🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 9 🍁
👑سلطان الصحاري👑
🍁 الجزء 49 🍁
الكل بقا كيشوف فهاد الحارس الساذج ولا لي ما عارفش تفسير الكلام لي جاب وقال .. البيت الأول فعلا هو الكلام لي ممكن تقول الآنية (صبرت على النيران والضرب والأسى، المعنى واضح وباين انه الآنية صبرت للعافية ملي كنطيبو فيها، والضرب ديال الملك والناس لي كيعجبهم داك صوت الطنين، وصبرت على الأسى وتمارة .. وقالت فبلغني صبري إلى رشف المباسم، يعني الجزاء ديال الصبر ديالي هو فاش كتحطو شفايفكم عليا باش تشربو .. ايوة حتى لهنا مزيان بالحق الحارس ملي قال .. تأنى ولا تعجل لأمر تريده وكن رحيما تبلى برحيم .. راه المعنى هنا ما محددش شكون كيقصد بيه واش السلطان ولا شكون .. كن صبار إلى بغيتي توصل لشي حاجة وكن رحيم بالناس باش الله يرحمك حتى انت .. وزاد كمل قال ليه .. ما من يد إلا يد الله فوقها وكل ظالم سيبلى بأظلم .. اا داك الإنسان راه حتى شي حاجة ما بيديك كلشي بيد الله وإلى ظلمتي شي واحد غادي يرسل ليك الله لي يظلمك حتى انت .. ايوة هذا هو تفسير اش قال الحارس ولي فهم ليل وكل العلماء والفقهاء واللبيبين حتى هما)
ليل: مالك باقي ساكت .. باش كتفسر هاد الكلام لي قلتي؟(بان ليه كله كيرعد وقرى الخوف فعيونه وحركاته والندم تسلل لقلبه) قرب هنا بعدا .. نعرفوك شكون فالحرس
فعلا تقدم الحارس والخوف متمكن منه وبرجفة: الكلام ماشي ديالي اا مولاي .. غير صاحبي لي قالو ليا .. ملي قلت ليه على لي شاغل بالك اا مولاي
عقد ليل والباقي حواجبهم: شكون هاد صاحبك؟
الحارس: حتى هو من الحرس .. بالحق هو اا مولاي ما يقدرش يجي ويقولك الكلام
عصب الحضور لأنه كيقطر الهضرة من الخوف أما ليل غادي معاه دقة دقة باغي يعرف مصدر هاد الرد لي عنده إحساس أنه موجه ليه على وجه الخصوص
ليل: شكون هاد الحارس من حراسنا لي ممنوع عليه يحضر معنا؟
بسرعة: حاشا اا مولاي .. ماشي ما يقدرش .. غير حيت هو حارس فجهة أخرى ما يمكنش يكون فالقلعة أو يدخل ليها .. هذا ما كان اا مولاي .. ملي عرف وكلشي كيقول المكافأة قال ليا إلى كان جوابي صحيح نقسم انا وياك جائزة مولاي
عم صمت رهيب من بعد كلامه ليل كيفصل ويخيط .. كيفاش حارس لي قال هاد الكلام يالاه غادي يزيد يسولو خطوة خطوة حتى هز عبد الرحمان يديه طالب الإذن من مولاي السلطان ليل باش يتكلم وآذن ليه
شاف فالحارس بجدية: شكون هو هاد الحارس صاحبك؟ وفاش من جهة مختص فالحراسة؟
صرط الحارس ريقه: من حراس السجن اا مولاي .. حارس فأحد السجون ديال القصر اا مولاي
ليل تزاد معاه الزايد كيفاش حارس من حراس السجن هو لي حلل صوت طنين الآنية وعلاش هاد الكلام كان مطروز وفيه بحال التأنيب أو العتاب بطريقة لي تخليك تغضب من راسك وتحاول تراجع أفعالك وتصرفاتك مع الناس .. شكوكه مشات بعيد .. حرك راسه لأحد المحاربين لي دائما معاه باش يجيبو هاد الحارس .. حاس بالصهد ليل طالع ليه من شي قنت ثاني
