حين يعصف العشق❤

40

الجزء الأربعون

خلاص يا عمتي لبسيها خلي نمشي نخلص و ناخد ورقة الخروج و نجيكم
رحمة أم صابرين :
حاضر يا ولدي هي تجي تلقانا نراجوا فيك
و عيسى طلع من الدار إلي راقدة فيها صابرين و باتت فيها ليلة
و كلام الدكتور جلال إلي متابع حالتها قاعد يرن في ودانه
عيسى حس بتأنيب ضمير لأن كل الضغوط إلي مرت بيه خلاته ينشغل عليها المدة إلي فاتت
مرض خالته الله يرحمها..
و وفاتها و إهتمامه بأمه بعد وفاة أختها
و قصته مع أماني و مشاعره إلي مش قادرة يدسهم أكثر من هكي
حتى حلم الأبوة إلي كان دافنه طول الوقت
و إلي بدي يطلع عالسطح كل ما يشوف صغار أخته أو يتلاقى هو و حد من زملائه الدكاترة أو جيرانه و معاهم صغارهم في السيارة أو يتمشوا في أي مكان مع بعض
مكانش حاسدهم لكن كون أنه سليم و معافى بعد هلبا تحليلات و فحوصات دارها في ليبيا و برا ليبيا
و كلهم أكدوا أنه سليم تماما و مشكلة الإنجاب عند صابرين مرته
إلي رب العالمين مأذنش أنها تحمل بالرغم من كل المحاولات و العمليات الجراحية إلي دارتها
و كورسات العلاج إلي التزمت بيها
هو عارف أنه دار كل إلي يقدر عليه
بش يجيب منها صغار و نجاحهم يستمر و ينجح
علاش حاس أنه معش يقدر يصبر و لا يضحي أكثر
الموضوع ليه علاقة برجعت أماني لحياته !!
و لا ليه علاقة بطموحه كرجل يحلم بحياة مكتملة
عمل ناجح .. زواج و حب و أطفال و سعادة
هوا علاش حاس روحه معش قادر يتحمل هم و لا حزن أكثر من هكي؟؟
معقولة يكون تسرع في طلبه لأماني أنهم يرجعوا لبعض
و لا ظلم صابرين معاه و هو السبب في الحالة الصحية و النفسية السيئة إلي هيا وصلت لها
و زايده تأزم الوضع في البلاد
و رغبته القوية في الإنضمام للجيش الأبيض
إلي يساعد في الثوار المتواجدين في الجبهة
أفكار و أفكار لدرجة حس برأسه خلاص حيتفجر
معش قدر يتحمل أكثر من هكي
هوا كان ناوي يفاتحها في موضوع زواجه و يخليلها فرصة تفكر لو تبي ترضى تقعد على ذمته بعد لا يجيب عليها ضرة
أو ينفصلوا و يعطيها كل حقوقها
مشي كمل لصابرين إجراءات الخروج
و رجع لغرفتها لقاها واتية
.. ساعدها تطلع و روحوا للحوش

