جَنّاح

Part 11

كومنت وفوت للتشجيع؟ 🐙.
كل يوم تزيد الخنسة عيني باردة عليكم حبايبي 😔.

......

اصفن بيك ولساني غير الغزل ماينطق.

.....

بنص القاعة الكل چان گاعد ومركز وية شرح الدكتور للمادة، الا واحد بيهم يعض شفته بقوة عاصر عيونه وايده تعصر قميصه ضاغط على بطنه، العرگ ترس گصته وانفاسه مو گادر ينضمها، يحس بالبرد يسيطر على اطرافه ورعشة تاكل جسمه ولعبان نفس مو گادر يتحمله اكثر، غير الدوخة الي تلف المكان بيه وضعف الرؤية عنده.

• بسام مركز وياية انتة؟؟.• بشك سأل الدكتور بعد مشافه مدنگ راسه ومو وياه بالشرح ولا يتفاعل وبسرعة المعني رفع راسه بصعوبة يبلع ريگه الجاف.

• دكتور..يصير اروح للحمام؟..• بصوت مهزوز وضعيف نطق بسام لدرجة الدكتور ما سمعه واستفسر منه يكرر • اشبيك شتريد؟.• عصر بسام عيونه يرجع ينزل راسه ومگادر يرد.

• دكتور يريد يروح للحمام شكله مريض..• الطالب الي بصف بسام شرح للدكتور بصوت اعلى وعيونه تتنقل بين الاثنين ودكتور تنهد بهدوء يسمحله يطلع • امشي روح للحمام.•

گام بسام بصعوبة من المدرج يمشي على كيف وبتعب لناحية باب القاعة وعيون الكل تباوعله باستغراب لحالته، وبعد عشر دقايق خلصت المحاضرة وبسام مارجع لدرجة انه الدكتور تعصب من هالشي وفكر انه تهرب من المحاضرة فحچى بنوع من التنبيه والتحذير للطلاب • بس تشوفون بسام تگولون اله يجي لمكتبي وياويله مني على هالدگة الناقصة يلي سواها!.•

هزوا الطلاب راسهم لهم وطلع الدكتور فباشروا همة يلمون بكتبهم طالعين وراه، ومن بين زحمة الطلاب لطلعتهم چان مهيمن واگف بصف باب القاعة منتظر طلعة بسام لانهُم مو بنفس المرحلة ومو بنفس المحاضرات فتعود من يوم تعرف عليه يجيه وينتظره بعد كل محاضرة اله.

ابتسم مهيمن بصفنة وهو يذكر اول اسبوع ببداية السنة وشون تعرف على بسام، چان بسام راكن ماطوره بمكان سيارة مهيمن بالگراج المكان الي معروف انه ممنوع احد يطبگ بيه غير مهيمن، لانه طالب سنة اولى ومهيمن سنة رابعة فمايعرف بالقوانين يلي فارضها مهيمن على اغلبية الطلبة بسبب منصب ابوه ومعرفته القوية بعميد الكلية.