🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 3 🍁
👑سلطان الصحاري👑
🍁 الجزء 18 🍁
كانت مختلفة على كل البنات لي جاو للقصر من قبل .. بحال قوتها وصلابتها وشخصيتها فعلا كيحتاجوها داخل القصر بالحق حتى كيخدمو ليهم على ديك الشخصية أما نهار جات من الاول بشخصية قوية وما عندها لا خوف ولا كتحتاج رقابة .. حاجة وحدة خاصاها وهي الاحترام اتجاه ناس القصر باش تشد بلاصة وتكون من الحرس أو مرافقات شي سلطانة من السلطانات .. بالحق على لسانها السليط وتصرفاتها الغير متوقعة بالإضافة لانها ما عندهاش خبرة ومعرفة بعالم القصور والمعاملات داخله
هزات عينيها فمغنية: لقيتهم كيفتشو ليا فحوايجي .. وراه باين الظالم من المظلوم .. شوفي بلايصهم فين وهما فين .. شكون جا لعند الثاني؟ والبنت لي حاولت باش ما تخليهمش يقيسو فحوايجي تعداو عليها
مغنية خنزرات فالبنات: اش هاد الصنعة جديدة؟ يالاه كلشي يهبط للدباغة
خرجو عينيهم ونقزات وحدة منهم هي لي كانت كتفتش: لا اا لالة مغنية انا ما نقدرش .. طالباني مولاتي نزل معها للخصة ننظم ليها الكلام
هزات مغنية صوتها: لي عندي قلتو .. ومولاتك إلى بغيتي تبقاي فجنبها وعزيزة عليها نقصي من طيرانك وخفة يدك ولا عمرك تحلمي بالجلسة جنب شي سيدة من سيدات القصر .. سمعتيني؟
هبطات راسها عارفة لا كلام فوق كلام مغنية فجناح الجواري: واش المعمول دبا اا لالة مغنية .. اشنو نقول لها؟
بلا رحمة ولا شفقة: أولا اعتاذرو من نهار .. ثانيا هبطو لدار الدباغ .. انا نتكلف بمولاتك ونرسلك ليها من بعد صلاة الظهر إلى بقيتي متبتة
حسات نهار بالانتصار ملي بداو يعتاذرو منها وحدة وحدة ومن البنت لي كانو شادينها وهي لي قريبة لها فالسرير .. ولكن ما دامتش فرحتها أكثر
مغنية: ونتي اا نهار .. ماشي كلمة جوج تبيني لينا صحتك وقوتك .. راه ماشي أرض حرب هادي .. اعتاذري حتى نتي منهم .. وهبطي للكانون نتي وفرحة (البنت) غا تعاونو فالطياب اليوم
خرجات عينيها باغيا تدافع على راسها: ولكن راه هما لي ....
قاطعاتها: راني هضرت معاك .. يالاه اعتاذري منهم
ما حملاتش راسها علاش تطلب السماحة وهما لي كانو يقلبو ليها بين حوايجها ولكن فالاخير اعتذرت منهم .. هما خرجو وبقات مغنية وحاشيتها مع نهار وفرحة .. هاد الأخيرة لي مشات جبدات واحد الكسوة سوداء مع طابلية وشال بنييين الواضح انه كل عمل هنا عنده لبسته الخاصة
شيرات مغنية لوحدة من البنات جابت عرام ديال الملابس رماتهم فوق سرير نهار .. البارح ملي دوشو لها وبدلو لها هزو عليها حتى العبار ودبا ها هما جابو ليها ملابس .. منها لي زوينة وفيها أحجار وبريق .. ومنها بحال لي لبسات فرحة دبا ولي لبسو حتى البنات لي مشاو للدباغ كما قالت مغنية
مغنية لفرحة: مزيان اا فرحة .. بنتي ليا وأخيرا ارتاحيتي لشي بنت .. ونيت حتى هي غريبة على عالم القصر .. فقهيها وعاونيني عليها باش تتعلم بسرعة .. مفاهمين؟
حركو لها بجوج راسهم نهار عاد عرفات بلي مغنية هي الأخرى عندها مكانة فهاد القصر حيت فاش دخلات البنات كلهم ترعدو وتحناو ليها .. وهاد الحركة فهمات انه كل واحد فوق منه شي حد كيتحنا ليه .. والحد الآن هما أضعف حلقة فهاد السلسلة
مغنية: يالاه لبسي .. ما تخليوش الطباخة تسناكم أكثر
هي ضارت مشات وفرحة جات كتجمع ليها دوك الحوايج باش تديرهم فالصندوق أما نهار قصدات واحد الكسوة ديالها مقطعة ومرقعة بثوب آخر وبين داك الرقعة تما فين حاطة الgروش لي عطاتها أمها وحاجة أخرى .. تلمساتهم وتبسمات براحة ملي لقاتهم باقيين .. عاد ضارت لقات فرحة جمعات لها حوايجها وسط الصناديق لي تحت السرير ديالها
فرحة: ياك عطاتك لالة مغنية القفل والساروت؟
نهار بعدم اهتمام: ااه
فرحة: وعلاش تخلي صوالحك مترعين باش هما اصلا يجيو يقلبو فيهم؟ اجي جمعي داكشي لآخر وسدي
تحنات ليها نهار مقلداهم خلات فرحة كتندب وتدور تشوف ياكما شي واحد شاف حركتها لي تقدر تخليهم يدخلو فعقاب هاد النهار
سدات كما قالت لها فرحة وخرجات لابسة بحالها الفرق انه فرحة كتمشى سوية على الطريق أما نهار كدور من هنا وهنا باغيا تشوف اش باقي ما شافتش حاسة بلي هاد القصر بوحدو يدير العشرات من قبيلتها ومن حتى المدينة لي دخلو عليها .. باقي غادية هي وياها يطلعو من دروج ويهبطو من آخرين .. حتى تدق طبل وتسمع صوت قوي خلى فرحة تتحنى وتهبط راسها ما بقات طلعاته .. أما لالة نهار بقات مطرطقة عينيها
الشخص: دستوووووووور
🍁🍁🍁🍁🍁 سلطاناتي 🍁🍁🍁🍁🍁
بقات فيا انا غير هاد فرحة غادي تشريها ليها نهار
شكون هذا؟
