ادري ادري اني تأخرت واعذروني،
بس ايدي أنچوت وچنت أكتب بأيد وحدة.
استمتعوا بالبارت،
لاتبلخون بتعليقاتكم الحلوة علية 🫀.
.......
صاحبك حلو لاتلحسه كله.
.......
فتحت هديل عيونها گاعدة من النوم واول شي سوته انها لزمت التلفون تبحوش بيه وتشوف شكو ماكو، اول مادخلت للانستغرام راحت للخاص تشوف تيم شيدز الها من ريلز وسوالف بيناتهم ماكو اتفه منها بعد ماتفترق عنه ويبقى يم انور.
بس هي رفعت حواجبها اول مشافت رد من المتابع الغريب الي راسلته البارحة فهي دخلت وعافت رسايل تيم تفتحها بعدين، تقرأ رسالة هالغريب - تابعتك عادي فيها مشكلة ذي؟.- قرأت الرسالة ولوت شفايفها على رده تحسه بارد حيل.
- لا مابيها مشكلة استغربت لان حسابي مابيه شي مميز يخليك تتابعني!.- هي ردت وماتوقعت انه رسالتها تنقرأ بعد ثواني من الارسال، ماطلعت من المحادثة وبقت تنتظر رده تشوف شراح يحچي.
- تابعتك عشان شفت ستوريك عن كتاب محاط بالمرضى النفسيين، اقرأ نفس الكتاب.- رد عليها ومثل الرد يلي سبقه حست هديل انه بارد بدون ايموجيز ولا شي، وبعيداً عن ردوده الباردة لفتها لهجته الغريبة ماعرفت تحدد جنسيته من هاي اللهجة بس ماحسته عراقي.
- اتفق هالكتاب حلو، انتة شنو جنسيتك؟ لهجتك غريبة.- سألت هديل لانها مو شخص يگدر يكبح فضوله ابداً، متمددة تنتظر رده وهو قراها بادي يكتب لها - الماني، انتي؟.- رد مختصر حيل خلاها تعگد حواجبها مرجعة گذلتها ليورة تبتسم صفح على هالچذبة.
عضت هديل شفتها راجعة تكتب له - خوش تطير فيالة انتة.- استهزأت بيه وهو قرأ رسالتها بدون مايرد لمدة وهي تأكدت شكوكها انه چذاب تطلع من المحادثة وتروح لحسابه ناوية تنطيه بلوك لان هي اكثر شي تكرهه واحد يحاول يچذب عليها لو يحسبها ثولة متفتهم بس وگفت لما قرأت اشعار رسالته - قرأت رسالتك كثير ومافهمت قصدك.-
عقچت هديل ملامحه عليه، بالنسبة الها محاولة واضحة يطول بالچذبة بعد ما انحشر فرجعت ناوية تنهد بيه لانه عصبها بعد ما رفعت ظهرها عن الچرباية - يعني شون الماني وتحچي عربي؟، مبين عليك كذاب حسبالك غبية واصدگ؟.-
أنت تقرأ
جَنّاح
Romanceغمضت عيني ولكيتك بالحلم واكف امير، واني يم شجرة حنانك طير وجناحي حرير، وزرعت بشفافي بسمه بالحلم خلتني اطير. مثلية +18، لهجة عراقية. تحتوي الفاظ جريئة، سب عامي صريح، مواضيع للبالغين.
