🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 30 🍁
👑سلطان الصحاري👑
🍁 الجزء 175 🍁
مرت الأيام وبعض الأسابيع .. وها هي علامات الفرح تعلات .. العائلة ديال العروسين تجمعات .. وكثرت فهاد المناسبة الإعتذارات .. ونهار قررت بمساعدة ليل .. أنهم يتجاوزو هاد المشاكل العائلية .. لأنهم من هنا للقدام غا تجي مشاكل أخرى .. لذلك ما عندهمش قدرة لتحمل نزاعات أكثر .. براكة عليهم لي جاي من باقي البلدان المعادية .. لأنه ليل دار لي عمر شي سلطان سبقو بيها .. وهي سلم لنهار الحكم على مجموعة من القبائل .. وهي قبائل عائلتها لأنها أدرى بهم .. وعارفة مكامن القوة والضعف فكل وحدة .. وهادشي خلف ردود أفعال خايبة بين القبائل .. جاهم ليل بحال إلى كيدعم حكم المرأة .. وهادي أول مرة شي سلطان يجي بهاد القرار .. لكن التبعات دياله ما غا تبان حتى دوز هاد العرس .. العرس لي كان كبير وفيه كل أنواع الفولكلور .. لي فالبلاد ككل، كل قبيلة جات تشارك هاد الفرح .. كان بحال شي مهرجان كبير .. كلشي فرحان كلشي ناشط بهاد الزيجة .. كانو أعمام ليل كلهم لي في الحياة .. وزوجاتهم كذلك ومعظم العائلات والقبائل .. ليل ونهار فوق واحد القلعة كيطلو على كلشي من الفوق .. وباينين للناس كاملين كيشوفوهم من الرعية حتى السلاطين
الغالية وتودة ما فارقوش بعضياتهم فرحانات .. فينما مشات الغالية تجر معها تودة .. وتعرفها على الناس لا ديال القصر .. ولا المدعوين بافتخار وعزة وشان .. أم عروسة ولدي اتضح أنها صديقة طفولتي .. وبنت قبيلتي ورفيقة دربي والناس ظنوها صدفة .. وبنات تودة شادين جماعة مع قمر وقطرة الندى .. هاد الأخيرة لي وأخيرا تعلن أمر خطوبتها .. وأنها عن قريب غا تبع خوها والصدمة هي العريس .. حتى واحد ما توقع أنه مناجي علاش وكيفاش .. من غير لي عارفين علاقة الحب لي كانت رابطاهم .. ولي عارفين مستحيل يخرجوها على فمهم .. ولكن الأكثر غرابة أنه الناس عجباتهم هاد القضية .. وبان لهم أنه هاد الزواج حتى هو فيه خير كثير .. عكس ما كان متوقع ليل ومناجي .. وكانت قطرة الندى فرحانة وحشمات فنفس الوقت .. وهي كتشوف أم مناجي من المعروضات .. وكل شوية تبسم ليها وتحييها ما زاحتش نظرها عليها .. هي من قنت ومناجي من قنت آخر .. ولي زاد فصدمتها أنه الغالية كتعرفها مزيان وعندهم معرفة ببعض .. ولكن الأجواء على العموم كانت زوينة بزاف .. الكل مستمتع وفرحان
أما واحد منصور كيدور ويرحب بالناس .. فرحان بيهم وناشط من قنت لقنت .. تقول هو السلطان ماشي ليل .. وكل مرة يهز راسه لفين جالسة نهار وليل .. وتنزل دمعة على خده ويمسحها .. كيشوف بنته لي كان ظالم ومعاون الطغاة عليها .. بالحق ربي ما نساهاش وهي عبدته الضعيفة .. ها هو ربي أبدلها بضعفها أضعاف قوة .. وها هي شامخة منتصبة ومنتصرة على الظلم ..والناس لي ظلموها جاتها الفرصة باش ترد لهم ظلمهم .. ولكن نهار أكبر من هاد التصرفات .. عندها أهداف حاليا باغيا تكون قد ثقة السلطان .. وكتمنى من ربي ما يخيبهاش فهاد الرجاء .. أما تأثر منصور كان واضح عليه بزاف .. حتى من نهار لاحظاته وبقا فيها الأب ديالها .. رغم كلشي قدرات تشوف الصورة من جهته .. كما كيكونو الوالدين كيصبرو لعصيان أبناءهم .. كاين حتى الأبناء لي كيقدو يسامحو آباءهم .. منهم نهار وحتى ليل ومنهم عدد كثير كنشوفوه
