حين يعصف العشق❤

17

الجزء السابع عشر
يوم الجمعة 14 أغسطس
الساعة 2 ظهرا

في مصحة Jaydaa clinic

البنات سمر و رغدة كانوا جايات يتغدوا مع صفاء بش متكسدش بروحها في المصحة و معاهم رضا تغدوا و هدرزوا عليها
رضا بعد لا تغدى طلع بيشوف نتيجة التحاليل إلي داروهم لصفاء اليوم و يطمئن على وضعها من الدكتور المناوب لأن اليوم الدكتورة جيداء يوم راحتها

و في وسط ضحكهم و هدرزتهم خش رضا و كان فاتح تليفونه على مكالمة فيديو

جي حط التليفون في الوسط بينهم بانوا فيه سمر وصفاء إلي كانوا مقعمزات جنب بعض

وعلى الطرف الثاني كانوا رهف و رائد مقعمزين جنب بعض يبو يكلمو صفاء و يطمنوا عليها

أول من تكلم كانت رهف بعد لا شافتهم
: مورا.. صفصف توحشتكم وااااجد

صفاء ردت على رهف : حبوبتي السمحة و نا توحشتك واجد واجد واجد واجد حبيبتي كيف حالك؟؟
كيف حالك رائد؟؟

رهف: نا كويسة بابي قال بعد نكمل اختبارات حنجيكم في ليبيا و نقعد عندكم لأني رايفت عليكم أنتي و عمو رضا و كلكم رايفت عليكم

رائد شاف سمر أول ماحط رضا التليفون بينهم و انتبه أنها ناضت طول بعد لا شافاته بدون ما تكلمه أو تكلم رهف ..
كلم صفاء : الحمد لله على سلامتك صفاء
كيف الحال؟؟ كل يوم نتصل برضا و نسأل عنك إن شاء الله تكوني أحسن؟؟

صفاء تحشمت من تصرف سمر و ردت بصوت واضح فيه التعب :
الحمد لله مازلت عندي هبوط و منقدرش نصبي و الدوخة تعبتني بس الحمد لله على كل حال

رائد: مع العلاج بعون الله تتحسني
صفاء: إن شاء الله يا رب و الله قعدت المستشفى مملة و متعبة
رهف : صفصف بعد نجيك نا حنقعد معاكي و مش حتملي
نقعد نحكيلك حكايات و قصص حلللوة
صفاء ضحكت بحب : خلاص يا حلوة أنتي و نا حنستناك كملي امتحاناتك و تعالي اقعدي معايا طول الوقت

و كملت صفاء و رهف هدرزة و جت رغدة قعمزت حتى هيا تهدرز معاهم

أما سمر بعد لا شافت رائد في أول المكالمة انسحبت بهدوء و طلعت قعمزت في الحديقة متع المصحة متبيش تسمع صوت رائد مكانتش تبي تحن له و لا تسمع أي شيء عليه 💔💔

قعدت مقعمزة في كرسي في الحديقة تاخد في شهيق و زفير و تحارب في دموعها متبيهمش ينزلوا

لحقها رضا بعد لا طلعت لأنه كان خايف عليها لأنه عارف كل شي صاير بينها و بين رائد في آخر مكالمة

جي قعمز جنبها و تكلم بهدوء: رهف مليهاش ذنب هكي تعامليها

سمر شافتله باستغراب : كيف قصدك مفهمتش كنها رهف؟؟

رضا : قصدي رهف متعلقة بيك واجد و أنتي حاطتها في الحظر و مش قادرة توصل فيك
شفتيها قبل شوي بعد شافاتك قالت اسمك قبل صفاء لأنها مرايفة عليك أنتي أكثر من أي حد في عيلتنا