☀️The Will Of The Heart🌻

🌻အခန်း(၂၃)🌻

'ဒီကိစ္စ ဘယ်လိုရှင်းကြမလဲဦးလင်း...'

ဈာန်ရဲအသံက အက်ကွဲကွဲဖြစ်နေကာ အကြီးအကျယ်စိတ်ဓာတ်ကျဆင်းသွားပုံဖြင့် ဆက်တီပေါ် စိတ်ပျက်လက်ပျက်ထိုင်ချသည်။ ဆံပင်တွေလည်း ခဏခဏသပ်ရလွန်းသဖြင့် ဖရိုဖရဲဖြစ်နေပြီ။ ဦးလင်းမာန်လည်း ရှိရင်းစွဲအသက်ထက် နှစ်ဆလောက်အိုကျသွား၏။

'Apexက cancelလုပ်ခံရတဲ့အထဲ ပါသွားတာ ရေနံပရောဂျက်တစ်ခုတည်းမဟုတ်ဘူး၊ ဒက်ဒီ့နာမည်နဲ့ Royalရဲ့ဂုဏ်သိက္ခာတွေဗျ.. ဒီပရောဂျက်အတွက် စာရွက်စာတမ်းတွေပေါက်ကြားသွားမှာစိုးလို့ ကျွန်တော်နဲ့ရှိရင် အန္တရာယ်များလို့ ဦးလင်းကိုယုံကြည်ပြီး အပ်ခဲ့တာ.. အခု ဘယ်လိုဖြစ်ပြီး socialထိပါ ပြန့်ကုန်တာလဲ မတွေးတတ်တော့ဘူး..'

'ဦးလင်းလည်း သေချာသိမ်းဆည်းထားခဲ့တာပါ မောင်ဈာန်..ဦးလင်း ပေါ့လျော့မိတာတွေလည်း ပါ,ပါတယ်..'

ဦးလင်းမာန်ကိုယ်တိုင်လည်း လုံခြုံစွာ သိမ်းထားခဲ့သည့် စာရွက်စာတမ်းပေါက်ကြားမှုအတွက် နားမလည်နိုင်အောင်ဖြစ်နေဆဲ။

'အခု စီးပွားရေးလောကတစ်ခုလုံးကပါ Royalကိုလက်ညှိုးထိုးလာကြပြီ၊ နာလန်ထူဖို့ကြိုးစားတိုင်း အရှိုက်ကနေ အလဲထိုးခံရတာများနေပြီ..'

ဈာန်ရဲ မျက်နှာကိုလက်နှစ်ဖက်ဖြင့်ပွတ်သပ်ရင်း 'နေစက်ကွင်း'ကိုပြေးမြင်သွား၏။ ထိုလူက Royal ပြိုလဲသွားအောင်လုပ်မည်ဟု ပေါ်တင် ရန်စသွားတာ မကြာသေးပါ။ ပြီးတော့ မာန်က ထိုလူနှင့်ငြိနေသည်။ ဒါဆိုလျှင်...

'ဦးလင်း...ကျွန်တော် ချစ်တုန်းမုန်းစကားပြောတယ်တော့မထင်နဲ့ဗျာ..မာန် ခြေလှမ်းတွေပျက်နေတယ်..'

'ဟင်..'

သူက ရှေ့စားပွဲအံဆွဲထဲမှ ပလတ်စတစ်အိတ်တစ်အိတ်ကိုဦးလင်းမာန်လက်ထဲ ထည့်ပေးလျှင် ဦးလင်းမာန်က သူ့ကိုတစ်ချက်ကြောင်ကြည့်နေပြီးမှ အိတ်ကိုဖွင့်ကြည့်သည်။ အိတ်ထဲမှဓာတ်ပုံများကြောင့် ဦးလင်းမာန် မျက်လုံးပြူးလေသည်။

'ဒါ ဒါ ဘာတွေလဲမောင်ဈာန်...'

'မာန် နေစက်ကွင်းဆိုတဲ့ကောင်နဲ့ငြိနေတယ်...'