استمتعوا جميليني 🤍🐙.
....
بعد ثلاث أيام.
• يا عيني ماگدر أوظفك المكان مليان عندنا.• نزلت چتافات تيم بأحباط بعد ما تلقى الرفض السادس لهذا اليوم أنه يشتغل، رغم شكد دور وافتر بس مچان أحد يرضى يشغله، وسواء گال انه يتيم عمود يستعطفهم او مگال همين ينرفض، فتنهد وطلع وهو عابس وجهه ومدنگ راسه، تاليها طلع مصاصة من جيبه وفتحها ماصها مرة بكل ضوجة وانزعاج.
وبدون أنتباه هو انضرب بشخص وتعثر لنحافة جسمه وخفته عكس الثاني يلي ما تأثر وكأنما انضرب بريشة بس، ووقعت مصاصته من أيده بالگاع • مابيك شي؟ خوما تأذيت؟.• الرجال سأله بصوت هادي عميق ونبرة باردة وبسرعة رفع راسه له وعاط بيه بمغثة • ووجع أدري شنو اعمى؟، لوما شطولك متشوف الأمة جواك؟!.•
رفع تيم راسه يباوع للثاني لانه چان اطول منه بهواية والي بسرعة صفن بتعابيره للثاني وملامحه ورجع تيم نتر بيه قبل ماينتظر رده • فوگاها حتى المصاصة وگعت هاي چانت اخر وحدة عندي!.• بزعل هو رزل الواگف مقابيله ويلي ابتسم صفح وهو يرد • ترة انت يلي مدنگ راسك ومو شايف درب الله وين، واذا على مصاصتك أشتريلك غيرها ليش مكبر الموضوع.•
• وشنو يمة عبالك اعتذر؟ من طيزي اعتذرلك وماريد من وجهك شي، وخر شو دوخر هو مناقصني غيرك.• نتر بي تيم متجاهل حقيقة انه هالشخص مقابيله اكبر منه بهواية ومشى بسرعة متخطية ومتجاهله، وبالفعل أندار عليه الثاني يراقب روحته واختفاء جسمه بين الناس والشارع وهو يرافس ومبين بعده يدردم • شون لسان مراكب على خلقته.• تنهد وتالي دفع باب بن رضى علوان ودخل له يدور عن صاحبه.
وبس انتبه له وين گاعد حتى ابتسم وتندى منه بخطواته محاچيه يجذب انتباه عن التلفون ناحيته • ها ولك گواد وين هالغيبة صارلي كومة مشايفك.• ضحك الثاني وگام على حيله يساوي الثاني بالطول وحچى منتقده • ولك فضحتنا ترة بكافيه راقي احنا، الفاظك مو بالمعسكر لو مركز التحقيق وتفشر بكيفك.•
أنت تقرأ
جَنّاح
Romanceغمضت عيني ولكيتك بالحلم واكف امير، واني يم شجرة حنانك طير وجناحي حرير، وزرعت بشفافي بسمه بالحلم خلتني اطير. مثلية +18، لهجة عراقية. تحتوي الفاظ جريئة، سب عامي صريح، مواضيع للبالغين.
