🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 23 🍁
👑سلطان الصحاري👑
🍁 الجزء 133 🍁
الرجفة كانت شاداها ديال الحمى .. من صبعها الصغير طالعة .. صافي من قصة نهار غا يزيد يبحث .. أصلا هو كان كيبحث ودبا غا يكمل .. ملي خرجات من جناحه جات لجناحها وتكمشات .. حتى العشا سمحات فيه وتركنات .. حتى طلعاتها الحمى
ما فاقت غير على محجوبة كتفيقها .. ناضت مدهشرة ظنات واش صافي تفضح السر .. ولكن ها هو تفضح ماشي بهاد السرعة غا يوصلو لها .. شافت فمحجوبة لي خايفة لولا إصرار الشخص .. ما كانتش تجي تزعج نعاسها وهي مريضة
محجوبة بإعتذار: لالة مولاتي الغالية .. غير سمحي ليا .. بالحق راه واحد المرأة برا .. ما عرفتش كيفاش دخلات بين الحرس .. قالت بلي إلى قلنا لك بلي جات وما علمناكش .. تقدري تطردينا اا لالة مولاتي .. داكشي باش جيت فيقتك
باستغراب: شكون هادي؟
محجوبة: قالت إسمها الحكيمة دامية
جات قافزة الغالية من بلاصتها وقفات .. هزات لي لقات قدامها رماتو عليها .. وخرجات سابقة محجوبة كتسائل فينها .. لقاتها دخلات وجالسة فصالة الإستقبال
شافت فيها دامية مغوبشة: ضاغي جيتي نعستي بلاصتك .. حتى لدبا عاد بغيتي تخلي الأمور كما بغا ربي تمشي
شافت الغالية فالخدم لي فهمو راسهم وانساحبو .. بقات غير هي وياها الراس فالراس .. مدات لها دامية واحد العشبة شرباتها تهبط لها السخانة .. وبقاو شوف فيا ونشوف فيك ا طاجين الحوت .. الغالية فمها تلجم ودامية كتخمم وتهندس
دامية: أول حاجة ديري شي حاجة مزيانة لي يتعقل عليك بيها هنا .. ولي تخلي ولدك واخا يعرف الحقيقة قلبو يحن ليك .. شي حاجة لي ما يقدر حتى واحد يديرها
الغالية بتفكير طويل: ايييه اا لالة دامية .. الشيء لي بغيت أنا دبا .. ماشي غير باش ولدي يسمح ليا .. ولكن خاص هاد الحقيقة تبان ولا بد منها .. وما يبقاش هاد الظلم ديال الكبار .. يخلصوه الصغار في الحقيقة .. خاص مغنية تاخد حقها، حق الأمومة .. واخا هي خايفة على ولدها ملي يعرف .. ولكن خير لها يعرف منها هي ولا يعرف من قنت آخر .. طال الزمان ولا قصار السر كيتفضح والجرح كيكون عميق
شافت فيها دامية بعدم فهم: اش غادي ديري؟
هزات راسها بسرعة: خاص العالي يجي ولد مولاي امبارك
دامية: حتى هو عنده شي سر؟
هزهزات راسها الغالية: أمه ماشي هي حدوم .. هما شفروه لمغنية هو ولدها .. من مولاي مبارك نيت
استغربت دامية: وهي عارفاك عارفة؟ كيفاش غا تعلمي الولد؟
الغالية: العالي كيعرفني مزيان .. ومن ديما عزيز عندي حتى قبل لا نعرف .. والأصح أنه يجي ونخبرو بالأمر بيني وبينه .. وعلاش أمه بقات ساكتة السبب والدافع ديالها .. خاص مغنية تاخد حقها ويرجع ابنها لحضنها .. واخا غير فالخفاء اا لالة دامية .. لأنه هي سكوتها كان غير لمصلحة ابنها .. مغنية ظلموها بسلطتهم هي وابنها .. بالحق حنا ظلمنا أولادنا بيدينا .. ولكن رغم كلشي كيجيوني قصصنا متشابهين حيت فيهم أولادنا .. وأصلا السر قرب يتفضح نهار راه مع ليل
