နှောင်ထုံးဖွဲ့ရာ ပြယ်လေသတည်း

အပိုင်း(၃၃)ဇာတ်သိမ်းပိုင်း(၁)

နှောင်ထုံးဖွဲ့ရာ ပြယ်လေသတည်း

ဒိန်း..ဒိန်း

ဒိန်း..

ဖြူသခင်မှ ရှာဖွေလိုသည့်ပစ္စည်းအားရှာတွေ့ကာ ဧည့်ခန်းအတွင်းမှထွက်လာသည်နှင့် ခြံတံခါးအဝင်ပေါက်တွင်စောင့်နေသည့်အလင်းငယ်ထံသို့အလျှင်မြန်ပြေးလာခဲ့ပါသော်လည်း သူသည်ခြေတစ်လှမ်းနောက်ကျသွားခဲ့လေပြီ။

ပိတ်ချထားသည့်ခြံတံခါးသည်အခန့်သားပွင့်နေပြီး ထိုနေရာအတွင်းအလင်းငယ်မရှိတော့ပါပဲ ဖြူသခင့်မြင်ကွင်းထက်သို့အလင်းငယ်အား တစ်စုံတစ်ယောက်မှ ဖမ်းချုပ်ထားသည့်မြင်ကွင်းမှာ တစ်စိုက်မတ်မတ်ရောက်လာသောကြောင့် ဖြူသခင်သည်ရောက်ရာအရပ်တွင်သာခြေစုံရပ်ကာ အကာကွယ်တစ်ခုယူပြီးပုန်းကွယ်ထားရသည်။

အကြောင်းမှာ အိမ်တော်အတွင်းထဲရှိနေသည့်လူတစ်စုနှင့် အိမ်တော်အပြင်ဘက်တွင်ရှိနေသည့်လူတစ်စုမှာ အချင်းချင်းသေနတ်ဖြင့်ပစ်ခတ်ရန်အသင့်အနေထားသို့ပြင်နေကြကြောင့်ဖြစ်သည်။

ဒိန်း..

ဒိန်း..

ခေါင်းဆောင်ဖြစ်ဟန်တူသည့်လူနှစ်ယောက်ထံမှ စည်းခြားထားသည့်မြေပြင်ထက်သို့ ပစ်လိုက်သောနှစ်ခါဆက်တိုက်ထွက်လာသည့်သေနတ်သံကြောင့် ဖြူသခင်သည် နားထင်အားလက်ဖြင့်ပိတ်ထားရသည်။ ထိုအနေအထားမှအခြေအနေအားအကဲခတ်ရသေးသည်။

အိမ်တော်အပြင်ဘက်တွင်ရှိနေသည့်လူတစ်စုအနက် ရင်းနှီးသောအရိပ်ငယ်လေးအားဖြူသခင်မြင်လိုက်ရသည်။ ထိုသူမှာအံ့ဖွယ်ခိမ်းဖြစ်သည်။ သူနှင့်ပို၍ နီးကပ်နေသည့် အိမ်တော်အတွင်းဘက်တွင်ရှိနေသည့်လူတစ်စုသည် သူ့အားကျောပေးထားသဖြင့် မည်သူဖြစ်သည်ကို ဖြူသခင်မသိပါသော်လည်း အခြေအနေအရ အိမ်တော်အတွင်းမှရှိနေသူများသည် လူအင်အားအရရော လက်နက်အရပါ အားသာမှုရှိနေသည်။

အလင်းငယ်မှာ တစ်ဖက်အိမ်တော်အပြင်ဘက်ရှိ လူတစ်စုထံတွင်ဖမ်းချုပ်ခြင်းခံထားရပြီး ပါးစပ်ထဲတွင် ပိတ်သားစအားစကားမပြောနိုင်စေရန်စို့ထည့်ထားသည်။