احسكم راح تسحبون على هالبارت،
فالاحسن يطلع احساسي غلط تمام حلويني؟ 🫂.
البارت 11000 كلمة، جنت حقسمه بس گلت
لا اشلع گلوبكم زايد.
استمتعوا ولاتبلخوا بتعليقاتكم الحلوة 🫀.
.......
سنة 1995، البصرة.
چان گاعد مگنبص گدام باب المدرسة يباوع للجهال الزغار يلي يطلعون من المدرسة، والي اغلبهم جايين اهلهم ياخذونهم وكلمن يركض بحضن امه لو ابوه وبعضهم جايين الاثنين لخاطر ياخذونه، چان متحسر على هالشي انه يگدر يداوم مدرسة ويكون عنده اهل يجون ياخذونه كل يوم ورة ميخلص.
بس هو مايگدر لانه ماعنده اهل ولا عنده فلوس، وبنص شروده سمع صوت يعرفه كلش زين يصيح باسمه واول ما شافه، ابهجت ملامحه يگوم ويركض ناحيته • ناصر! اشتاگيتلك شو طولت اليوم بالشغل؟.• سأل الزغير ناصر يلي چان اكبر منه بسنة هو عشر سنين وناصر دعش سنة.
• حقك علية بس اليوم چان اكو هواية بضايع بالسوگ، فطولت على ماحملتها.• بتعب واضح على ملامحه جاوبه ناصر يرفع ايديه الضعيفة يلي ترجف كامل عضلاتها من تعب الشغل ويريحها على خد الثاني يبتسمله • صيف جبت لك هدية.•
هو حچة يخلي عيون الثاني العسلية تتوسع على كبرها يبرز لونها اكثر جوة ضوة شمس الظهرية، وصار الثاني يگمز بفرح سأله • شنو شنو شجبت لي!، وريني بسرعة.• ضحك ناصر على نبرته وملحته اللطيفة بنظره وطلع من وره ظهره چيس چبس يحطه گدام عيون صيف.
شهگ صيف بفرحة اول مشاف الچبس يلي يحبه وشبگ ناصر عاصر جسمه بين ايديه الزغيرة والضعيفة • احبك احبك ناصر حيل احبك چنت مشتهيه! بس شون خاف يحس عمو محمد انه يوميتك ناقصة ويضربك؟.• استوعب صيف بالنهاية وتبدلت نبرته من الفرح للقلق والخوف على ناصر.
• مراح يدري يوميتي نقصت لانه ميدري اساساً انه الشغل اليوم هواية وزادت!، بعدين هو اليوم عيد ميلادك وهاي ابسط شي اجيبه الك.• طمنه ناصر مدني وجهه لوجه صيف وبرقة هو خلى ارنبة خشومهم تتضارب كحركة هو متعود يسويها لصيف.
أنت تقرأ
جَنّاح
Romanceغمضت عيني ولكيتك بالحلم واكف امير، واني يم شجرة حنانك طير وجناحي حرير، وزرعت بشفافي بسمه بالحلم خلتني اطير. مثلية +18، لهجة عراقية. تحتوي الفاظ جريئة، سب عامي صريح، مواضيع للبالغين.
