🌛رمضان كريم🌜 🌞 شمس الغريب 🌞
🌒🌅 الطريدان 🌅🌒
🍁 الحلقة 6 🍁
👑سلطان الصحاري👑
🍁 الجزء 36 🍁
ما صيفط جوهرة غير بزز مواعدها يرجع ليها سلهامها .. ورغم محاولاتها باش تبقى معاه ديك الليلة إلا أنه رفض قطعا وبقا بوحدو باغي ذهنه يخدم وينعس يرتاح للغد لي تابعينو عرام ديال الحكامات وخاص يكون عادل فيهم ويبين سلطته وعدله فالحكم كعادته
فعلا جاء الصباح وجاه خبر استيقاظ نهار لي كانت غير مرهقة وجيعانة .. وعرف أنها ملي لقات راسها وسط الجناح ومسجونة وهي غير كتبكي وتسول على مغنية وعبد الرحمان .. قدر يعرف أنها ما سمعات بالأمس حتى نداء .. هو براسه ما كرهش يخرجها بريئة من هاد الزلة لي دارت لأنها فعلا عطاته دلائل فغاية الأهمية ليه وللبلد ككل .. ولكن راه تصرفت بتهور وخلات القصر كله تخيم عليه الأحاسيس ديال الخوف والرعب .. توجه أولا للإفطار العائلي ومن تما كل واحد كيعنيه الأمر أو باغي غير يعرف توجه لقاعة الحكم وهي قاعة كبيرة فيها مكان خاص بالنساء والآخر بالرجال .. السلطان كيترأس القاعة رفقة القضاة لي معاه .. والمتهم كيتوسط القاعة والحضور كيجلسو فالجنبات .. الفرق انه النساء كيكون عليهم واحد الحجاب مغطيهم
كيف كل واحد خدا بلاصته ومكانه وبدات الجلسة .. وقف عبد الرحمان كيذكر التفاصيل ديال الحادثة لي غادي يحكمو فيها .. لأنه كاين لي ما عارفش اشنو واقع .. وبدأت المشاورات بين الحضور .. منهم لي كيدافع على نهار وأنها دارت حاجة مزيانة كشفت خبث الوزير .. ومنهم لي كيقول واخا دارت حاجة مزيانة إلا أنها خاص تعاقب على الرعب والهلع لي خلات القصر يعيشه .. حتى شي واحد ما ترسى على قرار واحد .. ولكن كلهم كينوهو بعملها الجبار وقدرتها على حل مشكل كبير فوقت قصير .. وباغيين يعرفو منها أدق التفاصيل .. كل واحد خدا بلاصته ملي سمعو إعلان وصولها واحضارها من طرف الحرس .. كانو مدوشين ليها ومبدلين ليها وهي حانية الراس وعينيها وتقول واش حبسو من البكاء .. توقف الزمن عند البعض وهما كيشوفو هاد البنت المختلفة، الجميلة والبريئة واش هي لي ممكن تكون دارت هاد الشيء كله .. جلسوها بلاصتها عينيها فالارض ودموعها كيبانو كل وحدة قداش كيطيحو أمام الكل على الفراش علاش جالسة وكتأنب راسها .. الحكم عليها أمام سلطان وحاكم البلاد
مزال ما بردات صدمتها وتقبلت واقعها حتى حطو مرجانة وزوجة الوزير الأول فمكان فجانب القاعة معزولين وبعض الخدم ديال مرجانة من بينهن البنت لي دخلات الكاس لزوجة الوزير الأولى .. بداو بيهم هما الاولين كل وحدة اش تقول لأنهم ضحايا بالنسبة للقانون .. دازو بالتناوب وبداو من الخدم ديال مرجانة كلهم شهدو عليها ولصالح مرجانة .. حتى وصلو للبنت لي نفدات المهمة اعترفت أنها تلقت التعليمات من نهار وماشي من مرجانة ولكن كان واضح أنها كتكذب .. من بعد دازو لمرجانة لي كتكذب باحترافية ولكن ماشي على هاد هيئة القضاة بالضبط
مرجانة: أنا اا مولاي .. مغنية هي لي جابت ليا هاد البنت .. وطلباتني عليها باش مولاي محمد باشا ما يقطعش راسها على قلة احترامها .. فعلا بقات فيا ودخلتها بين الخدم ديالي ..ولكن فأول يوم دخلات ليا الوساوس على مولاتي زليخة (ضرتها) ولكن انا رفضت بالقطع .. من بعد قالت ليا بلي راه زليخة باغيا تقتلني بشي تسمم .. ولكن واخا هكاك انا رفضت .. ونهار قالت بلي هي ما يمكنش تشوف مولاتها مهددة بالقتل .. وخططت مع هاد الخادم الأخرى ونفذو جريمتهم ولكن نهار ما حبساتش هنا .. يمكن خافت نفضحها سمماتني حتى انا وهربات .. ولكن الحمد لله ما وقع لينا والو
كان واضح انه حتى واحد ما متيق كدوبها هي الوحيدة لي متيقة راسها .. عاد هما ما فراسهم والو على زوجهم يعني ما خبروهمش بفين هو ولا أعماله باش يكدبو على خاطرهم .. منها هي خدات زليخة الكلمة
زليخة: أنا اا مولاي ما شفتش هاد البنت (شيرات على نهار) الأخرى هي لي دخلات عندي .. ولكن الثياب والمجوهرات لي جابو ليا الحرس فعلا اا مولاي ديالي .. وانا متأكدة انه مرجانة هي لي مصيفطاهم باش يقتلوني .. سواء كانت غير وحدة ولا بجوج
طول اعترافاتهم هي كانت غير كتزيد تعصر فعينيها وتبكي .. كيفاش غادي تدافع على راسها وسط هاد الاتهامات كلها .. واش غايتيقو عشرات الناس ولا هي بوحدها
🍁🍁🍁🍁🍁 سلطاناتي 🍁🍁🍁🍁🍁
شكون يصدقك اا نهار؟ كيفاش غا تفكي راسك اا بنتي؟
