🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 5 🍁
👑سلطان الصحاري👑
🍁 الجزء 26 🍁
غير تسمع صوت الشخص حركات لها راسها فرحة باش تتبت وهي غادي تكلف بالباقي باش تقدر تدخل من مطبخ خدم وحرس الجهة الخاصة بالسلطان وأقرب المقربين ليه
وقف للحارس على فرحة لي هي خرجات عنده عطاته تحيته: احم نعام سيدي
مصغر عينيه فيها: نتي من خدم الوزراء لا؟ فمطبخ الخدم والحرس؟
فرحة: اييه نعام اا سيدي .. جيت مرسولة لعند طباخة الحرس والخدم لي هنا .. لالة رسلتني على قبل زعتر الجبال .. عندنا حالات ديال المرض ديال النزلة .. وخافو لا يتنشر بين الخدم ويوصل للاسياد
جاتو ثابتة فكلامها وتاق بيها: تبعيني
هو غادي وهي من وراه وهي كتعمد تخلي الأبواب محلولة لنهار من وراها على الأقل تدخل هنا حتى تبان لالة مغنية .. إلى ما لقاتش مولاي عبد الرحمان علاش كتقلب .. غادي بيها فطول داك الطريق لي كانت خاوية ومظلمة للمطبخ ونهار من وراهم بلا حس بلا حركة .. وغير بان واحد القوس كيخرج للحدائق الكبرى ديال السلاطين .. عطاتها فرحة إشارة باش تخرج منه
وداكشي لي كان وقفات نهار فواحد الزاوية حتى قادات داكشي لي هزات على كرشها ولوات عليه ديك الكسوى البالية ديالها عاد نزلات كسوى من ديال زوجة الوزير الأول كانت هزاتها من بين حوايجها مع بعض الاكسسوارات .. مقادة حالتها وبدات كتقاد حتى وجهها وشعرها تحت الزيف لي منسدل عليها
دارت اول خطوة بكل ثقة وكأنها عارفة كل قنت ومنين تدوز .. كتمشى بشموخ عكس الخوف لي كيشطح فيها الشيء لي مخليها كتبان سيدة من سيدات القصر وكأنها ولدت وكبرت فيه .. المكان لي كيبان ليها عامر حرس وخدم كتفاداه .. طلعات متسلقة واحد الدروج للطابق الآخر وقدرات تميز واحد الجناح بحكم ولات كتعرف الفرق بين جناح الخدم والسادة وبين المطابخ والأجزاء ديال القصر .. قدرات تميز انه هذا ممكن يكون جناح ديال شي شخصية مهمة .. ولكن الحاجة لي خايبة انه مليء بالحرس عندها طريقة وحدة باش تدخل وهي واحد النافذة صغيرة .. وخاص داك البيت أو الصالة أو القبة لي غادي تدخل ليها ما يكون فيه حتى واحد .. تسلتات حتى شافت بلي راه ما كاين حتى واحد فديك الصالة ولكن كيتسمع صوت الهضرة فداخل يعني خاص تدخل وتتخبى ثاني .. والمشكل إلى دخلات كيفاش تقدر تعاود تخرج لأنه ممكن تحصل .. سلمات أمرها لله ودخلات ببطء شديد من ديك النافذة وتخشات بين واحد الصناديق فواحد الركن .. وبقات ساكتة كتسترق السمع
داخل داك الجناح كانت جالسة وشعوراتها مطلوقين وراها ها لي كتمشط ليها ها لي كتبخر ليها شعرها ها لي كتعطر ها لي كتريح .. كل وحدة واش كدير ليها وهي شادة مرود كتكحل عينيها والواضح أنها فرحانة وراشقة ليها .. والخدم ديالها كيشكرو ويمدحو فيها وفجمالها
الخدم1: نتي يا لالة مولاتي لي تستاهلي مولاي السلطان
الخدم2: الزين والثباتة .. والأصل والمفصل .. من عائلة حاكمة .. ومولاي الخدير باك هو حاكم بلاد سعدان
كتسبل عينيها بحب وهيام: ااه اا منانة .. ما كرهتش انا غير ليلة يضايفني مولاي فجناحه .. والله ديك المسمومة ديال بنت عمه لا بقات هي المفضلة عنده
الخدم2: اا لالة مولاتي جوهرة .. هي كيفضلها ويدير لها الخاطر .. غير حيت بنت عمه .. وحيت حاملة وصافي .. هذا ما كان
جوهرة: والى ولدات له الولد خلاص .. كلشي مشينا فيها .. هو باغي الولد من سلالته من الأب والأم .. إلى ولدات *زمرد* الولد .. عمر مولاي ما يفكر يولد مع وحدة اخرى مننا
ما عرفاتش واش هذا زهر ولا نحس لي طاحت فبيت وحدة من زوجات السلطان .. كيفاش تخرج من هاد الحصلة لي دخلات ليها راسها بيديها .. باقي هي تما سمعات خادم أخرى دخلات جايبة أخبار عيالات الوزير الأول ليها .. ومن بعدها بدات كتسمع غير دستووووووووور فلان دايز ولا دستوووووووور فلانة دايزة والحركة كترات تما
🍁🍁🍁🍁🍁 سلطاناتي 🍁🍁🍁🍁🍁
مصيبة هاد نهار من كارثة لكارثة
