🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 2🍁
👑سلطان الصحاري👑
🍁 الجزء 8 🍁
هزات عينيها فأمها وخوتها هي كتقول ليها هربي وهي كتفكر ليها فغيابها هي ومنصور كيفاش غادي تتصرف .. خوتها قرايتهم فالمسيد والكسيبة نزلو دموعها بحرارة .. آه هي كتكره باها والقبيلة بالحق كتموت على امها وخوتها .. والحاجة لي كتفاهم هي ومنصور فيها هي حلمهم بأهداف خوتها والمراتب لي ما كرهوش يوصلو ليها ويوليو همة وشان وسط أقرانهم .. جرات نهار خوتها كتعنق فيهم وتعاود
وهزات عينيها لامها: فين غادي نمشي اا مآ .. ماشي حيت كنفلت فراس جبل معناه راه نقدر نزطط راسي فطريق بعيدة بين الغابة والصحراء وجبال اا مآ .. بابا قرر وانا كما مكتوب عليا ما عليا غير نفد .. واصلا هاد المرة هادشي فصالحي .. غا يبقا بالي معاكم غير نتوما
صدرات تودة ولادها ينعسو: كيفاش فصالحك اا بنت كرشي؟
هبطات نهار راسها وعاودت لها واقعتها مع ولد الشيخ واش دارت فيه خلات تودة كتنير وتعاود وهي عارفة إلى ساق الشيخ الخبار بنتها غا تودي فالحبس ومنصور بالخطية وهي الوحيدة لي عارفة علاش وهذا من بين الأسباب لي مصبرها على حماق منصور
هزات نهار راسها الفوق: اللهم نمشي حتى تهمد القضية .. انا عارفة بلعيد ما غايفضحش الأمر دبا حيت حتى هو غايتشوه .. بالحق غا يبقا يهددني كل مرة وندير ليه لي بغا .. ونهار نرفض يكشف الأمر لباه
نزلات تودة راسها ما فجهدها والو لبنتها .. ما عمر الجهد خطاها كانت دائما قوية وشجاعة بسبب نسبها .. بالحق من يوم ولادة نهار وهي ما عندها جهد حتى لمنصور راجلها لي عشرة سنين من عمر 12 سنة وهي عنده .. بقا غير الشيخ ديال القبيلة نائب سلطان بلادهم وسط القبيلة .. وهو كيقلب لتودة غير على السبب ويقد ينتاقم منها ببنتها نهار .. وهي لي عارفة اش كتقول
هزات كفوفها تودة للسماء: سيري يا بنتي مع باباك .. وحتى إلى جا المرسول فالطريق باش ترجعو للقبيلة سلتي اا بنتي وهربي ووياك ترجعي .. أرض الله واسعة وكبيرة وفينما دورتي وجهك تلقاي الله
وقفات تودة الآن ما بقا عندها ما تشد فبنتها خاصها تهرب من القبيلة ولا غادي تشوفها وهي كتموت قدامها هزات واحد الصرة صغيرة وقربات منها
هزات نهار عينيها فأمها ملي لقات الصرة فحجرها: اش هذا اا مآ؟
تودة: هادوك 2 gروش ذهبيين كان عطاهم ليا با واحد نهار كنت واقفة على لي يشجعني .. كان خداهم من عهد جد سلطان بلادنا الحالي .. قال ليا ما تبينيهم حتى نهار توقفي عليهم بالمعقول .. وحتى باباك ما عارفهم واش عندي .. واصلا ما بقاتش المعاملة بيهم دبا .. بالحق ما عرفتش حاسة بلي كانو نافعيني فنفسيتي .. حتى انا ها أنا عطيتهم ليك ومعاهم وصية با ليا ونزيدك عليهم رضاتي اا بنتي
عاود ترمات نهار فحضن ميمتها كيبكيو على الفراق .. وتودة ولات باغيا غير فوقاش يوصل الفجر باش يخرجو من القبيلة باش ولد الشيخ ما يقولش لي وقع .. لأنه بلعيد معروف بخبثه ويقدر يبقا يبتز نهار ويوصل معها لشي مواصل خايبين إلى بغاتو ما يفضحش اش دارت فيه .. لأنه هو ولد الشيخ والحق معاه ظالم أو مظلوم
فكل ديور الفلاحة لي نالو هاد الشرف ما كان نعاس لا ليهم ولا لعائلاتهم كلشي فرحان لأنه لي كيمشي يخدم فقصر السلطان كيرجع ويولي فالقبيلة من الطبقة المتوسطة وشي مرات الغنية gااع .. إلا فخيمتهم هو كان ناعس وأحلامه كلها على اشمن مشروع غادي يدير ملي يرجع من موسم الفلاحة فالقصر أما هي والأم ديالها كيجمعو حوايجها هاد المرة ماشي غير ديال موسم الفلاحة ولكن موسم اللا عودة موسم الهروب من القبيلة
نهار: اا مآ علاش ما نرجعش؟ غير يتنسى الموضوع ونجي اا مآ؟
هزات تودة عينيها بحال جمرة فبنتها: الموضوع عمرو ما غا يتنسى اا نهار .. سيري وما ترجعيش .. انا لي عارفة اش كنقول
ما فهمات من كلام أمها والو لي عارفة هو أنه عائلة الشيخ مع عائلة أمها بالضبط كانو على عداوة دائمة .. لدرجة زوجة الشيخ ولي هي بنت عمه شحال من مرة جات بنفسها حتى لعندهم غير باش تدل وتنقص من تودة بلا سبب .. وشحال من مرة الشيخ براسه كيعمر منصور على تودة تعمار ملي كانت نهار صغيرة ولكن السبب عمرها عرفاتو ظنات انه غير غيرة لأنه أمها جميلة ومن قبيلة أخرى وهمة وشان وجات غير حيت تزوجت بمنصور لي من هاد القبيلة
نهار: ونتي وخوتي اا مآ؟
تودة: خالك سفيان غادي يجي غدا يزورنا ونمشيو معاه .. وتما خوتك نيت يقراو أصول الفقه .. والكسيبة غادي نخليها للسارح .. نتي غير ارتاحي من جهتنا
🍁🍁🍁🍁🍁 سلطاناتي 🍁🍁🍁🍁🍁
اشنو المشكل بين عائلة تودة وعائلة الشيخ؟ واش نهار غادي تفلت منها ولا لواه؟
