🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 3 🍁
👑سلطان الصحاري👑
🍁 الجزء 14 🍁
ملي بانو ليها مصرين وهي حصلات حصلة ديال الكلاب وهادي راه بلاد السلطان عرفات راسها ما عندها حتى شي مهرب أو مفر بقات كتشوف فكل واحد ونظراته الغاضبة .. وبلا سابق إنذار هبطات اللتام من على وجهها قدرو من وجهها وملامحها يقدرو انه ماشي وجه راجل أو شاب .. ولكن بعد مرور دقائق قدرو يفهمو أنها بنت .. العجيب انهم ما استغربوش الأمر وكأنهم معتادين على بحال هاد الحالات .. هداك الحارس لي دخل عليهم خرج وسمعاته حتى أعطى الاذن لهادوك باش يمشيو أو يديوهم الحراس لفين خاص يمشيو .. وهي بقات كتشوف فدوك جوج لي هما بدورهم باين واش عندهم ليها أسئلة كثيرة ومتعددة
جلس الحارس على كرسي: جلسي اا بنتي .. جلسي فوق داك الكرسي
جلسات كترعد وهي كتشوف فالآخر جبد كناش آخر استغربت من هادشي لي كيوقع قدامها اش غادي يديرو معها ما سولوها ما والو ما فهماتش اش كيوقع
الحارس: اسمك الحقيقي .. واش نتي بنت هاد المسمى منصور نيت .. وعلاش جاية متنكرة للقصر؟
ما عرفات كيفاش تجاوب على السؤال الأخير الشيء لي خلاها مبلوكية مدة غير كتشوف فيهم حتى تحل الباب ودخل نفس الحارس ومعاه جوج عيالات .. بان عليها الخوف الشديد وباغيا تخرج من هنا سالمة يفوتوها غير الغابة تمشي فينما مشات ولا يخليوها تفلح مع باها وترجع معاه المهم ما يديرو ليها والو
هزات راسها بخوف: اسمي نهار .. وانا فعلا بنت منصور هو بصح بابا .. جابني معاه حيت خوتي الاولاد مزال صغار .. وانا كنفهم فالفلاحة وبابا ما بغاش يضيع هاد الفرصة لي سنين وهو كيتمنى انه تعطا ليه
زممو داكشي وخرجو الرجال لي تما بقات هي ودوك جوج عيالات كل وحدة قداش ولابسين لبسة موحدة .. ما فهماتش واش حتى هما حرس ولا اش يكون بقات غير كتشوف فيهم
شيرات الكبيرة فيهم للثانية الواضح أنها هي الرئيسة: قلبيها
خرجات نهار عينيها وجات الأخرى ملبية الأمر .. وقفات نهار وبدات كتقلب فيها امروها باش تحيد حوايجها يشوفو واش محزمة معها شي حاجة .. الحاصول فلاوها حتى من شعرها قلبوه عاد خلاوها تلبس حوايجها وخرجات وحدة منهم عند الحراس برا بعد مدة ثاني دخلو عندها كلهم وبان ليها واحد منهم هاز الرزمة ديالها يمكن قلبو وعرفوها من الحوايج مدها ليها .. وهي فرحانة وأخيرا غادي تتحرر
خرجات من تما برفقة دوك جوج سيدات دايرينها الوسط كأنها معتقلة وغاديين بيها داخل القبيلة .. كان الكل كيشوف فيها بغرابة لأنها جديدة على المكان وغريبة .. لا من ملامحها ولا فصالتها ولا ملابسها .. كما هما استغربوها حتى هي استغربتهم .. ماشي بحال الناس ديال القبيلة هادو مختالفين من حيث اللباس والملامح ..
بقات غادية مع دوك العيالات وهي ما عارفاش فين غاديين بيها حتى لقات راسها راكبة فواحد العربة هي وياهم وغاديين وكيبعدو على ديك القبيلة .. حسات بخوف رهيب واش هادو غادي يدبحوها ولا اش باغيين يديرو علاش مبعدينها من القبيلة
سكتات حتى عيات وضارت كتشوف فيهم: فين غادي تديوني (بدات كتبكي) أنا والله ما درت والو .. والله ما درت شي حاجة
ما جاوبوهاش لا هما حياوها ولا قتلوها .. حتى كتبان ليها شي حاجة عالية أمامهم من النافذة ديال العربة .. هبطات راسها شوية لتحت حتى كيبانو ليها نفس الاعلام لي كانو كيبانو ليهم من البعد ملي كانو جايين .. شوية دخلو بين واحد الطوالة ديال الأشجار المثمرة وحدائق كبيرة بألوان زاهية وجميلة وديك الطريق كانت حتى فالمشي عليها مختلفة كأنه مهد الأطفال والحراسة كانو هنا بلباس مختلف وبهيئة جسمانية أقوى
على طول داك الطريق كانت هي غير كتأمل مصدومة من شدة جمال هاد المناظر الخلابة حتى بان الباب الكبير المزخرف بإتقان وابداع من صنع الأيادي ودايرين بيه الحراس بمختلف البدل دليل على اختلاف مهمتهم .. ولكن هما ما طولوش حتى للباب دارو مع واحد الطريق آخر ووصلو لباب معزول حتى هو بنفس الزخرفة والجمال غير هو صغير وحتى هو محاط بالحرس .. وأخيرا وقفات العربة ونهار ما رداتش البال للكبيرة لي هبطات وبقات هي والأخرى .. هي كانت غير كتأمل فدوك الحدائق لي جمالهم طاغي وخلاب وهاد الأشكال المعمارية الجميلة لي متجسدة فشكل البناء والنافورات المنتشرة وسط الحدائق الكثيرة
🍁🍁🍁🍁🍁 سلطاناتي 🍁🍁🍁🍁🍁
البنات واش بنتنا وصلات لقصر السلطان ولا جاب ليا الله
