جَنّاح

Part 6

استمتعوا حلويني 🤍.

ملاحظة دوم انسى اكتبها، بخصوص طول الابطال.
جبل طوله 178، تيم طوله 177، ادم طوله 180،
هيثم طوله 179، بسام طوله 183، ناصر طوله 195،
سهم طوله 175، هديل طولها 170، مهيمن طوله 187.

ادم - 21 سنة.

مهيمن - 22 سنة.

.....

دخلوا المستشفى بهيئة متبعثرة، هي تعدل ربطة حجابها الي لفتها شون مچان، وهو وراها جاي بتراكسود البيت الرياضي الرصاصي وفوگاه قمصلة لبسها عشوائياً.

أقتربوا من الاستقبال وهو نطق باستعجال مستفسر منها • أكو مريض دخل باسم عبدالجبار الأسدي؟.•

باوعت شوية للحاسوب گدامها وبعدين ردت عليه • أي أتوجه لقسم العمليات.•

بدون اي اطالة بالكلام هو سحب أمه وياه وتوجهوا لقسم العمليات واول ما شافوه گاعد گدام الغرفة على وحدة من الكراسي الجانبية حاط ايده على حلگه ويهز برجله بتوتر واضح اقتربوا منه.

• حبيبي!، مصارلك شي شنو قصة هالحادث الي سويته! منو ضربت!.• وفاء اتجهت ناحيته تگعد بصفه وتسحب ايده الباردة بين چفوفها تحاول تدفيها وعيونها تتفحص كل شبر بيه.

• مابيه شي بس ضربت ولد زغير بالغلط!، مادري چنت ماشي بالمنقطة ورة ماخلصت العزيمة وچان يطلع مدري منين وضربته!.• شرحلها الحادث بتعب وهبطة واضحة على ملامحه.

وهي بسرعة رفعت ايدها تمسح على شعره يلي ترس الشيب نصه وتهديه • ادري بيك ادري مو قصدك تضربه ميخالف هسة يگوم ويطلع بالسلامة باذن الله.•

• هسة هو شنو وضعه ودخلوه العمليات؟، خو ماتصير گعدة عشاير من ورة هالضربة!.• ابنهم الواگف ومتچتف يگضم أظافره سأل بشوية أنزعاج وهدأ توتره اكثر بعد ما شاف ابوه بخير مو هامه لهدرجة الولد الي بالعمليات يصارع لحياته.

• بربك ادم وانت هذا الهامك؟ هسة خلي يطلع الولد بالسلامة وتنحل هسة هي شنو گعدة العشاير محد يگدر يحاچي ابوك بشي.• نترت بيه وفاء تلومه بضوجة من كلامه.