🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 5 🍁
👑سلطان الصحاري👑
🍁 الجزء 30 🍁
قصدات الصالة لي فجناحه لي عامر حرس من الخارج ومن الداخل .. شدات الجانب الأيمن من جهة كرسيه هو .. وداك المكان هو لي كتجلس فيه *زمرد* جلسات فيه عن قصد .. هي بنت حاكم لمجموعة قبائل تابعة لحكم السلطان، كان هزم جيوش الاب ديالها فواحد الحرب، ومن بعد قررو انه يبقى حاكم على قبائله بالحق يكون تابع لحكم السلطان .. وباش الآخر يضمن راسه شرط عليه أنه يوفق بشرط انه يقبل بنته جوهرة عروسة ليه .. هكذا غادي يكون بينهم دم ويصبحو نساب .. طبعا السلطان وافق لأنه كان همه هو ضم دوك القبائل ليه والأب ديالها كان قدمها كهدية ليه وهو ما قدرش يرفض باش تبقى الأمور السياسية مزيانة
هي ملي جات تصدمات بعدد الزوجات لي عنده .. ولكن المشكل كان عندها دائما مع زمرد بنت عمه .. هي الوحيدة فزوجاته لي ما كتجمعش معاهم .. طبعا هي بنت العائلة الحاكمة .. وهي لي مرافقة ليه دائما فالعراضات وأي مناسبة كبيرة هي لي كتكون معاه .. هادشي جنن جنانها وبغا يحمقها .. ولي زاد الطين بلة هو حملها
هي جالسة وصل خبر وصوله لجناحه لأنه وصلاتو الخبار بلي راه جات عنده لجناحه لأمر مهم .. غير تسمع الصوت وقفات كتقاد حالتها مقدمة ليه التحية هي وخدمها لي معها فالصالة بغرض الحماية من القاتل لي متسلل للقصر .. غير دخل بحال الى شافت البدر
كان عاقد حواجبه وكيشوف فيها ويتفحص .. كان فآخر العشرينات أو بداية الثلاثينات .. فارس، سلطان، أمير أي مصطلح يوحي بالعظمة والفخامة والشجاعة يطيح على البال كان هو الوصف الدقيق لهاد الشخصية العظيمة لي داخل مع باب جناحه .. عينيه لي اللون ديالهم ما تقدرش تحدده والعقدة لي بين حواجبه عاطية واحد الجمال يخليك تايه بلا ما تلقى حتى شي حبل ديال النجاة .. لا جمال إلا جماله .. ناهيك على الوقفة دياله ديال راجل شجاع، باسل ومغوار .. الواضحة من وقفته، شموخه وهيبته .. رجل الصحاري والبراري .. إلى حط عينه على شي بلد ما يتهنى غير وهو حاط علم النصر الخاص بدولته عليها .. ولي كان الآن بادي على ملامحه هو عدم الرضا على هادشي لي واقع فبلاده، قبيلته، وسط قصره لا والاسوء فالقلعة .. وجوهرة مكملة عليه
صوته خرج وكأنه غادي يتحارب معها ماشي مقلق منها أو معصب إنما مع كثرة الحروب والمشادات والسلطة لي عنده والطريقة ديال الكلام دياله الشديدة ما كتغيرش واخا يكون كيهضر مع الأم دياله .. وهادي حاجة طبيعية ثاني كيقراها من صغره من يوم ولادته وهو معروف ولي العهد اذن راه هو ماشي بحال باقي الأشخاص .. عنده مهام ومسؤوليات أكبر وخاص يكون عند حسن بلد كامل ماشي غير عائلة أو قبيلة أو أو
السلطان: جوهرة .. ياك لباس؟ علاش جيتي للجناح وقلتي الأمر مهم؟
خديمها كلهم مشاو لواحد القنت وعطاوهم بالظهر وهي قربات منه كتعمر عينيها بشوفته واذانها بصوته
جوهرة لحنات صوتها: مولاي .. انت غطا راسي وتاجه .. وا مولاي انا قلبي بين رجلي بالخوف اا مولاي .. هاد المجرم المتسلل خلاني ما نقدرش نبقا فجناحي
صدماته ديال بصح واش هادي بعقلها من نيتها ولا كتضحك وتتفلى واش هو عنده قبائل هنا وسط القصر ملايين الناس .. خاص يوفر ليهم الحماية وهي كتشوف غير راسها كان غادي يفقد صوابه ويخرج فيها طول وعرض .. باقي مزال ما تفك منها تعلن وصول زمرد لجناحه .. وقف ثابت باغي يعرفها حتى هي اش بغات أما جوهرة قربات منه خطوات وهزات راسها بثقة للباب باش تبين ليها راسها
عطات التحية ودخلات غير بانت ليها استغربت: واش اا مولاي ما عطيتيش الأمر باش كل وحدة تبقى فجناحها؟
حولات عينيها لعنده كتسنى جوابه: ياك لباس اا زمرد؟ وعلاش حتى نتي خرجتي من جناحك؟
زمرد تبسمات: مولاي .. انا وصلني مرسول من عند مغنية .. وطلبات مني نخصص وقت باش تشرح ليا شي حاجة لي يمكن عندها علاقة بهادشي لي واقع .. مغنية كتقول بلي المسألة ما كتستدعيش الخوف و...
قاطعاتها جوهرة: واش هي قاتلة جوج رواح .. وداخلة حتى للقلعة وهي من خدم الحوش .. ونتي كتقولي المسألة ما كتستدعيش الخوف
واقف كيخنزر وعينيه كيشوفو لبعيد: اش غايكون عند مغنية .. وهاد خيتي راه دارت ما بغات وسط القصر .. كذب وانتحال شخصية .. وغطات راسها كونها خادمة السلطانة .. اش من تفسير عند هادشي اا زمرد؟
ما رضاتش جوهرة كيفاش عاطي وقته وكيتناقش مع زمرد وكأنها هي ما كايناش معاهم ما لحقاتش تبدي رأيها حتى تسمع صوت ثاني ديال الإعلان وتحل الباب من طرف الحارس الاول للسلطان الرسمي ودخل عاطيه التحية
الحارس: مولاي .. مولاي عبد الرحمان حتى هو تهجمو عليه فجناحه وسط هاد الحراسة كلها
🍁🍁🍁🍁🍁 سلطاناتي 🍁🍁🍁🍁🍁
ياك نهار محبوسة شكون هادي ثاني؟
