جَنّاح

Part 28

لقد عدنا اخيراً،
100 فوت + 950 تعليق = بارت جديد.

ملاحظات خفيفة بس عن الادمان،
اول شي الادمان يختلف من جسم للثاني،
واخذ كميات چبيرة دفعة وحدة تساعد على
الادمان بسرعة اكبر هاي اذا ماسببت الموت،
والاعراض الانسحابية للمخدرات او يلي تتسمى
نوبة ادمان المخدرات تشمل التالي.

- اوجاع حادة بكامل الجسم، ضيق تنفس، لعبان نفس ودوخة وحرارة وبرد بنفس الوكت، فرط عصبية وحالات انفعال غير مبررة، كأبة بدون سبب وخربطة بالهرمونات والمشاعر للذكور والاناث واختلال التفكير السليم، فيعني لتخافون جبل ماتخبل هاي بس اعراض ادمانه وماتروح الا بالعلاج النفسي او اخذ جرعات ثانية من المخدرات، وختام لهذا الكلام حبايبي تجنبوا الادمان لانه يدمر الانسان واستمتعوا بالبارت 🫀.

.....

اسودت ملامح حاتم وهو يسمع هالجملة من جبل، الجملة يلي حسسته بدمه يفور ويغلي بشكل كامل، والاسوء من كل هالشي هو هو نبرة جبل المتأذية وتعابير وجهه وهو يكررها مرة لخ على مسامعه • حاتم اريد مخدرات..حيل متأذي..مداگدر اتحمل..•

ضغط حاتم بچفوفه على زنود جبل اقوة وهو ديحاول حالياً يلزم اعصابه بكل قوته، لانه ميصير هسة يخلي عصبيته تسيطر عليه وينفجر بوجه جبل، ديحاول يوعي نفسه لانه الموقف مناقص عصبية وانفعال يحچي بنبرة ثگيلة مغثوثة • ماكو مخدرات، تحمل هسة شوية ويروح كل هالوجع..•

گز جبل على سنونه جسمه بالكامل ينتفض ويرجف يهز راسه بانفعال، لانه ماعنده اي سيطرة على اعصابه وهو ديمر بنوبة الاهتياج هاي بسبب حاجته للمخدرات، يعيط بوجه حاتم بحدة ودموعه المحبوسة بعيونه نزلت على خده يتنفس بسرعة من احساسه بالخنگة وضيگ النفس • سهل الحچي عليك!!.. انتة مدتفتهم ولادتحس بشي من أذيتي هسة!!..•

• اي مداحس بس اني اسوي الشي الصح الك!!، مستوعب انتة شدتطلب مني؟!!، مخدرات!..هاي يلي دتطلبها مخدرات وچنت حتموت منها لوما البارحة تلاحگت الك!!..• انفجر حاتم بوجه جبل عايط بيه يريد يرجع عقله لراسه وهو مستحيل يسويله يلي يريده وينطيه اي مخدرات حتى لو ديشوفه يتعذب.