🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 2🍁
👑سلطان الصحاري👑
🍁 الجزء 10 🍁
واقفة مبعدة على الرجال والشباب لي فرحانين غادي يمشيو لبلد آخر لقبيلة كانو غير كيسمعو بيها والاحسن فهادشي كله انهم غادي يدخلو لقصر السلطان ويخدمو فالاراضي المخزنية والأراضي التابعة للقصر .. كانت كتشوف فيهم وتحاول أنها تخفي راسها عليهم لأنه 2 ديال الشباب لي من قبيلتهم لي تختارو باواتهم مع باها راه كيعرفوها حق المعرفة .. لما لا وهي لي كتضل سارحة معاهم فأعالي الجبال .. لكن الفرحة ديال كل واحد هاد الساعة ما خلات ليهم فين يديوها فيها
تخبات بين الرزم ديالها وديال باها ملي بان ليها الشيخ والمخازنية دياله جايين ومعاه بغال واحصنة والمونة وأربع مخازنية زيادة .. وقف قدام داك الحشد ونفخ صدره
الشيخ: ها القافلة ديالكم .. كل واحد منكم عنده عود وبغل يتقاسمه هو ولده .. مونة كل واحد ديال السفر راه على البعير دياله وكلشي بحال بحال .. هاد المخازنية غا يمشيو معاكم حتى تدخلو بلاد السلطان .. وديك الساعة ها نتوما تما حتى يكمل موسم الفلاحة ويرجعوكم سالمين غانمين .. ولي بقا تما بأمر الوالي يشرف قدر قبيلته وما ينساش خير قبيلته عليه .. وما تنساوش خيري انا الشيخ ديال قبيلتكم لي كنسهل ليكم الترحال والترحل .. ودايما كنهضر على قبيلتي باش تزيد القدام .. والله يديكم فالنجا ويجيبكم فالنجا
من ورا كلامه تطلقو زغاريد فالقبيلة والقبائل المجاورة وكل واحد مشا يجر البعير دياله كيقلب اش كاين فالمونة ومنصور واحد منهم جر الحصان والبغل لي مع بعض قربهم وبدا كيتعاون هو وياها على حمل الرزم ديالهم حتى وقف عليه المخزني
هاز محضر كيزمم: ااا اسمك واسم الولد ديالك
شدات منصور التفتافة: منصووور .. منصور وهذه بنتي أأاأ هذا ولدي محمد .. اييه محمد الله يرضي عليه
بقا كيشوف فيه المخزني ويشوف نهار لي كتعامل ببرود وكتحاول تقلد حركات الشباب كلام أمها زاد خوفها وخلاها هي لي باغيا تهرب من بطش هاد القبيلة قبل لا تعيش الرعب فدار الشيخ أو فالسجن لي غايكون بمثابة عذاب شديد بالنسبة ليها
المخزني قيد الأسامي وداز من شخص لشخص حتى كملو العد ومشا عند الشيخ حرك ليه راسه بلي الأمور كلها مزيانة وعطاهم الأمر بالانطلاقة
ماشي غير منصور لي كان حاس بالفرحة كل الناس لي غاديين فهاد الرحلة فرحانين كل واحد شاد اللجام ديال البعير دياله جارو وسط القبيلة لي حاميينها للزغاريد عيالاتها والرجال لي بقاو كيدعيو معاهم .. والكل كيتغنى بهاد الأبيات
** من يعتصم بك ياااا ... خير الورى شرفا ... الله حافظه ... من كل منتقم ... **
غير فاتو القبيلة وقفو كل واحد خدا البعير دياله باش يركب عليها كاين لي أعطى لولده العود لأنه داك الوقت كانت عنده واحد الثمن والشرف والقيمة أكثر من هاد الزمن وكاين لي ولده بغا يشوف الاب دياله راكب على حصان .. واخا راه ما عطاوهمش شي احصنة نيت ولكن هما مساكن كانو من طبقة جد فقيرة يعني حتى حمار هو الأخير ما عندهمش بالنسبة ليهم بغل وحصان راه شي حاجة
منصور: اجي هنا عاوني باش نطلع على العود
بقات كتشوف فالآباء كيفاش هما معاهم رجال أو شباب وكيعاونو ولادهم يركبو عاد كيطلعو هما ومخيرين أولادهم بين البغل والحصان .. وهو كيشوف غير راسه
خنزرات فيه مزيان وتمتمات: بهيمة راكبة على بهيمة .. سمح ليا اا سي العود ولكن راكم ماشي من نفس المقام هو راه أقل حتى من هاد البغل
منصور: ااش كتمتمي تما زيدي اا زيد هنا خلاص
تالف غير بوحدو مشات عاوناته حتى تعرش فوق داك العود وهي بقات جارة البغل حيت غير الوطى ما عرفاتش كيفاش تركب .. كلشي راكب إلا هي غادية على رجليها حتى وصلو جنب واحد الصخرة عاد قدرات تركب .. كانو فاتوها بمسافة طويلة نوعا ما .. وهنا بدات كتفكر واش تسلت دبا أو تزيد مزال حتى يدخلو بين شي جبال أو غابة أما دبا راه يقدرو يشوفوها غادية ببطء وكتخمم
🍁🍁🍁🍁🍁 سلطاناتي 🍁🍁🍁🍁🍁
واش تهرب دبا ولا حتى لبلاتي سربيو اا البنات راه ما عندهاش الوقت ؟