🌿🌿🌿🌿🌿🌿🌿🌿🌿🌿

يوم الثلاثاء 10 مايو
الساعة 3:50 مساء

أميرة و أسيل كانوا مقعمزات في دار أميرة
و يكلموا في حاتم بتليفون أسيل
و فاتحات المايك لأنه مفيش حد في حوش أهل أميرة
أمها و بوها طالعين
و محور حديثهم جابر و حاله إلي مخوف حاتم عليه
حاتم حكالهم عن شكه في أنه جابر مسحور
لكن مباش يقوللهم أنه شاك في عفاف
فضل يحتفظ بالمعلومة لنفسه
لن يتأكد من شكه صح و لا لا
حاتم : أنتم ماشفتوش حاله كيف يتغير
من بعد العصر و برا غادي يبدأ قالق
و روحه في رأس خشمه
خوه قالي مايطلعش برا من الدار لما يبدأ قاعد في الحوش
و قداش مرة نديروا في عشاوات و زرادي برا
يصكر في رأسه و مياباش يمشي معاي
مع أنه كنا مفيش مكان منمشوش مع بعض
الحاجة الوحيدة إلي ماشية معقولة قرايته بس
و الباقي كله ملخبط بكل
و إلي زادني لما تلاقيتوا آخر مرة
أنتي ماشفتيشي يا أميرة كيف صار فيه
قعد يرعش مع بعضه
حتى سيارته مقدرش يسوقها
خليناها لسواق بوه ولالها روح بيها
و جابر روح معاي أني في سيارتي
رجع قريب عيونه طلعوا و تعب لن خلاص
و مكلاش حتى حاجة لثاني يوم الظهر
و حتى بعد لا صحصح مخلانيش نحكيله
و لا على حاجة على إلي صار معاكم
و لا اناقشه في شي
كأنه كان خايف يهدرز عليك و لا يجيب سيرتك
أميرة بألم : و أني إلي كنت نقول اشبح شن شاف مني
و لا من كاذب عليه حاجة عليا
لن فاتني هكي مرة واحدة
أسيل : حاتم نبي نسألك سؤال و تجاوبني بصراحة
أنت تعرف من إلي مداير هكي في جابر؟؟
حاتم : شوفوا من لما جابر حكالي على قصة الرسائل إلي كانت توصل لأميرة
و فيها كلام و دوة فاضية على علاقة جابر ببنت و هوا قالي شاك في زوز بنات
و أني توا شاك فيهم الإثنين
أني نشدت على قصة كيف الواحد يدير سحر للناس
و سألت شيخ ثقة مش مجرد دجال
قالي يجي بهلبا طرق
و على حسب قرب الساحر من المسحور
و البنتين هادم جابر يتواصل معاهم عادي
يعني مش واعر يحطوهوله في ماكلته و شرابه و لا يبخوه بيه و لا يخلوه يتخطاه في عتبة و جو هكي
و الموضوع هذا مش ساهل الواحد يتهم الناس بيه لازم دليل
و أني مقرر نهدرز مع عيلته..
بوه و خوته بش نشوفوا كيف نتصرفوا في الموضوع
أسيل : لا حول ولا قوة إلا بالله العلي العظيم
يا ويلهم من ربي إلي طايحين يسحروا في عباد ربي
حاتم : المهم أني حكيتلكم و أنتي بالذات يا أميرة
لأني عارف جابر قداش يحبك بجديات
و عمره ما فكر يلعب عليك و لا يتسلى بيك
لكن إلي صار معاه حاجة أكبر منه
و غصبا عنه
إن شاء الله يتعافى و يرجع لطبيعته
و يرجع كل شي بينكم زي قبل و أحسن
أميرة من الصدمة و الكلام إلي سمعاته معش قدرت ترد عليه
و أسيل كانت حاسة بيها :
إن شاء الله ربي يفرج عليه
بالله عليك يا حاتم لو صار معاكم أي شي
طمنا على جابر
و لو فيه شي نقدروا نساعدوا فيه مش حنقصروا
حاتم : يصير خير إن شاء الله
خلوني نستأذن منكم أني توا
ماتبو شي
أسيل : صحيت حاتم بارك الله فيك
باي
حاتم : باي
شفتي رعد خش عليا مرتين انتظار
اشبح خيره
أميرة بحزن: شريني عليه شوفيه
أسيل : فوتيه توا و خليني فيك أنتي
شفتي كيف ظلمتيه الولد
هذه حاجة هو معنداش يد فيها
السحر حاجة فوق قوة البشر و قدرتهم
و كل إلي حكاه صاحبه أنه إلي مدايرهوله
خادمها صح بش يفرقكم عن بعض
أميرة : منو باهي ممكن يكون ؟؟
حني شبه مفيش حد يعرف بعلاقتنا
منتلاقوش في مكان فيه ناس يعرفونا
معقولة توصل بيهم للسحر
السحر يا سيلا
أسيل : هذه ناس متخافش ربي و إلي ميخافش ربي خافي منه
إن شاء الله يلقوه و يتلقوه يا رب العالمين
بعدين ربي قال ( و لا يفلح الساحر حيث أتى)
ربي يأخد فيهم الحق
خلاص متنكديش على روحك ورانا قراية
و هم مايلتم
و إلي رايده ربي هوا إلي حيكون
أميرة : كان نفهم هذا كله علاش
إلي يسمع يقول خطبني و قرينا الفاتحة و غدوة العرس بش ناويين يفرقونا
حسبي الله ونعم الوكيل فيهم
حسبي الله ونعم الوكيل😰😰