🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 19 🍁
👑سلطان الصحاري👑
🍁 الجزء 112 🍁
كلامها زعزعهم: مولاي السلطان ليل .. بالتوفيق انشاء الله .. والغدا غادي يكون هنا .. وليك الحق تدعو صديقك .. بالحق مولاتي لالة الغالية ما عندها علاش تتعذب .. خليوها معنا ترتاح هنا .. وإلى ما كنتيش مأمن لينا خلي معها الحرس
ليل حطاته بين نارين ولكن كملات ليه الغالية: اش كتقولي اا لالة دامية .. حاشا واش فيكم الشك .. مولاي السلطان! تمشيو بالسلامة وترجعو بيها .. أنا هنا فانتظاركم بأخبار مزيانة انشاء الله
حرك ليها راسه وواخا هكاك خلى معها محاربين تما .. وشدو الطريق للمكان المنعوت تحت نظراتهم .. غير هما تحركو حولات عينيها لعندها الغالية .. ونزلات قبلت يديها تحت استغراب البقية .. ما فهمو والو واش كيعرفو بعضياتهم ما فهموش .. زادت الغالية مع الحكيمة دامية للبيت ديالها .. من بعدما أعطت الأوامر باش يتوجد الغداء .. على شرف السلطان ليل سراج الدين ابن لقمان الظاهر .. خلات علامات الفرح يتعلاو .. وكأنها عندها كامل الثقة بانتصار ليل .. أو يمكن ما عندهاش مشكل شكون ينتصر .. واش ليل ولا مناجي لي عارفة أنه الحق هو لي غا يربح
الغالية: لالة دامية .. فين غبرتي هاد المدة كاملة؟
هزات فيها عيونها لي صغارو وتكمشو .. بسبب كبر السن ديالها ولكن ما كيخطاهمش الكحل .. دائما عيونها مكحلين وكيسلبو عقل أي واحد شافهم .. الزمن غير شرفها أما هي باقي كما هي .. شوفاتها الثابتين ونظراتها الحادة تخليك تفافا بلاصتك .. مدة ماشي قصيرة وهي مركزة على الغالية .. حتى خلاتها ترجع الذكريات القديمة بدقة .. لقطة بلقطة، حدث بحدث حتى غرغرو عيون الغالية .. عاد بعدات دامية نظراتها عليها
دامية: واش ما خفتيش الزمن يعاود نفسه؟
الغالية هزات راسها بالإيجاب: خفت طبعا
دامية: اش درتي ملي خفتي؟
الغالية تنهدت: خبرت ليل بشنو وقع زمان بين الأجداد .. لالة دامية الله يخليك
قاطعاتها: حلفت ما باقي نقرب لشي امرأة أو بنت كما بغات تكون .. حتى نفك قضية زمان لي درتها بالسيف عليا .. بسبب الاتفاق ديال جوج شراف .. ونتوما لي (صرطات كلامها) يا حصرة وافقتو على داك الهبال ديالهم
نزلو دموع الغالية: الله يخليك اا لالة دامية راه ممكن تكون هي نفسها
وقفات مبعدة: واش غا توريني خدمتي؟
حركات راسها بالنفي ومسحات دموعها بجهالة: حاشة اا لالة دامية حاشة
ضارت ثاني كتشوف فيها: واش يصحاب ليك بكلامي لي قلت .. كنأكد بلي ولدك هو ولي معه غا يرجع سالم .. راك غالطة اا الغالية .. غالطة وغالطة بزاااف
الصدمة كانت قوية على الغالية .. كيفاش زعما ممكن تخسر أحبائها .. يعني ممكن ولدها يتغدر .. واش يقدر يرجع ولدها ميت من تما .. فعلا صدماتها دامية صدمة كبيرة .. هي على بالها ملي قالت الغداء وكدا .. إذن راه توقعت فوز ليل ولكن راه دامية هاديك .. ما كتعرفش اش تحت راسها
