🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 1🍁
👑سلطان الصحاري👑
🍁 الجزء 4 🍁
كعادتها دايعة بين الجبال كتبعد كل البعد على شباب القبيلة واستهزائهم كتخلي غنمها ومعزها يرعى وتجلس تحت شي شجرة أو مكان مضلل تقرأ كتابها وتخدم الامتحان لي كيكون على الحروف أو القرآن أو جمع الكلمات أو أو أو .. كل مرة واش يكون الامتحان لي عندها من تحضير جوهر .. بقات منغامسة مع داك الكتاب يديها لقنت ويجيبها منه حتى تعيا وتنوض ثاني تقلب بين الربيع على نباتات للأدوية أو نباتات غريبة عليها تقلب فيهم تشوف لي رائحتها زوينة ولي فيها شي سائل .. كتصايب العطور والأدوية والمرهمات غير من النباتات وهذه ملكة عندها منذ الصغر
شهقات ووقفات ملي بانت ليها النعجة الصحراوية تجمعات فواحد القنت تحت الظل وهزات رجليها والواضح أنها غادي تولد دبا رمات كلشي لي فيديها ووقفات حداها كتgفض ناوية تعاونها
نهار: علاش اا صحيريويتي علاش تخليني حتى لهنا .. يالاه اا البطلة تولدي فالنجا وترجعي معيا فالنجا .. السوء لي يبغي يجيك يجي ل بابا يا ربي
بقات معها حتى ولدات عاد رجعات فيها الروح هي قربات ليها الخريفات الثلاثة لي ولدات كترضعهم وهذا هو السبب لي مخليها عزيزة عند منصور كتولد ليه كل عام ويا 2 يا ثلاثة .. عزيزة عليه أكثر من أولاده
باقي على وضعيتها كتلاعبهم وتعاونهم يجمعو راسهم سمعات النداء ديال أحد شباب القبيلة كان سارح تحت منها هي بشوية
الشاب: نهاااار واا نهاااار .. عفاااك عتقي .. جيبي دوك العشبات ديالك وعتقي
كعادتها هادشي باش كيفرحو لتواجدها معاهم لأنهم دائما فصراع مع العقارب والحناش وأي حاجة سامة
نهار كتعطي التعليمات وواحد الزيف مزقاتو بسنانها وكتجمع فالاعشاب: شرط ليه البلاصة ومص الدم بالزربة
صوت التراديد ديالهم هو لي كيتسمع من جبل لجبل وقفات كتسرع وفنفس الوقت كتحاول ما طيحش حيت الى زلقتي الحجر غايطيبك والشوك غايمزقك بالحق حتى حاجة ما تحبسك حتى تلقا راسك وسط الواد عايم هادشي إلى ما داكش .. لأنه جبل واقف شامخ معرعر واشجاره مشوكة وقصار .. وصلات جنبه لقاته متكيين ليه راسه على صخرة وواحد شاد ديك العقرب وسط قرعة زجاجية .. كانت عقرب كحلة زحلة والولد كيتصبب بالعرق والثاني كيمص ليه عصبة رجليه ويدفل
شدات ديك القرعة وجرات شوكة كبيرة دائما مسلحة بيهم هي .. غرساتها فديك العقرب وخلاتها كتألم وباش تدافع على راسها كترمي سمها وسط القرعة وهذا هو الهدف ديال نهار لي حاولت أنها ما تقتلهاش هي كتحتافظ بيهم باش حتى إلى شي مرة شي واحد قرصاته شي وحدة بحالها وهربات هي كتكون عندها اختها أو السم ديالها
نهار: ما تحبسش اا بالعيد .. جر داك الدم (كان ولد الشيخ هو لي كيدير ديك العملية وهي غير باش تنتاقم منه خلاته يمص فرجلين السارح لي حالتهم بلعاني باش تبرد)
حتى خلطات سم العقرب مع دوك الأعشاب والنباتات ديالها عاد دفعاته حتى تنشر كيرجع النفس ما خاصش السارح يموت ولا غا يولي هو شفاية فالدوار ولد الشيخ ما يقد يسرح نعاج ما يقد يحارب عقارب بقا غير يخرج للحروب
لبقات ليه داك المرهم غير حطاته حس بديك الحرارة لي فجسمه كامل بدات كتمصها ديك العشبة وكيحس بشي حاجة كتجر من عروقه حس بالراحة
وقفات محنززة فيهم: هزوووه حطووه تحت ديك الشجرة .. وانت اا ولد الشيخ .. اا بغيت نقول بلعيد (عدوه لي يقول ليه ولد الشيخ) عندك خدمة صعيبة .. خدمة هاد المسكين لي كيدير من هادي سنين غادي ديرها انت اليوم .. تقابل الكسيبة وتقابل السارح .. ايوة وحنا نقولو لك فاللخر واش ربحتي ولا كما العادة .. ولد القاع والباع ما يقد على والو وكلشي يناولوه ليه الخدم
عطاته بالظهر ناوية ترجع استوقفها بلعيد نيت: الله يرحم الوالدين اا نهار
دارت عندهم بشوفات نارية: قول الله يرحمك اا نهار انا لي محتاجاها فهاد جبال .. بحالي بحالكم .. الله يرحمنا كاملين
رجعات لبلاصتها طلات على النعجة جابت ليها الماء تشرب هي وخريفاتها وبقات هي وكتابها تتسنى وقت الغذاء تتغذى ومن بعد يتسناو الليل يبدأ ينزل ستاره باش يهبطو هما وكسايبهم للدوار
وغير بدا يظلام الحال مشات كعادتها تجيب الماء من العين لي فراس جبل جاية هابطة هي وقراعيها السراحة واولاد الدوار مشاو .. كيبانو ليها بهايمها مجموعين فبلاصتهم هابطة وكتحسبهم بعينيها شوية وقفات فبلاصتها صارطة ريقها والصدمة طلعات على وجهها لي مشا منه اللون بالمرة
نهار: هاااه ميمووونة!!!!
🍁🍁🍁🍁🍁 سلطاناتي 🍁🍁🍁🍁🍁
اش صدم نهار اا؟
شكون هي ميمونة
