🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 4 🍁
👑سلطان الصحاري👑
🍁 الجزء 19 🍁
كانو خرجو من جناح الجواري والخدم وبداو كيدخلو مع الأجنحة ديال الوزراء والأقارب ديال السلطان الشيء لي كيخلي داك الشخص أو الحارس يعلم بتواجد أحد هاد الأفراد على الطريق باش إلى كانت شي خادم أو جارية تؤدي التحية .. ولكن نهار ما فراسهاش هادشي بقات هازة راسها أولا خلعها الحارس ثانيا باغيا تعرف شنو واقع
الحارس: دستوووووووور .. الوزير الأول محمد باشا على الطريق
ما بقا لفرحة ما تعتق بغات غير تجرها باش تهبط ولكن هما راه خرجو فحاشيته نيشان عاد نهار كانت خلفها بخطوات كثار .. فرحة خافت عليها وعلى اشمن عقوبة غادي تاخد ما عرفاتش علاش هاد البنت ما عندهاش الزهر لهاد الدرجة وملي جات وهي فالمصائب
كان غادي يدوز حتى وقف ما عرف حتى اشمن قرار ياخد فحق هاد خيتي .. تصدم حيت عمرهم ما صادفو بحال هاد التصرف .. ماشي أميرة ماشي سلطانة ماشي وحدة من زوجات السلطان ولا من أقاربه ولا حتى من عائلة الوزراء .. علاش هاد الوقفة الثابتة والشوفة الحادة .. ثقتها بنفسها واضحة غير من وقفتها علاش بالسلامة ما عرفش
أما الحراس لي معاه حتى هما تصدمو من تصرف هاد الجارية أو الخادمة حيت غير من لبسها راه كان كلشي واضح .. فرحة باقي فوضعها لأنه ما عندها كيفاش تهضر بلا اذن
الوزير لحارسه الاول: شكون هادي؟
الحارس: الواضح أنها شي خادم جديدة اا مولاي .. يمكن ما عارفاش قوانين القصر
قلب عينيه الوزير لفرحة: قولها تقرب
رغم أنها سمعاته إلا أنها بقات ثابتة فوضعيتها حتى استدعاها الحارس .. هادشي كله كيمر تحت انظارها جاب لها الله بحال الى كتشوف شي مسرحية تاريخية قدام عينيها
الوزير: عرفي براسك؟
وقفات مقادة ويديها جمعاتهم قدامها وعينيها بقاو فالارض .. أما نهار تمشات وتقابلات مع فرحة لأنها عطاتها بالظهر وهي مزال باغيا تشوف كمالة هاد المشهد .. وقفات جنب الوزير تقريبا الشيء لي زاد فاستغرابهم كلهم وخوف فرحة وغضب الوزير
فرحة بدات غير كتمتم: أنا اا سيدي فرحة من خدم القصر .. مكلفة بنظافة جناح الطيور
عطا إشارة للحارس لي جا جر نهار ووقفها قبالة الوزير جنب فرحة
الوزير: ونتي شكون؟
بكل بساطة: أنا نهار
غير حشمات باقي تقول ليه وانت شكون .. خلات دمه يفور على الصباح وهو تابعو شلا مطارق ومشاكل أما يلوحها من فوق هاد الصور تجي للارض ميتة .. جر سلهامه بالنترة وزاد خلفة وهو كيعطي أوامر لدوك الحرس لي معاه .. خلاها متبعة ليهم العين أما فرحة جراتها وهبطو مع أقرب دروج كتجرها حتى كانت غادي طيح على فمها .. ونهار ولات بين الحرس والعبيد هي موضوع الساعة
وقفات فرحة عند الدخلة ديال المطبخ: واش حماقيتي .. اليوم يطير راسك اا المصخوطة
عاد حسات نهار بالخوف: علاش؟ مالي شنو درت؟
فرحة ولات كتهضر بالاشارة: واش عرفتي هداك لي الفوق تلاقيناه شكون؟
نهار مزال ما فاهمة والو: شكون يكون؟
فرحة ضحكات بغصة: الوزير الأول ديال مولاي السلطان .. وباينة غير عنده شي شغال أما كان يآمر بتنفيذ الحكم عليك .. بالحق لا تحسبيش راسك فلتي .. زيدي وكان على الله لالة مغنية تلقا ليك شي حل اا بنت الناس
حسات برعب شديد وملي دخلو للمطبخ هي غير ساهية ولي طلبات منها الطباخة كديرو بلا عقل بلا تفكير .. كانت غير ساكتة وكتنفد الأوامر وعقلها كله غير مع العقاب لي غادي تاخد .. وكيفاش غادي يتقطع راسها ما رضاتش البال للاعلان لي تدار بصوت مرتفع كيعلنو على دخول مغنية
مشات طايرة عندها فرحة كتشوف فنهار لي كتحرك بواحد العود كبير وغليض فواحد الطنجرة كبر منها وغير ساهية
مغنية جمعات حواجبها: ياااك لباس اا فرحة؟
عاودات ليها لي وقع خلات اللون يمشي من وجه مغنية هزات عينيها فنهار .. ما عرفاتش علاش بقات فيها واش حيت قصتها مشابهة لديالها تقريبا .. الفرق انه مغنية كانت خوافة وما كتقدرش تدافع على راسها أما نهار العكس ديالها تماما ما كتسكتش وما عارفاش كيفاش تتصرف
🍁🍁🍁🍁🍁 سلطاناتي 🍁🍁🍁🍁🍁
اش غا يوقع للزغبية .. واش الوزير غادي يكحل ليها الضواصا مع السلطان ولا غادي يدير شرع يديه؟ ويكون عقابها شيء آخر؟
