حين يعصف العشق❤

23

الجزء الثالث و العشرين

أسيل تشوف في تليفونها بتركيز و تصميم
و هما مروحات من الثانوية
الجو كان صقععععع و السماء مسحبة ☁️☁️
و الواضح أنه فيه أمطار غزيرة بتصب
إيه حني توا في شتاء سنة 2016
و تحديدا يوم الإثنين 11 يناير
فاتحة على الفيس بوك و تشوف في منشور بعينه و واضح أنه الكلام إلي فيه مهم و أميرة إلي تمشي جنبها سألتها :
قصدك خلاص صممتي بتمشيله؟؟
أسيل : أكيد ماشية و اليوم معش حنضيع الفرصة
حنأخذ إذن من المدام نوال نقوللها نبي نمشي للمصحة
هما منزلين أنه إجازته تمت و رجع يداوم من اليوم الصبح
ساد ما ضاع مرات مشيتي تنفعهم سادهم عذاب
أميرة : يا بنتي مش عارفة كيف تفكري
الراجل في صفحته الشخصية مداير أنه متزوج في بياناته
يعني إلي حديريه كله مافيشي فايدة

أسيل تلفتت على أميرة بعد لا حطت تليفونها في جيبها :
شوفي مرات كلامك صح لكن أني إحساسي يقولي أنه الوضع بينهم
مش فاهمة فيه شي غلط
يعني مكالماتهم و هدرزتهم مع بعض هيا عميمة صح تقولي حني أصدقاء و عشرة عمر و من هالكلام لكن أني بصراحة نبي عميمة ترتاح متشوفيش فيها كيف لما تبدأ تتكلم عليه عيونها كيف يبدوا
أميرة : ترتاح لما تقربيها من راجل متزوج يا سيلا
أسيل عصبت : أميرة خيرك اليوم مش فاهمتيني و مصرة تحبطيني
أني نبي عميمة ترتاح لأنها مش قادرة تقوله السبب إلي خلاها تسيبه
هيا متمنية تحكيله و ترتاح لأنه لو عرف السبب أكيد حيعذرها ممكن معش يرجعوا زي قبل صح
لكن الأكيد أنه حيتفهم موقفها معش حيشوفلها بنظرة الخاينة إلي سيباته على خاطر جاها عريس عنده فلوس و حوش و سيارة
أميرة : مش عارفة مرات كلامك صح
و مرات عمتك تزعل منك
أسيل: لا مش حتزعل و أصلا أني حنحلفه قبل كل شي ميحكيلهاش على لقائنا أني ماصدقت أصلا حصلت رقم تليفونه من تليفون أماني
و التعليقات كاتبين يتحمدوا لأمه بالسلامة شكلها ماشية للعمرة و روحت هذا باش ليه يومين واخذ إجازة
حنمشيله و نتصل بيه بش يدخلني نشوفه طول و منعطلش
أميرة : باهي غر خفي مشيتك جمدت من الصقع 🥶

🌿🌿🌿🌿🌿🌿🌿🌿 🌿🌿🌿🌿

و أماني كانت ترتب في الصيدلية لما سمعت صوت رسالة صوتية عالماسنجر
حطت المنشف و ملمع الخشب من إيديها و مشت خدت تليفونها
لما فتحت المسج لقاته من عيسى
(كيف حالك اليوم أماني.. الدواء إلي وصيتيني عليه كلمت لك المورد و قالك بعد غدوة إن شاء الله يجيبهولك مع باقي الحاجات إلي وصيتيه عليها
ابعتيلي قداش الكمية إلي تبيها و تكون عندك إن شاء الله و السعر زي المرة الأولى
كنت بنتصل بيك نقولك لكن عندي عملية مستعجلة بنخشلها توا بعتتلك الرسالة بسرعة.. ادعيلي )
و أماني على طول ردت عليه بمسج مكتوب
( إن شاء الله ربي يوفقك و ينور بصرك و بصيرتك)
طلع لها أنه شافها في نفس الوقت عرفت أنه يستنى في ردها
حطت هاتفها عالطاولة و رجعت لشغلها و في بالها كل الشهرين إلي فاتوا و إلي صار فيهم
من لما عيسى اهتم بحالة جارتهم و دارلها هو العملية بعد خمسة أيام بس من مكالمة أماني ليه
و بعدها جاها للصيدلية يبي ياخد دواء
قعد معاها ممكن عشرة دقائق هدرزوا فيها عن الصيدلية و شغلها فيها و من وين تجيب في الأدوية و المستلزمات الطبية
و سألها عن بيسان و أسيل
صح مسألهاش عن حياتها الخاصة
زواجها و طلاقها و لا طبيعة علاقة بيسان ببوها و لا هيا سألاته عن أمه و خواته و لا زوجته
و لا قداش عنده أطفال و لا أي شي ليه علاقة بحياته الخاصة
و بعدها هو اتصل بيها قاللها أنه يعرف شركة تركية لتوريد الأدوية بأسعار أرخص و بجودة عالية و أنه ممكن يساعدها تتعاقد معاهم يجيها كل شي تحتاجه لباب الصيدلية
و تكررت الإتصالات و كلها كانت مكالمات عمل و حتى أحاديثهم كانت يا إما عن خدمة عيسى و الحالات إلي يعالج فيهم أو عن بيسان و أسيل و المسؤولية إلي متحملتها أماني في تربيتهم و الاهتمام بيهم أو حتى مواضيع عامة
المهم أنهم كانوا بعاد الإثنين عن حياتهم الخاصة و تجاربهم في الزواج
و كأنهم الإثنين يبو ينسو هما منو و شن صار معاهم و كيف و علاش تفارقوا
عيسى يبي ينسى أنها أماني إلي تخلت عنه و بدلاته
و أماني تبي تنسى أنه رجل متزوج و معش ليها الحق فيه زي زمان
حتى المسجات عالماسنجر أو عالواتس آب عيسى محادثاته كلها صوتية و أماني ترد عليه بمحادثات مكتوبة
هيا كانت تطمئن و تفرح لما تسمع صوته
و هو يعرف أنه مازال يأثر فيها لدرجة أنها متبيش تبعتله مسجات صوتية بش ميسمعش الرجفة في صوتها
لكن قلوبهم في وسط هالضجيج كان ليها حديث آخر
ما بين عتاب و شوق و حب و لهفة و أمل و حيرة و عذاب
لكن لتدابير الأقدار دور كبير في قصة عاشقيْن
حبهم و عشقهم الحقيقي مازال ليه الكلمة العليا في علاقتهم مهما طالت السنين