🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 14 🍁
👑سلطان الصحاري👑
🍁 الجزء 79 🍁
الإعلان لي تعطى كان كله أوامر مطلوبة باش تنفذ على وجه السرعة شكون عطاها شكون آمر بيها حتى واحد ما قدر يعرف المهم تعطات وصافي والقادمين كانو هما لي جايين كما تم عليه فالإعلان ولكن هادشي ما كيعنيش بلي الخوف والخطر صافي سالا رجعو المحاربين لي مشاو مصخرين قبل لا يوصلو علموهم الحرس والمحاربين لي على حدود القصر بلي راه هما لي راجعين وما كاينش الخطر على القصر
الحارس المكلف بالاعلان: جناح مولاي السلطان لقمان رحمه الله يتوجد بأسرع وقت .. وتكون فيه لالة الحكيمة وسيد الحكيم .. كل الناس لي فالقصر تلتزم فأجنحتها .. هادو هما الأوامر لي وصلاتنا
طبعا خبار أنهم هما لي فالطريق مفرح .. ولكن علاش بغاو جناح مولاي لقمان وعلاش الحكيم والحكيمة .. كل السيناريوهات الخايبة جات لبال الغالية وحريمه .. واش يكون تآذى وسط النزاع واش تغفل .. واش واش أسئلة عديدة ومتعددة ولا جواب ليها من دون وصولهم والأمر باش يخرجو من أجنحتهم
دازت مدة طويلة نوعا ما وتحلو أبواب القصر الخلفية وتطلق صوت المزامير والطبول بوصولهم .. المحاربين والحرس كانت البسمة والفرحة على وجوههم بشوفة السلطان وعبد الرحمان .. ولكن الغريب هو شكون الشخص لي هاز السلطان بين يديه .. هبط عبد الرحمان مرة ثانية ومدها ليه ليل وكيف هبط خداها ثاني من عنده .. والوجهة كانت هي جناح الأب دياله أما عبد الرحمان مشا عند القمر دياله .. عارف حالتها كيف غادي تكون وما تهونش عليه يخليها فحالتها المبكية .. أما ليل أوامره كانت مقصودة ما بقات عنده حتى ذرة من الثقة فحريمه ولا فناس القصر .. مشا بيها حتى للجناح ولكن داز من الطريق الخلفية ما بغاش يدوز من وسط القلعة داز من جهة حديقة الأشجار .. مع الدخلة مع بانت ليه الأم دياله تما وقفات مفزوعة ما عرفات تفرح ولا تبكي ملي عرفاتها من حوايجها وشعرها لي مدلي مساير مع خطوات ليل
الغالية ناضت بسرعة ويديها على خدود ليل: ولدي الغالي الحبيب
هبط عندها ليل مسلم ليها وجهه كتبوس وتعاود .. هز راسه باس جبينها وهي هبطات عينيها لنهار لي كانت مرهقة وواضح أنها فقدت دم كثير من وجهها لي اكتساته صفورية كثيرة .. دخل بيها وحطها على السرير وكيف حطها على الوسادة .. القلادة لي كانت مبرزطاه طول الطريق وحتى فاش كانت تما غير ما كانش عنده الوقت يشوفها .. طلعات لرقبتها وتوضح اشنو كان فيها كأنه الصاعقة ضرباته .. بلا ما يثير الشكوك حلها لأنها كانت مربوطة غير بالخيط ودارها وسط كفه مزير عليها .. وأمر بدخول الحكيمة مع الحكيم وبقا هو واقف عند راسها وبجنبه الغالية باغيا تعرف اش وقع معاهم وما قادراش تتحصر ساكتة على حالة نهار
الغالية: علاش اا بنتي ما سمعتيش كلامي علاش؟ .. هما رجال كيفهمو فالقتال ونتي ااش دخلك معاهم اا نهار؟ .. كون غير سمعتي كلامي غوت حتى تجرح صوتي .. ونتي ولا فهاد العالم خرجتي كافرة من القصر .. علاش اا نهار علاش؟
