🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 11 🍁
👑سلطان الصحاري👑
🍁 الجزء 61 🍁
كيسمع صوت الوشوشة من وسط جناحه والكلام لي تقال فيها هو لي صدمه أكثر هاد اليوم كان كله صدمات بالنسبة ليه ومزال ما بغاش يكمل أو الصدمات ما بغاوش ينتهيو
أم زمرد بصوت هامس ولكن مسموع: زمرد اا بنتي .. صبري الله يرضي عليك .. إلى مولاي عرف غادي يتعدم باك وأنا غادي ينفيني
زمرد ما قادراش تحبس البكية: علاش درتو فيا هادشي؟ هاا ياك أنا بنتكم .. عارفين شحال كنتعذب كل مرة كتموت ليا بنتي .. فعوض ما تحميو ليا هادي قتلتوها ليا
كتعنق فيها وتبوس أمها وزمرد حتى القوة باش تدفعها ما كانتش عندها غير كتبكي وكتألم من الأوجاع لي كتمزق كرشها من الداخل
أم زمرد: باك اا بنتي ما بقاش قادر .. كان من ديما كيتمنى ولدك هو لي يكون وريث .. بالحق اا بنتي نتي كتولدي غير البنات وما كيعيشوش .. والناس والعائلة كتشفى فباك .. زعما واخا طرتي ونزلتي وقلتي بلي ولي العهد خاص يكون من سلالة ملكية ها بنتك كتولد غير البنات .. داكشي باش ما بغاش هاد البنت تزيد من الأصل
مزال ما جاوباتها زمرد لي كانت غير مصدومة فوالديها حتى دخل بهيبته خلى أمها توقف محنية والدموع بحال الحجر من عينيها .. متأكدة أنه سمع شي حاجة غير من شوفاته ما عارفاش بلي سمع كلشي قرب من زمرد لي كانت عرقانة تفقد جبينها لقاها طاييبة بالحرارة صيفط من ورا الحكيم
ليل شاف فالحرس: ديو زوجة مولاي حفيظ لجناحها .. الحراسة تكون مشددة عليها حتى نعرفو اش نديرو فقضيتها
هزات عينيها باكيين وتحنات على رجليه: مولاي .. أنا فعارك اا مولاي .. ما تقتلش مولاي حفيظ اا مولاي .. نفيني أنا وياه وأولادنا اا مولاي .. راه عمك خو باك اا مولاي
دفعها: عمي خو با ياك؟ ما رحمش حتى بنته وحفيدته .. ونتي زعما هي الأم واخا طلب منك تنفدي ما تبعيهش فهباله .. واش عارفة بلي بنتك شربتيها السم بيديك؟ واش هاد زمرد ما من حقهاش تفرح كلشي ضدها؟ (غوت) دييييوهااا
قرب من زمرد كيتحسس جبينها ما كانش عارف بلي راه حتى أمها تقدر تكون منعدمة الأحاسيس وتتبع عمه .. قال مع نفسه بما أنه عمه تشد وزمرد فجناحه إذن راه حتى واحد ما غادي يوصل ليها .. ولكن ما كانش ضارب الحساب لأنه أمها تقدر تتجرد من أحاسيسها وتتبع عمه فهباله وأنانيته .. عارف بلي باغي حفيده هو لي يكون ولي العهد غير باش يستافد هو من هاد القضية من الأول وليل ما كانش عنده مشكل بما أنه الكل اتفق على هاد القضية
دخل الحكيم ومشا نيشان هو والحكيمة كيفحصو فزمرد كيسولو أسئلة لي ما عرفش ليل جوابهم اضطر أنه يعاود يآمر باش يجيبو الأم ديالها
الحكيمة: ايمتا شربتوها داك العشوب؟
كلها كترعد كتبان ليها بنتها كتقطر بالعرق ومغمى عليها: الصباح .. جابهم مولاي حفيظ ليا الصباح .. كيف طبخناهم شربناهم ليها .. جا الأمر ديال مولاي السلطان باش تجي لجناحه .. مال بنتي اا لالة الحكيمة؟
