🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 8 🍁
👑سلطان الصحاري👑
🍁 الجزء 44 🍁
البكاء من وراء الميت خسارة .. حتى واحد ما عارف اش وقع لنهار من غيره هو وأمه وخدمها وحرسها لي هدداتهم باش الخبر ما يخرجش برا .. كيف بان ضوء الصباح قصدات جناحه مباشرة من بعدما تجهزت كعادتها .. عقلها مرفوع علنو عليها ومع دخلات لقات جوهرة تما كتقلب فسلهامها وتعاود باغيا غير طول معاه الجلسة .. غير سمعات وصول أمه تكرهات حيت غايكركبها دبا .. وقفات قدمت ليها التحية .. والغالية كانت مركزة فيها الشوف كتقلب على شي حاجة فوجهها تأكد بيها كلام نهار لي متأكدة أنها سمعاته .. وملي ما بان لها والو قررت تختابرها
الغالية: مولاي .. مزال ما مشيتي عند زمرد .. اليوم غا تشوفها الحكيمة
تفاجئ من أمه وباستغراب: مزال؟!
كتهضر وعينيها على جوهرة لي رغم أنها رسمت الإبتسامة إلا أنه وجهها تحقن بالدم وعينيها تغرغرو بكره وحقد .. كلشي هادشي شافتو غير هي أما ليل ما متيقش اصلا
الغالية: مزيان نيت نمشي انا وياك .. جوهرة تبغي تمشي معنا؟
صرطات ريقها مكرهة: ما كرهتش اا مولاتي .. بالحق الليلة ليلتي مع مولاي .. وبغيت نتجهز ليها ونوجد جلسة تليق بمقام مولاي
عطاتها الإذن باش تخرج وتبعات ليها العين تحت نظراته .. وغير ضارت أمه عقد حواجبه باش بلا ما تحاول تطلبه على نهار لأنه مستحيل غادي يقرر عقابها وغادي تدوزو ولباس .. لأنه تجاوزت حدها معاه وأمام الخدم .. هي غير يولي حتى هو خادم ويطلق كلشي ويخليها سايبة بلا حكام وصافي
الغالية: أنا شكيت فجوهرة اا مولاي .. بالحق إلى بغيتي تحكم على نهار حكم بالعدل .. وما تدخلش غضبك من حكم البارح فالحكم عليها .. يالاه نشوفو الحكيمة اش قالت لزمرد .. غاتكون كتسناك
سبقاته مخليا كلامها داير خدمته فعقله .. بدل عليه وخرج يديه خلف ظهره .. القيادة والحكم كيخرجو من حركاته وهيبته .. وصل لجناحها لقا الحكيمة لي كانت كبة من الشيب بدات كتقلب فكرشها من هنا لهنا وام زمرد والغالية واقفين منتظرين بابتسامة أما عم ليل (آب زمرد) كيتمنى أنه حفيده هو لي يكون خليفة ليل فالحكم .. وبنته تولد الولد هاد المرة .. لأنه مرتين ولدت بنتين وكيموتو ليها ماشي حتى عاشو .. وزوجاته الأخريات حتى هما فايت ولده شي ثلاثة منهم كلهم بنات وكيتوفاو .. والسبب ما عارفينش اشنو هو .. رغم أنهم واخا كيكونو بنات ليل كيعلنها وكيفرح بيهم ولكن عمرهم عاشو ليه كيموتو صغار
كان الكل كينتاظر .. وقفات الحكيمة بتعب واضح عليها ما على وجهها حتى شي تعبير .. زمرد عينيها كانو مغرغرين اصلا هي حاسة بلي نفس الحاجة بحال حمالاتها بجوج بحال هذا .. حاسة أنها بنت لكن البقية كلهم مزال عندهم أمل
الحكيمة بصوتها الشيباني: بان ليا اا مولاي .. مزال ما لقيتي البنت لي فعلا بغاها قلبك ماااشي عقلك .. باش تحط فرحمها .. لي يحكم من بعدك
من كلامها بان المعنى وعرفو أنها بنت .. كلشي تقلق إلا هو فرحان عادي عنده وقتما بغا يجي هاد الولد يجي .. وبنته أكيد غادي يفرح بيها ويهزها فكفوف الراحة حتى يجي خوها .. خرجو كلهم عمه غضبان وأمها حتى هي أما الغالية فبالها غير نهار والكلام لي قالت على جوهرة متأكدة أنها ما غاتكدبش عليها لله في سبيل الله .. ومكرهة لا من زمرد ولا جوهرة غير كتنافق وهي لي عارفة علاش
قرب ليل من زمرد لي كتبكي: علاش البكاء ااا بنت عمي؟ ممم علاش تخلي بنتي تحس بلي نتي ما باغياهاش؟
زمرد: بغيت نعطيك ولد من كرشي اا مولاي .. علاش ما بغاش يجي .. واش كلام الحكيمة على حق اا مولاي؟
حرك راسه بلا حول: واش اا زمرد ما عارفاش بلي الحاكم .. خاص يبغي بعقله ماشي بقلبه .. الحاكم كيخلي من وراه حاكم لي يكون أحسن منه لي يزيد بالبلد القدام ماشي يرجعها اللور .. داكشي باش بغيت ولدي الأول منك .. يكون من سلالة الحكام لا من الأب ولا الأم .. أما بالنسبة لقلبي .. نفس المحبة لي عندي ليك هي لي عندي لكل وحدة منكم ما كاين تمييز ولا تفضيل
هبط قبل جبينها وناض خارج مخلي خديمها يقادولها حالتها أما هو من تما لقاعة الحكم جمع دوك لي بغا فقط .. طلب اجتماع مغلق معاهم
🍁🍁🍁🍁🍁 سلطاناتي 🍁🍁🍁🍁🍁
اش بان ليكم فكلام الحكيمة؟ واش بغا يدير مولاي ليل
علاش الغالية ما حاملة حتى وحدة من حريم ولدها بالسلامة وغير كتتافقهم
