🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 8 🍁
👑سلطان الصحاري👑
🍁 الجزء 45 🍁
الاجتماع لي طلب جاهم غريب لأنه ما كاين حتى مشكل حاليا .. اييه كيستاعدو لواحد الحرب ولكن مزال بعيدة .. بقا بالهم كيدي ويجيب ويفصلو ويخيطو .. حتى دخل عليهم للقاعة بملابسه البهية وطلته الملكية .. كان مستدعي غير عبد الرحمان، أحد أبناء عمه الكبار ولي فجنبه، واحد من علماء الدين، وكبير القضاة والنائب الأول عليه وقت غيابه .. الشيء لي خلاهم يظنو أنه المسألة كبيرة بزاف
حرك ليهم راسه باش جلسو: تفضلو .. تفضلو .. حممم .. جمعتكم اليوم على قبل واحد الحادثة وقعات البارح .. مع البنت لي جابت دلائل على محمد باشا
عاود ليهم بالمختصر والمفيد بلا ما يدخل فالتفاصيل .. دخلهم فدائرة ديال التلفة وفالاخير كلهم ترصاو على قراراتهم .. طلب منهم كل واحد يكتب الحكم لي يقد يعطي فهاد الحالة باش حتى واحد ما يغير رأيه ملي يسمع الآخرين .. لأنه فعلا هو ماشي فحالة أنه يخرج شي حكم عارف الظلم لي غادي يرتكب .. لأنه هو دائما فاش كيكون عنده شي حكم من ورا ما كيكون يالاه حكم بالإعدام على شي واحد كيأجلو ولا كيعين شي واحد آخر لي يحكم مكانه .. وهاد الشيء لي بغا يدير معها بلا ما يظلمها .. جمع الحارس كل الأوراق لي كتب كل واحد من الحضور جابهم ليه .. حطهم قدامه كيشوف ما عارفش باش يبدأ .. وأكد عليهم حتى واحد ما يكتب اسمه .. واخا هو راه غير من الخط يقدر يعرف شكون صاحب الورقة
مد يديه لأول وحدة كيقرى عليهم: سيادنا .. أول حكم من ديالكم قال فيه مولاه .. بلي هاد البنت مزال ما تعلمت أصول القصر .. ولكن خاص تعاقب على التقليل منك اا مولاي .. الحكم عليها حسب تجربتي المتواضعة معاكم .. 4 أشهر
هز ورقة وحدة اخرى: ثاني حكم .. البنت مزال ما تعلمات أصول القصر اا مولاي .. ونفعاتنا اا مولاي .. 3 أشهر
هز ورقة أخرى وأخرى حتى وصل لديال عبد الرحمان: مولاي البنت عرفنا من الاول أنها غادي ترتاكب أخطاء .. مولاي هاد البنت ما خاصش نحكمو عليها حتى تتعلم وتعرف حدودها وسط القصر .. راه بحال مثال ديال واحد غير عاقل نهار يعقل نحاكموه
عرف مول هاد الخط وحتى لو ما كانش الخط كان يعرف بلي عبد الرحمان هو صاحب هاد الحكم .. هو وشي جوج ديال الناس لي ما بغاوش نهار تتحاكم والبقية حددو ليها الحكم بين شهر وأربعة أشهر .. ولكن هاد المرة غادي يقرر حتى هو معاهم
بقا مهبط راسه كيخمم ويخرص ما عارف بشحال يحكم عليها اكيد راه ما غايدوزهاش ليها مستحيل خمم حتى خمم وهز عينيه لقا الكل مترقب حكامه على هاد المخلوقة
ليل: لحد الآن غادي نحكم عليها بشهر .. ونشوفو واش السلوك ديالها غايكون مزيان فهاد المدة .. وإلا فالعقوبة تقدر تتضاعف
خلاهم كيشوفو فبعضياتهم ووقف خلى الكل يوقف معاه احتراما ليه .. خرج ومعاه عبد الرحمان أخوه فالرضاعة، صديق طفولته ودراعه اليمين
عبد الرحمان: مولاي .. البنت عرفناها بلي مزال ما تعلمات أصول القصر .. والأخطاء لي دارت اا مولاي
قاطعه ليل: عبد الرحمان .. ديك البنت غوتات فوجهي .. تدخلات فأموري الشخصية .. بلا ما نهضرو على السرقة من بيت الحريم ديالي .. ومزال كتغوت وتجابه وكأنني صاحبتها
عبد الرحمان واخا هكاك بقات فيه: انت تعرف اا مولاي .. بالحق راه انت عارف بلي من بعد الحكم بالإعدام .. دائما كتكون فحالة صعيبة وعصيبة
بقاو ساكتين شوية وهو يهز ليل عينيه فعبد الرحمان كيتفحص نظراته قبل لا يطرح عليه السؤال .. بغا يقرى الجواب فعيونه قبل ما ينطق بيه بفمه
ليل: عبد الرحمان!! ياكما هاد البنت دخلات عقلك؟ واستوطنت قلبك؟
هز يديه باعتراض عبد الرحمان: لا اا مولاي .. انت عارفني .. القلب تشغل بوحدة وانت عارف هادشي مزيان .. وإلى سمعات غير بالغلط هاد الكلام نمشي فيها
ضحك ليل على عبد الرحمان لي متزوج ببنت عم ليل نيت .. من الصغر كان معجب بيها وبقا داك الإعجاب فتطور .. ما تهنى حتى ظفر بقلبها وحبها بالنسبة ليه هي الكل فالكل
تبسم: واا أنا مزال ما بغات تدخل ليا لراسي .. أنه عبد الرحمان القائد الأعظم لجيوش المملكة .. لي بفضله انتصرنا فأضعف حالاتنا على جيوش قوية .. كينهزم قدام قمر
🍁🍁🍁🍁🍁 سلطاناتي 🍁🍁🍁🍁🍁
ها العار لما فك ديك الزغبية اا مولاي عبد الرحمان .. واخا تديرها زوجة ثانية
