🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 5 🍁
👑سلطان الصحاري👑
🍁 الجزء 25 🍁
ما قالت هادي لي درت يدي فيدها باش نصفيها لضرتي تقدر تقتلني انا براسي .. والعجيب أنها دارت ليها ديك القضية ديال باش قتلتي باش تموت .. استغلت داك الوقت لي تنشرات فيه مرجانة فوق السرير جسد بلا روح ودخلات لواحد المكان بحال المكتب عامر بالوثائق والمخطوطات كما دارت فبيت زوجته الأولى دخلات لهذا كطبق نفس الشيء .. كتقلب بين الوثائق والمخطوطات والكتب .. والأشياء لي لقات فغرفة مرجانة أكثر من غرفة زوجته الأولى قدرات تفهم السبب علاش ضاغي .. خشات داكشي لي جمعات بين حوايجها وتقدمات كتمشى وسط البيت بكل برود .. شافت فيها مزيان وخرجات بحال الى ما دارت والو
وقفات أمام جناح مرجانة وشافت فالبنات: المهم مولاتي مرجانة بغات ترتاح .. وقالت لكم خودو هاد الوقت نتوما راحة .. وتعرفو على بعض أكثر
مشات مخلية شي حاسدها على السرعة والبديهة لي عندها وشي ما حاملهاش من الأصل وشي ما كرهش يكون بحالها
قصدات الصندوق حطات فيه داكشي كتسد وتعاود وخرجات كتصاطح مع البنات برا الجناح وعينيها كيقلبو على فرحة ما لقاتها حتى بدأت كتسمع صوت الصراخ والغوات .. جراتها لواحد القنت بعيد على البشر والأخرى باغيا تعرف علاش نايض الغوات فجناح الوزراء ولكن شكون خلاها
فرحة تنطرت: ماالك اا صاحبتي واش حتى التبرgيg ما تخلي الواحد يديرو فخاطره؟
نهار ما تسوقاتش هي عارفة لي واقع اش: فين لالة مغنية؟
خرجات عينيها: درتي شي زبلة (شهقات) هاااا ياك ما نتي سبب هاد الغوات؟
نهار ما عندهاش الوقت للتفسير: فرحة خاص نلقا لالة مغنية بالزربة .. فين هي؟
دفعاتها بعصبية: نتي ياك؟ نتي سباب هاد الغوات ياك؟ (بدات كتبكي) هاد المرة ما غا يفكك حد اا نهار .. لالة مغنية غايبة للقبيلة مع وحدة من عيالات السلطان .. باش تختار شي اثواب .. وتدير شي صدقة على المساكين باسم القصر
ضحكات باستهزاء: علاش الصدقة خاص يتعرف مولاها شكون .. وبعدا علاه ديك القبيلة فيها شي واحد فقير بعدا .. ما شافتش القبائل لاخرين بحال منين جيت انا .. وعلى من دزت انا .. يمكن كانت تنتاحر بالصدمة فعوض ما تصدق
سدات ليها فرحة فمها: سكتي سووكتي .. قولي ليا اش درتي .. واش نهربك من باب الخدم اا نهار؟ قولي اش درتي؟
لوهلة جا هو لبالها: كتعرفي مولاي عبد الرحمن؟ الأخ ديال السلطان من الرضاعة؟
شهقات فرحة: منين كتعرفيه؟
نهار خرجات عينيها: فرحة ما عنديش الوقت .. كتعرفيه اه ولا لا؟
هزهزات راسها: اه كنعرفو
نهار: مزيان فين جناحه؟
دفعاتها على الحيط: واش عارفة راسك اش كتقولي .. مولاي عبد الرحمان جناحه معزول بحال جناح العائلة الملكية .. بحال جناح السلطان براسه .. كيفاش غا تقدري تدخلي؟
مصرة: أنا نعرف كيفاش نتي غير وريني ضغيا .. ولكن قبل خاص تجيبي ليا شي حاجة من صنادق ديالي اا فرحة .. عاونيني والله ما تندمي .. انا عارفة بلي عزيت عليك
نعتات ليها باش تجيب ليها داكشي كله لي هزات من جناحهم وحتى الكسوة البالية ديالها لي فيها الgروش ديالها وهي بقات مخبية فين خلاتها فرحة .. بعد مدة طويلة جابت ليها داكشي وامرتها باش تبعها بلا ما تخلي حتى شي واحد يشوفها .. داتها من خلف القصر باش حتى شي واحد ما ينتبه ليها .. من الأجنحة ديال الخدم والحرس
فرحة وقفات كتهمس: شوفي من هنا .. ملي كدخلي كتبداي فالمكان الخاص ديالهم .. هنا مطبخ الحرس والخدم ديالهم معزولين علينا .. ولهيه الحدائق والبلايص فين كيجلسو .. بالحق باش نقول لك هذا جناح شكون وهذا ديال شكون انا براسي ما عارفاش
حركات راسها بفهم ويالاه بغات تقول ليها صافي غير سيري سمعو صوت أقدام وشخص تابعهم على الأرجح
الشخص: اا شكوون تما؟ .. وقف قبل لا تيريت فيك بشي نبل
🍁🍁🍁🍁🍁 سلطاناتي 🍁🍁🍁🍁🍁
ميمتي باقي ما دخلات حصلو .. حتى فرحة مسكينة مشات فيها
