🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 4 🍁
👑سلطان الصحاري👑
🍁 الجزء 21 🍁
فوسط ديك الغرفة الكبيرة لي كلها مفرشة بالحرير ومزينة بديكورات ومخطوطات تاريخية جالسة دايرة رجل فوق رجل بملابس ديال الناس الكبار وكلها عامرة مجوهرات تاريخية ثمينة كل وحدة ولاش راجع تاريخها .. ملي دخلات نهار وهي كطلع وتهبط فيها وتشوف كل جانب منها ومغنية غير حاضياها حتى وقفات نهار وسط الغرفة
ميلات السيدة فمها: ما بيهاش اا مغنية .. بالحق زدتي فيه فوصفها .. ممم المهم انا نخليها معايا نجربها .. على ما تتعلم لي ينفعها
حركات ليها مغنية راسها ووقفات مودعاهم كتبسم مع راسها .. هادي حتى هي كانت غير خادم وجارية .. كانت رقاصة وملي شافها الوزير قال غير هي ولا الموت طلبها من عند السلطان وواعده يعطيها ليه هدية إلى نفذ واحد المهمة بنجاح .. ودبا حتى هي ولات تتفلعص وتتعوج على مغنية لي كانت واحد الوقت هي لالاها
وقفات كتدور على نهار وهاد الأخيرة حاضية معها: همممم هي قولي ليا غلطتي فحق سيدي محمد باشا؟
حركات راسها طلوعا ونزولا: ما كنتش عارفة اا مولاتي!
كملات الدورة وتقابلات معها: كلنا دخلنا نهار الأول عارفين اش باغيين .. اش معنى نتي ما عارفة والو؟
حركات راسها بالنفي كتجاوب على قد السؤال: أنا جابني بابا معاه باش نعاونو فالفلاحة .. حتى لقيت راسي هنا
هزات الأخرى حاجب: اذن نتي قوية؟ وتقدري تديري لي ما يديروهش الرجال حيت الفلاحة مخصوصة للرجال أو لا؟
نهار باغيا تعرفها لاش باغيا توصل: أنا من ديما كندير شغال الرجال .. مآ ما لحقات تعلمني والو من شغال النسا .. كنت أنا الولد الكبير فالدار
قربات منها بهمس: ايوة إلى نفدتي ليا واحد الشغل .. غادي تكوني نتي هي يدي اليمنى .. نتي ودني وعيني وكلشي .. اش بان ليك؟ .. عاد غادي تعيشي معيا معززة مكرمة .. اش قلتي؟
نهار هزات حاجب: لي هو؟
باقي ما قالت لها والو جاهم الإعلان بدخول الوزير عطاتهم الأمر باش يبعدو هي والخادمة ديالها وجلسات هي ناشرة رجليها بلعاني معريين دايرة حركة اغرائية وكتلعب بشفايفها حتى تحل الباب ودخل عاد وقفات بغنج
غير شافها عينيه حوالو: زينة البنات .. لالة مرجانة الغزالة
دورات يديها على عنقه وعطاتهم الأمر باش يخرجو وبقات هي معلقة فيه .. بقات نهار تالفة كل وحدة كتبان ليها كدير شي حاجة إلا هي ما عارفة ما دير .. بقات على داك الحال حتى داز الوقت عاد خرجات هي بنفسها كتقلب عليها
مرجانة: هييه نتي .. اشنو سميتك قلتي؟
ضارت عندها: نهار .. اسمي نهار
حركات حاجبها خلات الكل يضحك عليها: اه نتي اجي معايا وعينيك بين رجليك
دخلات من وراها ما هزاتش الراس قدرات تلمح غير رجليه العاريتين لاوي عليه بينوار حريري وكيشوف فيها واضح اش كانو كيديرو بلا ما تحتاج تفكير
الوزير: همممم .. هي هادي .. تماما
مرجانة نهضات عليها: يالاه نتي اش كتسناي
ضاغطة على كف يديها باظافرها: سمح ليا اا مولاي انا جديدة هنا وما كنتش عارفة
قربات مرجانة منه كدعك رقبته وهو عينيه على نهار .. نظرات ديال وحش مفترس .. كان باغي مشكلته يحلها بيديه ما عرفش شكون دخل مرجانة على الخط
همهم بحنق: هممم ممم .. غير على وجه لالاك .. أما عقابك كان غادي يكون عسير .. خرجي عليا دبا .. ما بغيت نشوف حد (شاف فمرجانة هي الاخرى) بغيت نرتاح
فهمات بلي حتى هي خاص تخرج من البيت .. هزات واحد بحال الكاب كيلبسوه غير النساء لي عندهم أهمية فالقصر لبساته .. امرتهم باش يوجدو ريوسهم على قبل خرجة للحديقة ديال القصر .. ونيت هاديك هي الفرصة باش تعلم نهار بالمهمة ديالها .. غير جلسات على واحد الكرسي خشبي حطات يديها جنبها
مرجانة: اجي جلسي هنا تعرفي مهمتك شنو هي
تحنات وقربات جلسات: نعام اا مولاتي!
هي كتقول ليها على المهمة لي بغاتها تنفذها فأسرع وقت ونهار عينيها كيدورو على قنات جردة حتى شافت لي بغا قلبها ولي غادي تحتاج
🍁🍁🍁🍁🍁 سلطاناتي 🍁🍁🍁🍁🍁
اش طلبات منها؟ واش شافت نهار فالحديقة؟
