လက်ဖ၀ါးပြင်ထက်က ကမ္ဘာ (သို့)ဖက်တီးလေး နှင့် သူ၏မိတ်ဆွေများ (၀မ်ပေါင်လဲ့) book 1

491 - 495

လက်ဖဝါးပြင်ထက်က ကမ္ဘာ
မူရင်းစာရေးဆရာ - Ergen

အခန်း (၄၉၁) - ပြည်ထောင်စုကြီးဆီမှ ပြောင်းရွှေ့မိန့်

လီရှင်းဝမ် ဖောက်ထွက်သွားခဲ့စဉ်တုန်းက အဖွဲ့အစည်းအသီးသီးမှ လူမျိုးစုံကို ဖိတ်ခေါ်ခဲ့သည့် ဖြစ်ရပ်ကြီးနှင့် ယှဉ်လိုက်မည်ဆိုပါက သွမ့်မုချွယ်၏ ဖောက်ထွက်မှုမှာ ပို၍ သိုသိုသိပ်သိပ် ရှိသည်ဟု ဆိုရပေမည်။ သို့သော် မည်မျှပင် သိုသိုသိပ်သိပ် ရှိစေကာမူ ကမ္ဘာပေါ်တွင် ဝိညာဉ်ချီများ စတင်ရွေ့လျားလာသည်နှင့် တစ်ပြိုင်နက် လူတိုင်းမှာ သူဖောက်ထွက်သွားပြီဖြစ်ကြောင်း အာရုံခံမိလိုက်ကြ၏။ ဥက္ကဋ္ဌရုံးမှာလည်း တရားဝင်ထုတ်ပြန်ကြေညာလိုက်ပြီး ထိုကိစ္စကြီးအား အတည်ပြုပေးလိုက်သောကြောင့် ပြည်ထောင်စုကြီးတစ်ခုလုံးမှာ ချက်ချင်းဆိုသလိုပင် စိတ်လှုပ်တရှား ဖြစ်သွားကြပြီး အောင်ပွဲခံနေကြတော့သည်။

လီရှင်းဝမ်နှင့် သွမ့်မုချွယ်တို့မှာ ရှေ့ဆင့်နောက်ဆင့် ဖောက်ထွက်သွားနိုင်ခဲ့သည်ဖြစ်ရာ ပြည်ထောင်စုကြီး၏ ကျင့်ကြံခြင်းလူမှုအဖွဲ့အစည်းမှာ အမြုတေအဆင့်မှ ယွမ်ယင်အဆင့်သို့ တရားဝင် ပြောင်းလဲသွားပြီဖြစ်ကြောင်း သတ်မှတ်၍ရပေသည်။

ထို့ကြောင့် ပြည်ထောင်စုထဲရှိလူတိုင်းမှာ ယွမ်ယင်အဆင့်နှင့် ပတ်သတ်၍ မျှော်လင့်တကြီး ဖြစ်လာကြတော့သည်။ သူတို့အားလုံးမှာ မည်သူက ထပ်၍ ဖောက်ထွက်နိုင်သွားမည်နည်းဟု သိချင်နေကြ၏။

သွမ့်မုချွယ်တစ်ယောက် ဖောက်ထွက်သွားပြီး ပြည်ထောင်စုကြီးတစ်ခုလုံး စိတ်လှုပ်တရှား ဖြစ်နေကြစဉ် ဝမ်ပေါင်လဲ့မှာ အင်္ဂါဂြိုဟ်ဘုရင်ခံ သူ့အားပေးထားသော တာဝန်ဖြစ်သည့် တည်နေရာပြောင်းရွှေ့ခြင်း မန္တန်အစီအရင်ကြီးအတွက် လိုအပ်သော အစိတ်အပိုင်းများအား ထုတ်လုပ်ပေးရမည့် တာဝန်ကြောင့် ဖိအားများခံစားနေရပြီ ဖြစ်သည်။

ဝမ်ပေါင်လဲ့မှာ ထိုအစိတ်အပိုင်းများအား အလျင်အမြန် ထုတ်လုပ်ဖန်တီးပေးရမည်ဖြစ်ကြောင်း သိထား၏။ ထို့အပြင် ပြည်ထောင်စုပျိုးပင် အစီအစဉ်ကြီးမှာလည်း စတင်တော့မည်ဖြစ်ကြောင်း သူက နားလည်ထားသည်။