🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 18 🍁
👑سلطان الصحاري👑
🍁 الجزء 103 🍁
كلامها كان صدمة ليهم كلهم .. أولا ل ليل منين هي عرفت هاد المساومة .. ثانيا للغالية كيفاش هي موافقة على اش علاش هي ما فراسها والو .. ولكن لي كانت الضربة قاسية عليها هي قطرة الندى .. فعلا جسدت إسمها بكل معانيه من بعد سماع هاد الكلام .. سقطت على الأرض بحال شي قطرة الندى .. بكل رقة ورهف البنت ما قدراتش تستوعب اش خرج من نهار .. كيفاش هي موافقة على الزواج .. إذن هو قدم عرض زواج لهاد البنت لي هي ما عرفاتهاش شكون .. وكيفاش الحرب غادي تنتهي بينهم إلى وافق على تزويجه بها .. صعيب عليها تهضم هاد الكمية من الصدمات .. واش ضغيا سمح فحبه ليها وحبها ليه .. كانت سخفانة ولكن واعية مزال عقلها قادر يحلل .. مزال منتاظرة أجوبة لأسئلتها حالتها كانت حالة .. هنا عرف ليل الحب لي فقلب أخته لمناجي .. ولكن واش مناجي يستاهل هاد الحب هو ما عارفش
نهار كانت تحت تأثير الصدمة وغير فاقت خلات ليل بلاصته وطارت عند الغالية .. لي حاطة رأس قطرة الندى على فخضها .. كتحاول تفيقها أو تلقى شي ردة فعل منها .. ولكن والو قربات نهار كتحاول هي الأخرى معها .. وفعلا نجحت فالأمر وحلات فيها عينيها هي الأولى .. وجا سؤالها
قطرة الندى: واش كتعرفي مناجي؟
نهار خدات وجهها بين يديها: ماشي بالضروري نعرفو .. المهم هو توقف هاد الحرب .. إلى كان غادي يرتاح بقتلي حيت قتلت خوه .. ويخليكم عايشين بخير ما عنديش مشكل
خرجات قطرة الندى عينيها ويالاه غادي تطرح سؤال آخر .. جا ليل بحال شي عاصفة جر نهار من دراعها .. وقفات بجهد باش هزها جات واقفة على رجليها .. وجرها لجناحه هاد المرة كيأكد على أمه .. باش تبات هي وأخته فجناح الأب دياله .. يمكن هذا هو الاعتذار لي يقدر يقدم لأخته .. باعتبارها هي الأخرى غالطة
ما قدراتش تتنفس بالسرعة باش غادي بيها .. كانت كتحاول تسايره بالحق بزاف عليها .. عاد هو جارها بحال شي جرتيلة هكا حسات هي .. ما عارفاش كلامها اش نوض عليه هو .. علاش حتى الناس لي كيتيق فيهم كيبغيو يصغروه .. ما بغاتش تفهم ليه هاد المسألة بالحق نهار مجبرة باش تعطيه الجواب .. اليوم وفهاد اللحظة .. علاش هو كيقلب على الحل باش يحمي الكل .. تجي هي تسممو بهاد الكلام؟ وعلى اشمن أساس بناته أصلا .. ومن بعد داك الإرتباط لي حاس بيه كاين بيناتهم .. كيفاش كتصور أنه غادي يسلم فيها بلا ما يوصل لحل اللغز .. بل هو شك فمناجي حيت اختارها هي .. ربما عارف أشياء أو وصل ليهم على نهار وعلى علاقة جده بجدها .. داكشي باش بغاها هي بالضبط والمسألة ماشي مسألة معركة وبس .. باغي يحرق دم ليل وهادي طبعا راه حرب من نوع آخر .. غادي توقف الحرب ولكن غادي يبقا الإنتقام بهاد الطرق
