جَنّاح

Part 8

حزب سلطع شخباركم؟ 🐙.

....

بس لخاطرك روحي انخلقت،
ولخاطر وجهك عيوني تشوف، اني من ايدك
هاي لايدك هاي بس كون خاطرك يطلب!.

.....

• اريد اتبنى سهم ويصير ابني ومايبقى اسمه معلگ هيچ بدون اسم زلمه وراه.• كرر عبدالجبار جملته يصر على رغبته بتبني سهم مخلي ملامح جبل ترتخي وتشرد بجمود يفكر بكلماته يلي ماتوقعها ابداً • اخاف أگوله هالشي ويرفض لانه واضح متعلق بيكم وبالاخص متعلق بيك انتة، بس اني وزوجتي همين تعلقنا بيه.•

• شون؟ وهي بس ايام يلي گضيتوها وياه!.• سأل جبل باحساس شك واضح، مو بس لأنهم اهتموا بسهم لكم يوم ومبين انهم بحال ميسور ويعاملونه بلطف راح يصدگ أنهم حبوه بهالسرعة ويريدون يتبونه، لانه مو دوم التبني يكون بنية صافية وجبل مر بتجربة التبني مرتين.

المرة الاولى كانت من زوجين ماعندهم اطفال تبنوه حتى يملون هالنقص يلي بحياتهم وبعد سنتين بمجرد ان حملت الزوجة همة تخلوا عنه ورجعوه للميتم، والمرة الثانية كانت اسوء لانه تبنته عائلة بنية اخذ كلية منه عمود ابنهم المريض وهرب منهم بصعوبة اول ما اكتشف هالشي، فمايگدر هسة ينطي سهم لهالاشخاص بكل بساطة ويضمن انه مراح يتأذى وسطهم.

تنهد عبدالجبار وهو توقع انه الازغر مراح يقتنع بسهولة وممكن يفهم انه عنده نية ثانية من هالتبني لانه فكر بكل الاحتمالات من اول ما شاف انسجام وفاء وسهم سوية وضحكتها وفرحتها وياه ولطافته وشخصيته الحيوية يلي تذكره بتفاصيل ابنه المفتقدها وبصوت مليان شجن هو بدأ يروي بعض الاحداث من حياته لجبل.

• اني ووفاء زوجتي، تزوجنا عن حب بعد ما چانوا اهلنا معارضين بهالشي بشكل متتصوره، يوم الي تزوجنا حسينا هاهية اننا صرنا بالجنة وبعد منريد شي من هالدنيا!، مرت سنة واجانا طفلنا الاول ادم، فرحتنا وگتها مايمكن انها تنوصف لدرجة اننا گلنا مراح نخلف بعد ونكتفي بيه هو حتى ننطيه كل الحب والدلال والاهتمام!، لانه صار اثمن شي بنظرنا.• ابتسم عبدالجبار لهاي الذكريات السعيدة بشبابه هو ووفاء وجبل صنت يسمع له وينطيه مجاله بالكلام.