم تعرفي حاجة منونتي
أني نحبك و نعشقك و نهواك يا حب عمري
أماني : و أني نحبك و نعشقك و نهواك يا حب عمري
عيسى نحى إيديه من عليها :
خليني نمشي فيسع بش نروحلك فيسع
أماني : تمام حبيبي
في أمان الله يا غالي
عيسى شافلها بتمعن و لف طلع
ركب سيارته و مشي للمصحة إلي يشتغل فيها
أنت تقرأ
حين يعصف العشق❤
Romanceروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
